ខេត្តកំពង់ចាម ៖ ក្រោយពីមានការណែនាំពីសំណាក់រដ្ឋមន្ត្រីក្រសួងសុខាភិបាលក៏ដូចជាលោកអភិបាលខេត្តអំពីករណីផ្ទុះជំងឺរលាកសួតប្រភេទថ្មី (កូរ៉ូណាវីរុស) រួចមក មន្ទីរពេទ្យខេត្តកំពង់ចាមបានត្រៀមបន្ទប់សង្គ្រោះបន្ទាន់ចំនួន៥ដែលរៀបចំដាច់ដោយឡែកពីគេ ដើម្បីត្រៀមជួយសង្គ្រោះដល់អ្នកឆ្លងជំងឺរលាកសួតប្រភេទថ្មី (កូរ៉ូណាវីរុស) ប្រសិនបើមាន ។ ជាមួយនោះដែរ មន្ត្រីជំនាញសុខាភិបាលក៏បានបោះពុម្ពខិត្តប័ណ្ណដើម្បីធ្វើការផ្សព្វផ្សាយឲ្យប្រជាពលរដ្ឋរស់នៅតាមសហគមន៍បានយល់ដឹងនិងប្រុងប្រយ័ត្នកុំអោយឆ្លងជំងឺប្រភេទនេះផងដែរ។
លោកវេជ្ជបណ្ឌិតគីម សួរភិរុណ ប្រធានបន្ទាយសុខាភិបាលខេត្តកំពង់ចាមមានប្រសាសន៍ឲ្យដឹងថា ក្រោយពីបានទទួលការណែនាំពីសំណាក់លោកសាស្ត្រាចារ្យម៉ម ប៊ុនហេង រដ្ឋមន្ត្រីក្រសួងសុខាភិបាល ពេលមានការភ្ញាក់ផ្អើលជំងឺរលាកសួតប្រភេទថ្មី (កូរ៉ូណាវីរុស) ផ្ទុះឡើងនៅប្រទេសចិននោះ ខាងមន្ទីរសុខាភិបាលខេត្តកំពង់ចាមបានធ្វើការបណ្ដុះបណ្ដាលគ្រូពេទ្យចំនួន២៥នាក់ ឲ្យទទួលបានចំណេះដឹងនិងជំនាញក្នុងការព្យាបាលជំងឺប្រភេទនេះ។
លោកវេជ្ជបណ្ឌិតគីម សួភិរុណ ប្រធានមន្ទីរសុខាភិបាលខេត្តមានប្រសាសន៍បន្តថាទោះបីជាប្រទេសកម្ពុជាបានរកឃើញអ្នកឆ្លងជំងឺរលាកសួតប្រភេទថ្មីម្នាក់នៅខេត្តព្រះសីហនុដែលស្ថិតនៅក្រោមការថែទាំរបស់មន្ត្រីជំនាញនៅទីនោះយ៉ាងយកចិត្តទុកដាក់ ។ ដោយឡែកនៅខេត្តកំពង់ចាមរហូតមកដល់ថ្ងៃទី៣០ មករា ឆ្នាំ២០២០ មិនទាន់រកឃើញជំងឺប្រភេទនេះនៅលើប្រជាពលរដ្ឋណាម្នាក់នៅឡើយទេ។
លោកវេជ្ជបណ្ឌិតប្រធានមន្ទីរសុខាភិបាលខេត្តមានប្រសាសន៍បន្តថា ក្រោមការយកចិត្តទុកដាក់របស់រដ្ឋមន្ត្រីក្រសួងសុខាភិបាល និងលោកអ៊ុន ចាន់ដា អភិបាលខេត្ត ក្នុងនោះមន្ទីរពេទ្យខេត្តបានរៀបចំបន្ទប់រួចរាល់ជាស្រេចចំនួន៥បន្ទប់ ដែលស្ថិតនៅដាច់ដោយឡែកពីគេ ដើម្បីត្រៀមទទួលនិងព្យាបាលជំងឺប្រភេទនេះ ក្នុងករណីប្រសិនបើរកឃើញមានប្រជាពលរដ្ឋណាម្នាក់ឆ្លងជំងឺប្រភេទនោះ ។
លោកវេជ្ជបណ្ឌិតប្រធានមន្ទីរសុខាភិបាលខេត្តមានប្រសាសន៍បន្តថា ដោយឡែកនៅព្រឹកថ្ងៃទី៣១ មករា រូបលោកបានកោះហៅប្រធានមន្ទីរពេទ្យចំនួន៩ ព្រមទាំងអ្នកគ្រប់គ្រងមណ្ឌលសុខភាពចំនួន៩១ មកទទួលការណែនាំបន្ថែម ក្នុងនោះមានការបោះពុម្ពខិត្តប័ណ្ណដើម្បីយកទៅផ្សព្វផ្សាយនៅតាមសហគមន៍នីមួយនីមួយៗដើម្បីឲ្យប្រជាពលរដ្ឋមានការយល់ដឹងនិងចេះការពារកុំអោយឆ្លងជំងឺប្រភេទនេះ។ សម្រាប់ប្រជាពលរដ្ឋនៅក្នុងខេត្តកំពង់ចាមបាននាំគ្នាទិញម៉ាស់ពាក់ការពារ ដើម្បីចៀសវាងកុំអោយឆ្លងជំងឺប្រភេទនេះ ត្រូវចេះអនាម័យ និងឧស្សាហ៍លាងដៃជាមួយនឹងសាប៊ូឱ្យបានស្អាតមុននឹងទទួលទានអាហារ ។ លោកក៏បានចេញលិខិតណែនាំដល់ម្ចាស់ឱសថស្ថាននានាកុំឲ្យមានការដំឡើងថ្លៃម៉ាស់ផងដែរ។
លោកវេជ្ជបណ្ឌិតប្រធានមន្ទីរសុខាភិបាលខេត្តបានបន្ថែមឲ្យដឹងទៀតថា ប្រសិនបើមានប្រជាពលរដ្ឋរស់នៅតាមបណ្ដាស្រុកក្រុងទាំង១០ក្នុងខេត្តកំពង់ចាម បើមានជំងឺផ្ដាសាយដែលសង្ស័យដោយប្រការណាមួយនោះសូមប្រញាប់មករកគ្រូពេទ្យនៅតាមមណ្ឌលសុខភាពមន្ទីរពេទ្យបង្អែកស្រុកដើម្បីព្យាបាលឲ្យទាន់ពេលវេលា ។ រូបលោកសង្ឃឹមយ៉ាងមុតមាំលើប្រជាពលរដ្ឋក៏ដូចជាសិស្សានុសិស្សត្រូវរក្សាអនាម័យឲ្យបានខ្ជាប់ខ្ជួនគឺ «ផឹកស្អាត ហូបស្អាត និងរស់នៅស្អាត» ។
ពាក់ព័ន្ធនឹងករណីផ្ទុះជំងឺរលាកសួតប្រភេទថ្មី (កូរ៉ូណាវីរុស) នេះដែរ ស្ត្រីឈ្មោះហេង ណាក់ អាយុ៦១ឆ្នាំ ជាអាជីវករលក់ដូរនៅផ្សារបឹងកុក ក្រុងកំពង់ចាមប្រាប់ឲ្យដឹងនៅព្រឹកថ្ងៃទី ៣០ មករា ២០២០ នេះថា មកដល់ចុងខែមករា ឆ្នាំ២០២០ បន្ទាប់ពីមានការភ្ញាក់ផ្អើលផ្ទុះជំងឺរលាកសួតប្រភេទថ្មី (កូរ៉ូណាវីរុស) នេះមក នៅផ្សារបឹងកុក ក្នុងក្រុងកំពង់ចាម មានប្រជាពលរដ្ឋក្មេងចាស់ប្រុសស្រីដែលនាំគ្នាមកផ្សារទិញម្ហូបអាហារ ក្នុងនោះគាត់សង្កេតឃើញមានអ្នកខ្លះពាក់ម៉ាស់ការពារកុំអោយឆ្លងជំងឺ ចំណែកអ្នកខ្លះទៀតមិនពាក់ក៏មានដែរ ។ ចំណែកគាត់វិញមិនបានពាក់ម៉ាស់នោះទេ ដោយមានក្រមាមួយនៅក្នុងដៃពេលណាដែលមានមនុស្សច្រើនដើរចូលមកផ្សារឆ្លងកាត់កន្លែងលក់ដូររបស់គាត់គឺយកក្រមាមកខ្ទប់ច្រមុះពេលណាមនុស្សរាងស្បើយ គាត់នឹងយកក្រមាចេញ។
ចំណែកម្ចាស់ឱសថស្ថានមួយកន្លែងនៅជិតផ្សារបឹងកុកបានប្រាប់ឲ្យដឹងថា ក្នុងពេលដែលមានការភ្ញាក់ផ្អើលផ្ទុះជំងឺរលាកសួតប្រភេទថ្មី (កូរ៉ូណាវីរុស) គឺមានប្រជាពលរដ្ឋមិនថាចាស់ ឬក្មេងនោះទេបាននាំគ្នាសម្រុកមកទិញម៉ាស់យកទៅពាក់ការពារកុំឱ្យឆ្លងជំងឺប្រភេទនេះផងដែរ៕ (កែសម្រួលដោយ ៖ ធីតា)
ចែករំលែកព័តមាននេះ