ប្រទេសចិន ៖ រដ្ឋាភិបាលចិនប្រកាសនាថ្ងៃទី៣០មករាថា តុល្យការអ្នកបាត់បង់ជីវិតទាក់ទិននឹងវីរុសកូរ៉ូណាថ្មីឡើងដល់១៧០នាក់ហើយនៅចិន ជាមួយអ្នកឆ្លងថ្មីជាង១៧០០នាក់កត់សម្គាល់ឃើញក្នុងទូទាំងប្រទេស។
អាជ្ញាធរសុខាភិបាលបញ្ជាក់ថា ក្នុងចំណោមអ្នកបាត់បង់ជីវិតថ្មី ៣៧នាក់ក្នុងតំបន់ហ៊ូប៉ីដែលមានក្រុងវូហាន ចំណុចកណ្ដាលនៃការចម្លងជាទីប្រជុំជន ហើយអ្នកបាត់បង់អាយុជីវិតថ្មីទី៣៨នៅក្នុងខេត្តស៊ីឈួនភាគនិរតីប្រទេស។ ក្នុងខេត្តហ៊ូប៉ីមានអ្នកឆ្លងថ្មី១០៣២នាក់ ហើយប្រមាណជា៧០០នាក់នៅកន្លែងផ្សេងទៀតនៃប្រទេសចិន។ មានអ្នកឆ្លងដំបូងម្នាក់នៅទីបេ។ តុល្យការនៃការឆ្លងវីរុសនេះបានឡើងដល់ជាង៧.៧០០នាក់ដែលលើសពីចំនួនអ្នកឆ្លងវីរុសSRASដែលមានត្រឹមសរុប៥.៣២៧នាក់។ វីរុសនោះក្នុងឆ្នាំ២០០២មក២០០៣ បានឆក់យកជីវិតមនុស្ស៧៧៤នាក់លើពិភពលោក ក្នុងនោះ៣៤៩នាក់នៅដែនដីចិន។
អង្គការសុខភាពពិភពលោកWHO កាលពីថៃ្ងទី២៩មករាបានអំពាវនាវដល់ពិភពលោកទាំងមូល ឲ្យបញ្ចេញប្រតិកម្មប្រឈមមុខនឹងវីរុសកូរ៉ួណាថ្មី ដែលពេលនេះបណ្ដាលឲ្យមានអ្នកជំងឺច្រើនជាងអ្នកជំងឺSRASនៅចិន។ ចំណែកជនបរទេសច្រើនរយនាក់ត្រូវបានជម្លៀសចេញពីក្រុងវូហាន។
នៅក្រុងហ្សឺណែវលោកMACHAEL RYAN នាយកកម្មវិធីបន្ទាន់របស់WHOថ្លែងនាថ្ងៃទី២៩មករាថា ពិភពលោកទាំងមូលត្រូវតែប្រកាសអាសន្ន ពិភពលោកទាំងមូលត្រូវបញ្ចេញប្រតិកម្ម។ WHOត្រូវរួមប្រជុំបន្ទាន់ថ្មីនាថ្ងៃទី៣០មករា ពិសេសផ្ដោតលើបញ្ហាថាតើការឆ្លងបច្ចុប្បន្ន គឺជាការប្រកាសអាសន្នសុខភាពសាធារណៈកម្រិតអន្តរជាតិឬយ៉ាងណា។ ការចម្លងនៃវីរុសនោះពីមនុស្សមកមនុស្សត្រូវបានកត់សម្គាល់ឃើញ ក្នុងប្រទេស៣ក្រៅពីចិនគឺអាល្លឹម៉ង់ វៀតណាម និងជប៉ុន។ ចំណែកប្រទេស២០បានប្រកាសពីអ្នកឆ្លងវីរុសថ្មីនេះ សរុបប្រមាណជា៨០នាក់លើដែនដីពួកគេ។ មនុស្សទី៥នាថ្ងៃទី២៩មករាអះអាងថាឆ្លងនៅបារាំង។
នាំគ្នាចាត់វិធានការបង្ការបន្ថែម ៖
ជាសញ្ញានៃការពង្រឹងបណ្ដាវិធានការប្រុងប្រយ័ត្នកម្រិតអន្តរជាតិ បណ្ដាក្រុមហ៊ុនអាកាសចរណ៍ដូចជា ក្រុមហ៊ុនអាកាសចរណ៍អង់គ្លេសBRITISH AIRWAYS ក្រុមហ៊ុនអាកាសចរណ៍អាល្លឺម៉ង់ LUFTHANSAនិងក្រុមហ៊ុនអាកាសចរណ៍ឥណ្ឌូណេស៊ី LION AIR ដែលមានជើងហោះហើរច្រើនបំផុតនៅអាស៊ីអាគ្នេយ៍ បានប្រកាសពីការផ្អាកជើងហោះហើរ របស់ពួកគេទៅកាន់ចិនដីគោក។
ក្រុងហុងកុងបានសម្រេចបិទចំណុចឆ្លងកាត់៦ក្នុងចំណោមចំណុចឆ្លងកាត់តាមជើងគោកទាំង១៤កន្លែងជាមួយចិនដីគោក។ ចំណែករុស្ស៊ីនឹងកម្រិតយ៉ាងខ្លាំងទំនាក់ទំនងផ្លូវដែកជាមួយចិន ចាប់ពីថៃ្ងទី៣១មករាទៅ ដោយទុកសេវាកម្មតែផ្លូវរថភ្លើងប៉េកាំង-មូស្គូ។
រីឯជនជាតិអាមេរិក១៩៥នាក់ដែលជម្លៀសចេញពីវូហាន នាព្រឹកថ្ងៃទី២៩មករាបានមកដល់មូលដ្ឋានយោធាមួយនៅកាលីហ្វ័រនីញ៉ាដើម្បិពិនិត្យសុខភាព។ ពួកគេពុំមានរោគសញ្ញានៃវីរុស តែនឹងត្រូវដាក់ឲ្យនៅដាច់ពីគេរយៈពេល៧២ម៉ោង។ ផ្ទុយទៅវិញក្នុងចំណោមជនជាតិជប៉ុន២០៦នាក់ដែលជម្លៀសចេញពីវូហាន មកដល់ក្រុងតូក្យូនាថ្ងៃទី២៩មករា ៣នាក់បានឆ្លងវីរុស។ អ្នកឆ្លងទាំង៣នាក់នោះបន្ថែមលើអ្នកឆ្លង៨នាក់ដែលមានស្រាប់៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ