អ្នកបានចូលមើលប្រព័ន្ធសង្គម និងឃើញរូបថតរបស់មិត្តភក្តិ ឬមិត្តរួមការងារទៅដើរកម្សាន្តប្រទេសនានាជុំវិញពិភពលោកហើយមានអារម្មណ៍ចង់បានដូចគេទេ? បើអ្នកចង់បាន តែតើអ្នកមានថវិកាគ្រប់គ្រាន់ដើម្បីទៅដូចគេទេ?
ការទៅដើរលេងកម្សាន្តជាវិធីដែលមានប្រសិទ្ធិភាពបំផុតក្នុងការសម្រាកលំហែកាយមុនពេលត្រលប់មកការងារវិញ ប៉ុន្តែវាក៏ជាវិធីដែលតម្រូវឲ្យមានការចាយវាយច្រើនជាងគេដែរ ជាពិសេសនៅពេលដែលអ្នកងាយនឹងធ្លាក់ចូលអន្ទាក់របស់ក្រុមហ៊ុនទេសចរណ៍ ។ ដោយហេតុដូចនេះ ប្រសិនបើអ្នកមានគម្រោងចង់ទៅកម្សាន្តដោយខ្លួនឯង ជាមួយមិត្តភក្តិ ឬជាមួយក្រុមគ្រួសារនោះ អ្នកអាចសាកល្បងគន្លឹះងាយៗខាងក្រោមនេះបាន៖
១. រៀបចំគម្រោងមុនពេល៖
អ្នកត្រូវដឹងថាពេលណាជាពេលដែលមនុស្សធ្វើដំណើរច្រើនជាងគេ ហើយជៀសវាងកំឡុងពេលនោះប្រសិនបើអ្នកចង់សន្សំថវិកា ព្រោះស្ទើរតែអ្វីៗគ្រប់យ៉ាងហើយតែងតែឡើងថ្លៃក្នុងកំឡុងពេលនោះ ។ ដូច្នេះអ្នកគួរធ្វើការស្រាវជ្រាវនិងប្រៀបធៀបតម្លៃសម្រាប់ខែខុសៗគ្នាទុកជាមុន មុនពេលធ្វើការសម្រេចចិត្ត ។
២. កក់សំបុត្រទុកជាមុន៖
ពេលដែលអ្នកសម្រេចចិត្តពីពេលវេលា និងទីតាំងបានប្រាកដហើយ អ្នកត្រូវចាប់ផ្តើមកក់សំបុត្រ និងបន្ទប់ទុកជាមុនព្រោះតម្លៃតែងតែឡើងថ្លៃពេលដែលអ្នកចាំដល់ជិតថ្ងៃចេញដំណើរ ។ ប្រសិនបើអ្នកជាមនុស្សដែលចូលចិត្តកក់សំបុត្រតាមអ៊ីនធើណេត អ្នកគួរប្រើកុំព្យូទ័រ និងបើក Pirvate Window ឬ Incognito Window ព្រោះគេហទំព័រមួយចំនួនលួចតាមដាន History របស់អ្នកថាគេហទំព័រដទៃប្រាប់ថាតម្លៃលើទីផ្សារដែលអ្នកបានមើលឃើញស្មើប៉ុន្មាន ។
៣. សួរមនុស្សដែលរស់នៅក្នុងតំបន់នោះ៖
បើអ្នកមានមិត្តភក្តិ ឬបងប្អូនដែលរស់នៅកន្លែងដែលអ្នកធ្វើដំណើរទៅនោះវាស្ទើរតែមិនមានបញ្ហាច្រើនទេដោយអ្នកគ្រាន់តែត្រូវសួរនាំពីព័ត៌មានចាំបាច់ ។ ប៉ុន្តែបើអ្នកមិនស្គាល់នរណាទេនោះ អ្នកអាចចាប់ផ្តើមការសន្ទនាកម្សាន្តជាមួយនឹងម្ចាស់ ឬបុគ្គលិកនៅកន្លែងស្នាក់នៅរបស់អ្នកជាដើម ។ ពួកគេប្រៀបបានជាប្រភពព័ត៌មានដែលអ្នកជួយឲ្យអ្នកជៀសវាងការខ្ជះខ្ជាយរាប់រយដុល្លារ ។
៤. យកអាហារទៅជាប់ខ្លួន៖
បើអ្នកធ្វើដំណើរទៅកាន់ប្រទេសដែលមិនមានអាហារដែលអ្នកតែងតែទទួលទាន ឬប្រទេសដែលមានអាហារថ្លៃៗនោះ វិធីងាយមួយគឺវេចអាហារពីផ្ទះទៅ ។ វាអាចជាមីកំប៉ុង ឬនំចំណីដែលអ្នកអាចដាក់តាមខ្លួន ។ ប្រសិនបើអាហារនៅទីនោះជាទូទៅមានតម្លៃ ២០ដុល្លារសម្រាប់មនុស្សម្នាក់នោះ អ្នកអាចសន្សំដល់ទៅ ១២០ដុល្លារទៅហើយប្រសិនបើអ្នកមិនទទួលទាននៅភោជនីយដ្ឋានបីពេលម្តង និងពីរថ្ងៃជាប់គ្នា ៕ កែសម្រួលដោយ ៖ សុឃាក់
ចែករំលែកព័តមាននេះ