ខណៈដែលកូរ៉ូណាវីរុសកំពុងតែវាយលុកចូលដល់ប្រទេសជាច្រើននៅក្នុងពិភពលោកដោយរួមទាំងប្រទេសកម្ពុជាផងនោះ សម្តេចតេជោហ៊ុនសែន នាយករដ្ឋមន្ត្រីបានអំពាវនាវដល់ប្រជាជនកម្ពុជាអោយមានការយកចិត្តទុកដាក់ថែទាំសុខភាព តាមរយៈវិធានការចាំបាច់មួយចំនួន ដើម្បីកុំអោយឆ្លងមេរោគនេះ ។
ទន្ទឹមពេលជាមួយគ្នានេះ សម្តេចក៏បានអំពាវនាវអោយបន្ថយការភ័យខ្លាចដែលមិនសមហេតុផល ខណៈដែលរហូតមកទល់ពេលនេះមិនទាន់មានពលរដ្ឋកម្ពុជាណាម្នាក់បានឆ្លងមេរោគកូរ៉ូណាវីរុស ឬក៏បានស្លាប់នោះឡើយ ។
ការឆ្លងមេរោគកូរ៉ូណាវីរុសបានផ្ទុះឡើងនៅទីក្រុងវូហានប្រទេសចិន ដោយបានសម្លាប់មនុស្សជាង១០០នាក់ និងបានឆ្លងដល់មនុស្សជាង៦០០០នាក់ក្នុងពិភពលោក ។ ចំណែកនៅក្នុងប្រទេសកម្ពុជាវិញគេបានរកឃើញមួយករណីនៅខេត្តព្រះសីហនុ ។
ការរកឃើញករណីនៅខេត្តព្រះសីហនុនោះ បានចាប់ផ្តើមអោយមានការភ័យខ្លាចខ្លាំងក្នុងចំណោមសាធារណជន ។ ការភ័យខ្លាចនោះកាន់តែមានកម្រិតខ្លាំងឡើងដោយសារមានការផ្សព្វផ្សាយព័ត៌មានមិនពិតដែលមានចរិតបំពុលបរិយាកាសផងដែរ ។
ម៉ាសមុខត្រូវបានគេលក់បង្កើនតម្លៃច្រើនហួសហេតុ ខណៈដែលមនុស្សម្នាភ័យខ្លាចកើតជំងឺនេះហើយនាំគ្នាសម្រុកទិញតាមឪសថស្ថាននានានៅក្នុងប្រទេសកម្ពុជាពិសេសនៅភ្នំពេញ ។
សម្តេចតេជោហ៊ុន សែន បានធ្វើសន្និសីទព័ត៌មានដ៏កម្រមួយ ដើម្បីអំពាវនាវដល់ប្រជាជនកម្ពុជាកុំអោយមានការភ័យខ្លាចជ្រុលហួសហេតុទៅលើការឆ្លងមេរោគនេះ ។ ទន្ទឹមជាមួយគ្នានោះសម្តេចក៏បានអំពាវនាវអោយសាលារៀន ក្រុមហ៊ុន វត្តអារាម និងស្ថាប័ននានាដំណើរការដូចធម្មតាជាមួយនឹងការបង្កើនការថែរក្សាអនាម័យ ដើម្បីបង្ការការឆ្លងកូរ៉ូណាវីរុស ។ កូរ៉ូណាវីរុសមកដល់ពេលនេះ បានសម្លាប់មនុស្សយ៉ាងតិច១៣០នាក់ និងបានឆ្លងដល់មនុស្សចំនួនជាង៦០០០នាក់ ។
អ្នកជំនាញនិយាយថា ជំងឺដែលបង្កឡើងដោយមេរោគកូរ៉ូណាវីរុសភាគច្រើនបំផុតអាចនឹងជាសះស្បើយឡើងវិញ ហើយអត្រាមរណៈដោយសារជំងឺនេះមានប្រហែលជាបីភាគរយ ។
ទោះបីជាយ៉ាងណាក៏ដោយចុះ អង្គការសុខភាពពិភពលោកបានព្រមានអោយមានការចាត់វិធានការទូទាំងពិភពលោកប្រឆាំងនឹងកូរ៉ូណាវីរុស ហើយកំពុងពិចារណាថា ត្រូវប្រកាសស្ថានភាពអាសន្នទូទាំងពិភពលោក ឬទេ ។ នេះបើយោងតាមសេចក្តីរាយការណ៍ព័ត៌មាន BBC របស់អង់គ្លេស ។ នៅប្រទេសកម្ពុជាសេចក្តីភ័យខ្លាចបានគ្របដណ្តប់ខ្លាំង ខណៈដែលព័ត៌មានយ៉ាងច្រើនដោយរួមទាំងព័ត៌មានមិនពិតផង បានជន់លិចនៅក្នុងបណ្តាញសង្គមហ្វេសប៊ុក ។
ជំនួសអោយការភ័យខ្លាចទាំងនោះ ប្រជាជនកម្ពុជាគប្បីបង្កើតការយល់ដឹងអំពីកូរ៉ូណាវីរុស និង វិធានការនានាដើម្បីបង្ការជំងឺនេះ ។ ការភ័យខ្លាចស្លន់ស្លោនឹងមិនអាចដោះស្រាយបញ្ហាអ្វីបានឡើយ ប៉ុន្តែវាគ្រាន់តែធ្វើអោយសភាពការណ៍កាន់តែអាក្រក់ប៉ុណ្ណោះ ។ ជំនួសអោយការភ័យខ្លាចប្រជាជនត្រូវបង្កើនការយល់ដឹងអំពីមេរោគ និងវិធានការបង្ការមេរោគនេះតាមរយយៈការតាមដានព័ត៌មានដែលអាចទុកចិត្តបាន ហើយទន្ទឹមនោះចៀសវាងការនាំគ្នាធ្វើការផ្សព្វផ្សាយព័ត៌មានមិនពិតទាក់ទងនឹងកូរ៉ូណាវីរុស ដើម្បីកុំអោយបង្កើនការភ័យខ្លាចជ្រុលនៅក្នុងចំណោមសាធារណជន ។
វិធានការ ដើម្បីបង្ការការឆ្លងមេរោគនេះរួមមានការពាក់ម៉ាសនៅទីកន្លែងចាំបាច់ការលាងសម្អាតដៃនឹងសាប៊ូ ឬអាកុលយ៉ាងតិច២០វិនាទីអោយបានញឹកញាប់ ការស្ថិតនៅឆ្ងាយពីអ្នកកើតជំងឺនេះចៀសវាងការយកដៃមិនបានលាងសម្អាតទៅប៉ះពាល់មាត់ ភ្នែក និងច្រមុះ ប្រើក្រដាសឬកន្សែងខ្ទប់ពេល កណ្តាស ឬក្អក សម្រាកនៅផ្ទះនៅពេលដែលអ្នកឈឺជាដើម ។
ជាមួយនឹងការយល់ដឹងកាន់តែច្បាស់លាស់អំពីកូរ៉ូណាវីរុស ប្រជាជនកម្ពុជានឹងកាន់តែអាចកាត់ បន្ថយការឆ្លងកូរ៉ូណាវីរុសដែលកំពុងប្រទេសជាច្រើននៅក្នុងពិភពលោក ៕
ចែករំលែកព័តមាននេះ