រាជធានីភ្នំពេញ ៖ ក្នុងពេលវីរុសកូរ៉ូណាប្រភេទថ្មីបានផ្ទុះឡើងនៅក្នុងប្រទេសកម្ពុជាមួយករណី នៅខេត្តព្រះសីហនុ ប្រជាពលរដ្ឋកម្ពុជាបានបង្ហាញការភ័យខ្លាច និងនាំគ្នាការពារ ដោយពាក់ម៉ាស និងអនុវត្តតាមការណែនាំរបស់ក្រសួងសុខាភិបាល ។ ដោយឡែក…
រាជធានីភ្នំពេញ ៖ ក្នុងពេលវីរុសកូរ៉ូណាប្រភេទថ្មីបានផ្ទុះឡើងនៅក្នុងប្រទេសកម្ពុជាមួយករណី នៅខេត្តព្រះសីហនុ ប្រជាពលរដ្ឋកម្ពុជាបានបង្ហាញការភ័យខ្លាច និងនាំគ្នាការពារ ដោយពាក់ម៉ាស និងអនុវត្តតាមការណែនាំរបស់ក្រសួងសុខាភិបាល ។
ដោយឡែក សាលា វេសឡាញ ដែលជាស្ថាប័នអប់រំឯកជនធំមួយនៅកម្ពុជា ក៏បានបង្ហាញពីការចូលរួមរបស់ខ្លួនក្នុងការទប់ស្កាត់ការចម្លងវីរុសនេះដល់សិស្សានុសិស្ស និងសាធារណជនផងដែរ ខណៈមានមាតាបិតា និងអាណាព្យាបាលសិស្សមួយចំនួនបានស្នើសុំផ្អាកការសិក្សារបស់កូនមួយរយៈ ។
យោងតាមសេចក្តីជូនដំណឹងរបស់សាលា វេសឡាញ បានឱ្យដឹងថា សាលាបានដាក់វិធានការមួយចំនួននៅគ្រប់សាខា ដើម្បីទប់ស្កាត់នូវការឆ្លងវីរុសកូរ៉ូណាមកដល់សិស្សរបស់ខ្លួន ក្នុងនោះរួមមាន ៖
១. តាមដានវាស់ស្ទង់កំដៅសិស្សមុនពេលចូលថ្នាក់រៀនគ្រប់ថ្នាក់គ្រប់កម្រិត
២. អាណាព្យាបាលគួរមានម៉ាសការពារ និងដាក់កន្សែងជូតដៃផ្ទាល់ខ្លួនក្នុងកាបូបកូនជាប្រចាំ
៣. គ្រូត្រូវកំណត់ឱ្យសិស្សត្រូវលាងដៃជារៀងរាល់ពេលមុនចូលថ្នាក់រៀន និងញ៉ាំអាហារ ឬពេលឃើញមានដៃកខ្វក់
៤. បង្កើនការសម្អាត និង អនាម័យនៅក្នុងបរិវេណសាលា និងថ្នាក់រៀន
៥. ត្រូវប្រញ៉ាប់ទៅជួបគ្រូពេទ្យ ពិនិត្យតាមដាន ករណីសង្ស័យថាមានជំងឺ
៦. ត្រូវមានសាប៊ូលាងដៃ និងក្រដាសអនាម័យនៅគ្រប់បន្ទប់ទឹកសាលារៀន
៧. ត្រូវជៀសវាងការប៉ះពាល់អ្នកជំងឺដែលមានអាការៈគ្រុនក្ដៅ និងផ្ដាសាយ
៨. សូមក្រុមគ្រួសារដែលបានទៅកម្សាន្តនៅប្រទេសចិន សូមនៅផ្ទះតាមដានសុខភាព១សប្ដាហ៍ សិនមុនអោយកូនមកសាលារៀន ឬចូលបម្រើការងារ
៩. ក្នុងករណីមានការសង្ស័យ ត្រូវរាយការណ៍មកការិយាល័យកណ្ដាល និងទូរស័ព្ទបន្ទាន់ទៅលេខ ១១៥ ។
បើតាម គង់ សំនៀង ប្រធាននាយកប្រតិបត្តិការនៃក្រុមហ៊ុន វេស ឡាញ អេឌ្យូខេសិន គ្រុប បានឱ្យដឹថា សាធារណជនសូមកុំមានការជ្រួលច្របល់ និងភ័យហួសហេតុពេក ព្រោះអ្នកជំនាញបានបញ្ជាក់ថា វាជាជំងឺផ្ដាសាយធម្មតា និងមិនអាចធន់នឹងអាកាសក្ដៅដូចនៅកម្ពុជានោះទេ ។ តាមឯកសារបានបញ្ជាក់ថា វីរុសនេះ គឺធន់នឹងអាកាសធាតុក្រោម២០អង្សាសេ ចំណែកនៅកម្ពុជាគឺមានអាកាសធាតុក្ដៅជាងនេះ ដូច្នេះនៅពេលដែលវាចេញពីមនុស្សម្នាក់មកប៉ះបរិកាសខាងក្រៅវានឹងងាប់ភ្លាម ។
លោកបន្តថា ឪពុកម្ដាយដែលបានស្នើសុំឱ្យផ្អាកការសិក្សារបស់កូន សូមឈប់បារម្ភ និងបញ្ជូនកូនមករៀនធម្មតាវិញ ដើម្បីឱ្យកូនអាចរៀនបានទាន់កម្មវិធីសិក្សា ពីព្រោះសាលាបានដាក់វិធានការមួយចំនួនរួចហើយ ដើម្បីការពារទប់ស្កាត់នូវការឆ្លងវីរុសនេះ ។
គួរបញ្ជាក់ថា គិតត្រឹមរសៀលថ្ងៃទី២៩ មករា ២០២០នេះ អ្នកឆ្លងវីរុសកូរ៉ូណាមានចំនួនជាង៦ពាន់នាក់ ក្នុងនោះអ្នកស្លាប់មានចំនួន១៣២នាក់ ដែលអ្នកស្លាប់ទាំងអស់ គឺនៅប្រទេសចិន ដោយឡែកកម្ពុជា ក៏បានរកឃើញករណីអ្នកផ្ទុកវីរុសនេះ១នាក់ជាជនជាតិចិនមកពីទីក្រុងវូហានប្រទេសចិនដែលស្នាក់នៅខេត្តព្រះសីហនុ ៕ ដោយសហការ (កែសម្រួលដោយ ៖ បុប្ផា)
ចែករំលែកព័តមាននេះ