ខេត្តបាត់ដំបង ៖ បន្ទាប់ពីកម្ទេចក្បាលគ្រាប់កាំភ្លើងបេ៤០ និងក្បាលគ្រាប់កាំភ្លើងត្បាល់ធុន១២០ម.ម ដែលរកឃើញនៅក្នុងស្ទឹងសង្កែ នៅព្រឹកថ្ងៃទី៣០ មករា នេះ កម្លាំងអង្គភាពស៊ីម៉ាក់ បានប្រើសត្វឆ្កែហិតរុករកឃើញក្បាលគ្រាប់កាំភ្លើងធំចំនួន២គ្រាប់ទៀតនៅមាត់ស្ទឹងសង្កែ…
ខេត្តបាត់ដំបង ៖ បន្ទាប់ពីកម្ទេចក្បាលគ្រាប់កាំភ្លើងបេ៤០ និងក្បាលគ្រាប់កាំភ្លើងត្បាល់ធុន១២០ម.ម ដែលរកឃើញនៅក្នុងស្ទឹងសង្កែ នៅព្រឹកថ្ងៃទី៣០ មករា នេះ កម្លាំងអង្គភាពស៊ីម៉ាក់ បានប្រើសត្វឆ្កែហិតរុករកឃើញក្បាលគ្រាប់កាំភ្លើងធំចំនួន២គ្រាប់ទៀតនៅមាត់ស្ទឹងសង្កែ ស្ថិតនៅក្បែរចុងស្ពានថ្មចាស់ទល់មុខសាលាខេត្តត្រើយខាងកើត ហើយពេលនេះ កម្លាំងស៊ីម៉ាក់កំពុងពិនិត្យនិងចាត់វិធានការ ដើម្បីត្រៀមកម្ទេចចោល។
មន្ត្រីស៊ីម៉ាក់ផ្នែកជំនាញកម្ទេចគ្រាប់ ដែលកំពុងត្រូតពិនិត្យបានប្រាប់ថា ក្បាលគ្រាប់ទាំង២ដែលយើងទើបរកឃើញថ្មីនៅព្រឹកថ្ងៃទី៣០ មករា នេះ គឺកម្លាំងជំនាញបានប្រើប្រាសសត្វឆ្កែហិតរុករក ។ ក្បាលគ្រាប់ទាំង២នោះ គឺគ្រាប់កាំភ្លើងផ្លោងធន់៧៥ម.ម និង មួយគ្រាប់ទៀតជាក្បាលគ្រាប់កាំភ្លើងត្បាលដែរ តែគេនៅមិនទាន់ស្គាល់ប្រភេទនៅឡើយទេ តែមន្ត្រីជំនាញកំពុងធ្វើការស្រាវជ្រាវមើលក្នុងឯកសារ។
ប៉ុន្តែយ៉ាងណាក៏ដោយ បើតាមមន្ត្រីស៊ីម៉ាក់បានអះអាងថា ក្បាលគ្រាប់ទាំងនេះអាចបង្កគ្រោះថ្នាក់យ៉ាងផុយស្រួយបំផុត បើធ្វើឲ្យមានប៉ះទង្គិចខ្លាំង ឬលើកចល័តប្ដូរទីតាំង ។ ក្បាលគ្រាប់នេះទាំងនេះ វាបានសេសសល់ពីសម័យសង្គ្រាម ដែលកប់ក្នុងដីតាមមាត់ស្ទឹង លុះគ្រឿងចក្រកាយដី ដើម្បីរៀបចំលំអរតាមដងស្ទឹងនៅក្នុងក្រុងបាត់ដំបង ទើបប្រទះឃើញតែម្ដង ។
មន្ត្រីស៊ីម៉ាក់បានបញ្ជាក់ថា ពេលនេះ យើងកំពុងរៀបចំទីតាំង ដើម្បីកម្ទេចនៅនឹងកន្លែងតែម្ដង ព្រោះក្បាលគ្រាប់នេះមិនអាចលើកចល័តចេញបានឡើយ។
ជាមួយគ្នានេះ បើតាមមន្ត្រីជំនាញដដែលបានបញ្ជាក់ថា ក្បាលគ្រាប់ទាំង២នេះ អាចនឹងកម្ទេចចោលនៅវេលាម៉ោង៣រសៀលថ្ងៃទី៣០ មករា នេះ ហើយ។ ដូច្នេះ នេះចាត់ទុកជាការជូនដំណឹងដល់ប្រជាពលរដ្ឋដែលរស់ក្បែរទីតាំងកើតហេតុ ដើម្បីជ្រាបជាដំណឹង ត្រូវមានការប្រុងប្រយ័ត្ន និងកុំមានការភ្ញាក់ផ្អើល ៕
ចែករំលែកព័តមាននេះ