រាជធានីភ្នំពេញ ៖ ជនសង្ស័យចំនួន២នាក់បានធ្វើសកម្មភាពលួចកាច់សោកម៉ូតូមួយគ្រឿង ស៊េរីទំនើបឆ្នាំ២០២០ បានសម្រេចនៅខេត្តតាកែវ រួចសម្ងំគាស់ស្លាកលេខចេញបាត់ដើម្បីកុំឱ្យម្ចាស់ និងសមត្ថកិច្ចចាំនិងស្គាល់បាន ។ ក្រោយមកជនសង្ស័យក៏បានជិះម៉ូតូចេញគេចខ្លួនពីខេត្តតាកែវ ចូលមករាជធានីភ្នំពេញក្នុងបំណងលក់…
រាជធានីភ្នំពេញ ៖ ជនសង្ស័យចំនួន២នាក់បានធ្វើសកម្មភាពលួចកាច់សោកម៉ូតូមួយគ្រឿង ស៊េរីទំនើបឆ្នាំ២០២០ បានសម្រេចនៅខេត្តតាកែវ រួចសម្ងំគាស់ស្លាកលេខចេញបាត់ដើម្បីកុំឱ្យម្ចាស់ និងសមត្ថកិច្ចចាំនិងស្គាល់បាន ។ ក្រោយមកជនសង្ស័យក៏បានជិះម៉ូតូចេញគេចខ្លួនពីខេត្តតាកែវ ចូលមករាជធានីភ្នំពេញក្នុងបំណងលក់ ប៉ុន្តែខណៈពេលជិះទៅដល់គោលដៅនគរបាលខណ្ឌដង្កោកំពុងត្រួតពិនិត្យច្បាប់ចរាចរប្រទះឃើញជនសង្ស័យទាំង២នាក់នេះជិះម៉ូតូអត់ស្លាកលេខក៏ឃាត់សួរនាំ ស្រាប់តែបែកធ្លាយរឿងលួចម៉ូតូ ទើបចាប់ខ្លួនបញ្ជូនទៅកាន់ខេត្តតាកែវវិញតែម្ដង។
ការចាប់ខ្លួនជនសង្ស័យទាំង២នាក់ខាងលើនេះបានធ្វើឡើងកាលវេលាម៉ោង១និង៣០នាទីរសៀលថ្ងៃទី២៩ ខែមករា ឆ្នាំ២០២០ នៅតាមផ្លូវ២១៧ ត្រង់ចំណុចមុខអធិការដ្ឋាននគរបាលខណ្ឌដង្កោ ស្ថិតនៅក្នុងភូមិថ្មី សង្កាត់ដង្កោ ខណ្ឌដង្កោ រាជធានីភ្នំពេញ ។
ជនសង្ស័យទាំង២នាក់ខាងលើ ក្នុងនោះម្នាក់ឈ្មោះ ទុំ កន ភេទប្រុស អាយុ២១ឆ្នាំ មុខបរមិនពិតប្រាកដ ទីលំនៅក្នុងភូមិក្រសាំងពល ឃុំតាអូរ ស្រុកគីរីវង់ ខេត្តតាកែវ និងម្នាក់ទៀតឈ្មោះ សែប ទូច ភេទប្រុស អាយុ២២ឆ្នាំ មុខរបរមិនពិតប្រាកដ ទីលំនៅក្នុងភូមិកំពង់ ឃុំព្រះបាទជាន់ជុំ ស្រុកគីរីវង់ ខេត្តតាកែវ ។
ក្នុងពេលឃាត់ខ្លួនជនសង្ស័យទាំង២នាក់នេះដែរ នគរបាលក៏បានដកហូតម៉ូតូ១គ្រឿងម៉ាកហុងដាឌ្រីម ធុនសេ១២៥ ស៊េរីឆ្នាំ២០២០ ពណ៌ខ្មៅ ដែលជនសង្ស័យលួចបានរួចគាស់ស្លាកលេខចេញ មានលេខតួ និងលេខម៉ាស៊ីន5609008, កាំបិតប៉័ងតោដងឈើ១, ទួណឺវីសតូចចំនួន២, ខ្សែលួសសម្រាប់តភ្ជាប់ខ្សែភ្លើង១ខ្សែ ប្រវែង១០សង្ទីម៉ែត្រ, ទូរស័ព្ទដៃមួយគ្រឿង, កាបូបលុយពណ៌ខ្មៅ១, ប្រាក់ចំនួន៨៥០០រៀល, កូនសោរម៉ូតូ១, ដែកកេះ១ និង សៀវភៅធានាគុណភាពម៉ូតូមានសរសេរឈ្មោះ ស្តើង ចន្នី ចំនួនមួយក្បាល។
តាមប្រភពពីនគរបាលបានឲ្យដឹងថា ជនសង្ស័យបានធ្វើសកម្មភាពកាច់សោ.កម៉ូតូ១គ្រឿងខាងលើកាលពីថ្ងៃទី២៨ ខែមករា ឆ្នាំ២០២០ នៅភូមិកំពង់ ឃុំព្រះបាទជាន់ជុំ ស្រុកគីរីវង់ ខេត្តតាកែវ រួចបានគេចខ្លួនដោយសុវត្ថិភាព និងបានគាស់ស្លាកលេខចោល ។
តាមប្រភពដដែលបានបន្តថា លុះដល់ថ្ងៃទី២៩ ខែមករា ឆ្នាំ២០២០ ជនសង្ស័យទាំង២នាក់បានជិះចេញពីខេត្តតាកែវចូលមករាជធានីភ្នំពេញ ក្នុងបំណងយកទៅលក់ ប៉ុន្តែបានជួបកម្លាំងសមត្ថកិច្ចនគរបាលខណ្ឌដង្កោកំពុងត្រួតពិនិត្យជាតិអាល់កុលនៅលើផ្លូវ២១៧ ត្រង់ចំណុចមុខអធិការដ្ឋាននគរបាលខណ្ឌដង្កោ ស្ថិតនៅភូមិថ្មី សង្កាត់ដង្កោ ខណ្ឌដង្កោ រាជធានីភ្នំពេញ ដោយឃើញម៉ូតូអត់ស្លាកលេខគួរឲ្យសង្ស័យ ក៏ឃាត់សួរនាំ ទើបធ្លាយរឿងម៉ូតូលួចក៏បានចាប់ខ្លួន និងឃុំបណ្តោះអាសន្ននៅអធិការដ្ឋាននគរបាលខណ្ឌដង្កោ ដើម្បីប្រគល់ទៅឲ្យសមត្ថកិច្ចនគរបាលស្រុកគីរីវង់ នៃស្នងការដ្ឋាននគរបាលខេត្តតាកែវ យកទៅធ្វើការសាកសួរ និងចាត់ការតាមនីតិវិធី ៕ (កែសម្រួលដោយ ៖ ធីតា)
ចែករំលែកព័តមាននេះ