ខេត្តបាត់ដំបង៖ ភ្លើងព្រៃដែលបានឆេះរាលដាលពេញ«ភ្នំដោះក្រមុំ»ស្ទើរទាំងស្រុង នៅក្នុងឃុំតាសាញ ស្រុកសំឡូត ដែលនៅជាប់ខាងក្រោយរបងសាលាស្រុកនេះ កាលពីយប់ថ្ងៃទី២៨ មករា គឺមិនបានបង្កផលប៉ះពាល់ផលដំណាំ ឬខូចខាតលំនៅឋានរបស់ប្រជាពលរដ្ឋទេ ។…
ខេត្តបាត់ដំបង៖ ភ្លើងព្រៃដែលបានឆេះរាលដាលពេញ«ភ្នំដោះក្រមុំ»ស្ទើរទាំងស្រុង នៅក្នុងឃុំតាសាញ ស្រុកសំឡូត ដែលនៅជាប់ខាងក្រោយរបងសាលាស្រុកនេះ កាលពីយប់ថ្ងៃទី២៨ មករា គឺមិនបានបង្កផលប៉ះពាល់ផលដំណាំ ឬខូចខាតលំនៅឋានរបស់ប្រជាពលរដ្ឋទេ ។ នេះបើតាមមន្ត្រីសាលាស្រុក បានផ្ដល់ព័ត៌មានក្រោយពេលអគ្គីភ័យនោះត្រូវបានពន្លត់ទាំងស្រុង ។
មន្ត្រីរដ្ឋបាលស្រុកបាននិយាយថា អគ្គិភ័យនោះ បានឆេះរាលដាលអស់ស្ទើរទាំងស្រុងនូវកូនភ្នំដោះក្រមុំ ដែលស្ថិតនៅខាងក្រោយ និងយ៉ាងកៀកសាលាស្រុកសំឡូត ។ ប៉ុន្តែមិនប៉ះពាល់ដល់អគារសាលាស្រុង លំនៅឋានប្រជាពលរដ្ឋ ឬផលដំណាំដែលនៅតំបន់នោះទេ ដោយសារអាជ្ញាធរនិងសមត្ថកិច្ចបានប្រើប្រាស់រថយន្តពន្លត់អគ្គីភ័យបាញ់ទឹកទប់ស្កាត់ទាន់ពេល តែទូរកូនភ្នំទាំងមូលសល់តែដើមឈើរាងតែប៉ុណ្ណោះ។
ពាក់ព័ន្ធនឹងអគ្គីភ័យ ដែលគេមិនដឹងពីប្រភពនេះ បើតាមអ្នកភូមិបានឱ្យដឹងថា អគ្គីភ័យនោះបានចាប់ផ្ដើមពីដំបូងបន្តិចបន្ទូចនៅប៉ែកខាងលិច នៃ«ភ្នំដោះក្រមុំនេះ» ដែលតាមការប៉ាន់ស្មានចាប់តាំងពីវេលាម៉ោងប្រហែលជាង១០ព្រឹកថ្ងៃទី២៨ មករា នេះ តែគេមិនឃើញមានការអើពើពីអាជ្ញាធរ ឬសមត្ថកិច្ចឡើយ រហូតធ្វើឱ្យអគ្គិភ័យដែលគ្មានប្រភពច្បាស់លាស់នេះ ឆេះរាលដាលកាន់តែខ្លាំងឡើងៗពាសពេញតំបន់ភ្នំទាំងមូល។
ភ្នំដោះក្រមុំនេះ ស្ថិតនៅជាប់ពីខាងក្រោយនៃអគារសាលាស្រុកសំឡូតតែម្ដង ហើយនៅពេលនេះអណ្ដាតភ្លើងយ៉ាងក្រហមច្រាលកំពុងរំកិលកាន់តែកៀកមកក្បែររបងសាលាស្រុកប៉ែកខាងក្រោយ ។ អ្នកភូមិនិយាយថា ការជួយអន្តរាគមន៍ពីសមត្ថកិច្ចនិងអាជ្ញាធរ ហាក់មានភាពយឺតយ៉ាវ ព្រោះភ្លើងបានឆេះរាលដាលអស់ជាច្រើនម៉ោងទៅហើយ គេនៅតែមិនឃើញមានការអើពើពីសមត្ថកិច្ចឡើយ ។
មន្ត្រីសាលាស្រុកម្នាក់ក៏បាននិយាយដែរថា ភ្លើងព្រៃបានឆេះរាលដាលស្ទើរពេញភ្នំ រហូតដល់ម៉ោងប្រហែលជាង៦ល្ងាចថ្ងៃដដែល ទើបគេឃើញអាជ្ញាធរស្រុក និងសមត្ថកិច្ចភ្ញាក់ផ្អើលយករថយន្តទឹក
ទៅបាញ់ទប់ស្កាត់ត្រង់ចំណុចក្បែរសាលាស្រុក តែភ្លើងបានឆេះរាលដាលស្ទើរពាសពេញតំបន់ភ្នំទាំងមូល ហើយបើមានផ្ទះពលរដ្ឋនៅក្បែរនោះក៏អាចក្លាយជាផេះដែរ ដោយភាពស្ពឹកស្រពន់របស់អាជ្ញាធរស្រុកនេះ។
គេនៅតែមិនទាន់ដឹងពីមូលហេតុដែលបង្កឱ្យមានភ្លើងឆេះភ្នំកណ្ដាលស្រុកសំឡូតនេះទេ ។ ប៉ុន្តែបើតាមប្រភពនានា គឺគេសង្ស័យមានមនុស្សលួចដុត ឬមានអ្នកដុតព្រៃចំការដែលស្ថិតនៅចំណុចឆ្កែលូ ប៉ែកខាងលិចនៃកូនភ្នំនេះ ។ ប្រជាពលរដ្ឋបាននិយាយថា បើមានការទប់ស្កាត់តាំងពីគេពិនិត្យឃើញផ្សែងហុយទ្រលោមតាំងពីដំបូងប្រហែលភ្លើងព្រៃនេះមិនអាចឆេះរាលដាលពាសពេញភ្នំរហូតចង់យាយីដល់អគារសាលាស្រុកបែបនេះទេ តែគេសង្ស័យអាជ្ញាធរនិងសមត្ថកិច្ចធ្វេសប្រហែលមិនព្រមទប់ស្កាត់ពីដំបូងទើបបានជាធ្ងន់ធ្ងរបែបនេះ។
ប៉ុន្តែយ៉ាងណា បើតាមមន្ត្រីរដ្ឋបាលស្រុកសំឡូតបានបញ្ជាក់ថា អគ្គីភ័យដែលគេមិនដឹងពីប្រភពនេះ បានលេបត្របាក់អស់ព្រៃតូចៗដែលដុះនៅលើទូរភ្នំដោះក្រមុំទាំងមូលតែប៉ុណ្ណោះ តែមិនប៉ះពាល់ដល់អគាររដ្ឋបាលស្រុក លំនៅឋាន ឬ ផលដំណាំរបស់ប្រជាពលរដ្ឋឡើយ។ ប៉ុន្តែអាជ្ញាធរ និង សមត្ថកិច្ខស្រុក ដែលហ៊ុំព័ទ្ធទៅដោយព្រៃភ្នំមួយនេះមិនគួរធ្វេសប្រហែល ឬ ធ្វើប្រងើយកន្តើយជាមួយនឹងអគ្គីភ័យនេះដែរ គួរតែមានការប្រុងប្រយ័ត្នឱ្យបានខ្លាំងបំផុត ព្រោះនេះជារដូវក្ដៅ ដែលងាយនឹងបង្កឱ្យមានភ្លើងឆេះព្រៃលឿនបំផុត៕
ចែករំលែកព័តមាននេះ