ខេត្តមណ្ឌលគិរី ៖ អាជ្ញាធរខេត្តបានអះអាងថា គិតត្រឹមព្រឹកថ្ងៃទី២៩ មករា ២០២០ ខេត្តមណ្ឌលគិរីមិនមានមនុស្សណាម្នាក់រងនូវការឆ្លងជំងឺ«កូរ៉ូណា» ដែលកំពុងបង្កការព្រួយបារម្ភពីគ្រប់មជ្ឈដ្ឋាននៅឡើយទេ ។ លោក…
ខេត្តមណ្ឌលគិរី ៖ អាជ្ញាធរខេត្តបានអះអាងថា គិតត្រឹមព្រឹកថ្ងៃទី២៩ មករា ២០២០ ខេត្តមណ្ឌលគិរីមិនមានមនុស្សណាម្នាក់រងនូវការឆ្លងជំងឺ«កូរ៉ូណា» ដែលកំពុងបង្កការព្រួយបារម្ភពីគ្រប់មជ្ឈដ្ឋាននៅឡើយទេ ។ លោក ស្វាយ សំអ៊ាង អភិបាលខេត្តមណ្ឌលគិរីបានឱ្យដឹងថា អាជ្ញាធរខេត្តបានយកចិត្តទុកដាក់ជាខ្លាំងចំពោះបញ្ហានេះ ហើយបានតាមដានគ្រប់សភាពការណ៍ ដើម្បីធានាឲ្យបានសុវត្ថិភាពសុខភាពសាធារណៈ ។
លោកអភិបាលខត្តថា ក្រោយទទួលបានសេចក្តីប្រកាសព័ត៌មានពីក្រសួងសុខាភិបាល ក្នុងនាមអាជ្ញាធរខេត្តបានណែនាំដល់អាជ្ញាធរមូលដ្ឋានទូទាំងខេត្ត ហើយមន្ទីរសុខាភិបាលបានរៀបចំ ជាសេចក្តីប្រកាសផ្សព្វផ្សាយពីវិធានការទប់ស្កាត់ការចម្លងវីរុសនេះ ដល់ប្រជាពលរដ្ឋ ឲ្យមានការយល់ដឹងបង្កើនការប្រុងប្រយ័ត្ន ដើម្បីការពារកុំឲ្យឆ្លងជំងឺនេះ។
លោក ស្វាយ សំអ៊ាង បានបញ្ជាក់ថា ប្រសិនបើបងប្អូនមានបញ្ហាក្នុងករណីសង្ស័យ ត្រូវរុះរាន់ទៅមន្ទីរដើម្បីត្រួតពិនិត្យទាន់ពេលវេលា។ សូមរំឮកថា ក្នុងសប្តាហ៍នេះ សិស្សវិទ្យាល័យហ៊ុនសែនកែវសីមាចំនួន២៤ហើយ កើតមានអាការៈ ឈឺក្បាល វិលមុខ ក្អួតចង្អោ សន្លប់ ដែលបង្កការព្រួយបារម្ភថា ខ្លាចមានវីរុស កូរ៉ូណា រាលត្បាតក្នុងតំបន់ ។
ប៉ុន្តែករណីនេះ ត្រូវបានមន្ត្រីជំនាញស្រាវជ្រាវយ៉ាងយកចិត្តទុកដាក់ ដោយមូលហេតុសិស្សសាលាកើតមានបញ្ហាសុខភាព បណ្តាលមកពីអាកាសធាតុក្ដៅខ្លាំង បណ្ដាលឲ្យកង្វះខ្យល់ដកដង្ហើម ការរៀនសូត្ររបស់កូនសិស្សខាងលើប្រឹងរៀនជ្រុលម៉ោង និងបណ្ដាលមកពីអារម្មណ៍ភិតភ័យពេលឃើញសិស្សដូចគ្នាដួលសន្លប់ជាបន្តបន្ទាប់ ៕
ចែករំលែកព័តមាននេះ