ប្រទេសតួកគី ៖ កុមារីតួកគីអាយុ២ឆ្នាំម្នាក់ និងម្ដាយរបស់គេ ត្រូវបានកាយរកឃើញនៅរស់រានមានជីវិតដ៏អស្ចារ្យ ក្រោមគំនរបាក់បែកនៃអគារមួយនៅទីក្រុងអេឡាហ្ស៊ីស ២៨ម៉ោងក្រោយការរញ្ជួយដីមួយដែលបំផ្លាញភាគខាងកើតតួកគី កាលពីថ្ងៃទី២៤ ខែមករា ឆ្នាំ២០២០។ ហើយមនុស្សយ៉ាងតិច៣៨នាក់ត្រូវបាត់បង់ជីវិត និង១៦០០នាក់រងរបួសដោយសារការរញ្ជួយដីនេះ។
បើតាមទូរទស្សន៍តួកគីបានថតរូបភាពពេលដែលអ្នកជួយសង្គ្រោះម្នាក់ ក្នុងចំណោមអ្នកជួយសង្គ្រោះប្រមាណ៤០០០នាក់ បានទាញយកក្មេងស្រីនេះចេញពីក្រោមគំនរបាក់បែក។ រឿងនេះត្រូវបានគេផ្សព្វផ្សាយយ៉ាងច្រើនតាមបណ្ដាញសង្គម។ ម្យ៉ាងវិញទៀត ពួកអ្នកជួយសង្គ្រោះ បានកាយយកចេញបានមនុស្ស៤៥នាក់នៅរស់រានមានជីវិតពីក្រោមគំនរបាក់បែក ចាប់តាំងពីយប់ថ្ងៃទី២៤ ខែមករាមកម៉្លេះ។ ប៉ុន្តែ៤៨ម៉ោងក្រោយការរញ្ជួយដីនោះ និងក្នុងខណៈដែលសីតុណ្ហភាពធ្លាក់ដល់ក្រោម១០អង្សាសេ នាពេលយប់ ក្ដីសង្ឃឹមថា អាចរកឃើញអ្នកនៅរស់រានមានជីវិតពិតជាអស់រលីង។
ប្រធានាធិបតីតួកគីលោករីស៊ីបតៃយីបអ័រដូហ្គាន បានទៅកាន់ក្រុងអេឡាហ្ស៊ីស ដែលមានប្រជាជនប្រមាណជា៣៥០.០០០នាក់ ដើម្បីចូលរួមក្នុងពិធីបុណ្យសពរបស់ម្ដាយម្នាក់ និងកូនប្រុស ដែលបានបាត់បង់អាយុជីវិតក្នុងការរញ្ជួយដីនោះ។ លោកបានព្រមានដល់បណ្ដាអ្នកដែលបំផ្លោងពាក្យចចាមអារ៉ាមអវិជ្ជមានដែលថា ប្រទេសមិនបានគិតគូរហ្មត់ចត់ដល់ការងារសង្គ្រោះក្រោយពេលរញ្ជួយដី។ លោកថា ចូរកុំនាំគ្នាស្ដាប់ការឃោសនាអវិជ្ជមាននានា៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា) (ប្រភពវីដេអូ ៖ Le Parisien)
ចែករំលែកព័តមាននេះ