ពេលដែលអ្នកលឺឈ្មោះ ប៊ីល ហ្គេតស៍ (Bill Gates) អ្នកប្រហែលជាគិតដល់មហាសេដ្ឋីដែលមានទ្រព្យសម្បត្តិសរុបប្រមាណ ១១៩ប៊ីលានដុល្លារ ឬស្ថាបនិករបស់ក្រុមហ៊ុន Microsoft ដែលបានផ្លាស់ប្តូរវិស័យកុំព្យូទ័រ…
ពេលដែលអ្នកលឺឈ្មោះ ប៊ីល ហ្គេតស៍ (Bill Gates) អ្នកប្រហែលជាគិតដល់មហាសេដ្ឋីដែលមានទ្រព្យសម្បត្តិសរុបប្រមាណ ១១៩ប៊ីលានដុល្លារ ឬស្ថាបនិករបស់ក្រុមហ៊ុន Microsoft ដែលបានផ្លាស់ប្តូរវិស័យកុំព្យូទ័រ ឬសប្បុរសជនដែលបរិច្ចាគទ្រព្យសម្បត្តិស្ទើរតែទាំងអស់របស់លោកដើម្បីដោះស្រាយបញ្ហាជុំវិញពិភពលោក ។ ប៉ុន្តែមានចំណុចមួយទៀតដែលអ្នកមិនបានដឹងគឺលោក ប៊ីល ហ្គេតស៍ ជាមនុស្សដែលរស់នៅជីវិតពីរខុសគ្នា ។ ហើយវាបានចាប់ផ្តើមពីការសម្រេចចិត្តធំមួយកាលពី ២០ឆ្នាំមុន ។
ជីវិតពីមុនរបស់លោក ហ្គេតស៍ គឺជាសហគ្រិនដែលបានស្នើសុំឈប់ពីសាកលវិទ្យាល័យ Harvard ដើម្បីចាប់ផ្តើមក្រុមហ៊ុន Microsoft និងបានកសាងក្រុមហ៊ុនដែលជោគជ័យជាងគេក្នុងវិស័យកម្មវិធីកំព្យូទ័រ ។ ពេលនោះក៏ជាពេលដែលលោកត្រូវបានស្គាល់ថាជានាយកប្រតិបត្តិដែលមិនដែលទៅសម្រាកវិស្សមកាល និងជាអ្នកដឹកនាំដែលចងចាំផ្លាកលេខរថយន្តរបស់បុគ្គលិកទាំងអស់ដើម្បីដឹងថាបុគ្គលិកណាបានប្តេជ្ញាលះបង់ជីវិតផ្ទាល់ខ្លួនដើម្បីក្រុមហ៊ុននិងមកធ្វើការនៅថ្ងៃចុងសប្តាហ៍ ។
ប៉ុន្តែលោកបានផ្លាស់ប្តូរហើយ ។ នៅថ្ងៃទី ១៣ខែមករា ឆ្នាំ ២០០០ លោកបានប្រកាសថាលោកបានសម្រេចចិត្តចុះចេញពីតំណែងជានាយកប្រតិបត្តិរបស់ Microsoft និងនៅថ្ងៃទី ២៤ខែមករា ឆ្នាំ ២០០០ លោកបានប្រកាសទៀតថាលោកបរិច្ចាគ ៥ប៊ីលានដុល្លារឲ្យទៅមូលនិធិរបស់លោកគឺ Bill and Melinda Gates Foundation ។
ជាក់ស្តែង មហាសេដ្ឋីជាច្រើនបានសន្យាថាពួកគេចង់បរិច្ចាគដល់សង្គមវិញបន្ទាប់ពីកសាងទ្រព្យសម្បត្តិបានស្តុកស្តម្ភ ប៉ុន្តែមហាសេដ្ឋីជាច្រើនមិនមានឱកាសក្នុងការធ្វើដូច្នេះទេ ដូជជាលោក ស្ទីវ ចបស៍ (Steve Jobs) របស់ Apple ជាដើមដែលបានទទួលមរណភាពនៅឆ្នាំ ២០១១ ។
លោក ហ្គេសន៍ មិនដូចមហាសេដ្ឋីដទៃទៀតទេ ហើយមិនមាននរណាម្នាក់ដែលបានគិតទុកមុនថាលោកនឹងធ្វើដូច្នេះដែរ ។ ប៉ុន្តែតាំងពីពេលចាកចេញពីក្រុមហ៊ុនលោកមក លោកបានប្រើជីវិត ទ្រព្យសម្បត្តិ និងឥទ្ធិពលរបស់លោកដើម្បីធ្វើរឿងពីរយ៉ាងគឺការអភិវឌ្ឍន៍ខ្លួន និងការធ្វើឲ្យគុណភាពនៃការរស់នៅជុំវិញពិភពលោកល្អប្រសើរឡើង ៕ កែសម្រួលដោយ ៖ សុឃាក់
ចែករំលែកព័តមាននេះ