ប្រទេសអ៊ីរ៉ាក់ ៖ គ្រាប់រ៉ុក្កែត៣គ្រាប់កាលពីថ្ងៃទី២៦មករាបានវាយប្រហារមកលើស្ថានទូតអាមេរិកប្រចាំក្រុងបាដាដ ខណៈនៅក្នុងប្រទេសអ៊ីរ៉ាក់ បាតុករប្រឆាំងរដ្ឋាភិបាលច្រើនពាន់នាក់ បានលើកគ្នាដើរហែក្បួនផ្គើនកងកម្លាំងសន្តិសុខដែលបាញ់គ្រាប់ពិត បណ្ដាលឲ្យមនុស្សបាត់បង់អាយុជីវិត២នាក់ទៀត។
ប៉ុន្មានម៉ោងក្រោយការបាញ់គ្រាប់រ៉ុក្កែតទាំងនេះ សហរដ្ឋអាមេរិកបានអំពាវនាវដល់រដ្ឋាភិបាលអ៊ីរ៉ាក់ ឲ្យបំពេញកាតព្វកិច្ចរបស់ខ្លួនដើម្បីការពារបណ្ដាទីតាំងការទូត។ ការបាញ់គ្រាប់រ៉ុក្កែតទាំងនេះបន្ថែមលើការវាយប្រហារមួយចំនួន ដែលរយៈពេលប៉ុន្មានសប្ដាហ៍ចុងក្រោយនេះ សំដៅលើស្ថានទូតអាមេរិកស្ថិតក្នុងតំបន់បៃតង ដែលមានកិច្ចការពារសន្តិសុខខ្ពស់នៃក្រុងបាដាដ និងបណ្ដាមូលដ្ឋានយោធាអ៊ីរ៉ាក់ដែលមានកងទាហានអាមេរិក។ ពុំទាន់មានក្រុមណា ប្រកាសទទួលខុសត្រូវចំពោះការវាយប្រហារទាំងនេះនៅឡើយ ក៏ប៉ុន្តែជាច្រើនលើកក្រុងវ៉ាស៊ិនតោនចោទលើពួកជីវពលស្និទ្ធអ៊ីរ៉ង់។
ក្នុងចំណោមគ្រាប់រ៉ុក្កែតទាំង៣គ្រាប់បាញ់សំដៅស្ថានទូតអាមេរិក ១គ្រាប់ធ្លាក់ក្នុងបរិវេណស្ថានទូតចំពេលម៉ោងអាហារពេលល្ងាច ហើយគ្រាប់រ៉ុក្កែត២គ្រាប់ទៀតធ្លាក់ខាងក្រៅក្បែរស្ថានទូត។ មនុស្សម្នាក់រងរបួសដោយការវាយប្រហារនេះ តែគេមិនទាន់ដឹងសញ្ជាតិនៅឡើយ។ ក្នុងសេចក្ដីប្រកាសមួយក្រសួងការបរទេសអាមេរិកបញ្ជាក់ថា ចាប់តាំងពីខែកញ្ញាមកមានការវាយប្រហារជាង១៤លើករបស់អ៊ីរ៉ង់និងពួកជីវពលគាំទ្រដោយអ៊ីរ៉ង់ប្រឆាំងបុគ្គលិកអាមេរិកនៅអ៊ីរ៉ាក់។
នាយករដ្ឋមន្ត្រីអ៊ីរ៉ាក់លោកអាដែលអាប់ដែលម៉ាហ៍ឌី បានបរិហារពីការឈ្លានពានមួយដែលនឹងអាចប្រែក្លាយអ៊ីរ៉ាក់ទៅជាតំបន់សង្គ្រាមមួយ៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ