រាជធានីភ្នំពេញ ៖ ស្របពេលបដិវន្តន៍ឧស្សាហកម្មជំនាន់ទី៤មានការអភិវឌ្ឍរីកចម្រើននៅលើពិភពលោក កម្ពុជាបាននឹងកំពុងត្រៀមខ្លួនចាប់យក ឬទាញយកផលប្រយោជន៍ពីឧស្សាហកម្មជំនាន់ទី៤ ដើម្បីអភិវឌ្ឍសេដ្ឋកិច្ចនិងសង្គមនេះ កម្ពុជាក៏គ្រោងបញ្ចប់នូវក្របខណ្ឌគោលនយោបាយរដ្ឋាភិបាលឌីជីថលរបស់ខ្លួននាពេលដ៏ខ្លីខាងមុខនេះ។
លោកត្រាំ អ៊ីវតឹក រដ្ឋមន្ត្រីក្រសួងប្រៃសណីយ៍និងទូរគមនាគមន៍មានប្រសាសន៍ថ្មីៗនេះថា ការងារជាអាទិភាពរបស់រាជរដ្ឋាភិបាលកម្ពុជា ក្នុងការត្រៀមខ្លួនទាញយកផលប្រយោជន៍ពីបដិវត្តន៍ឧស្សាហកម្មជំនាន់ទី៤ សម្រាប់ការអភិវឌ្ឍសេដ្ឋកិច្ចសង្គមដើម្បីសម្រេចនូវចក្ខុវិស័យរបស់រាជរដ្ឋាភិបាល។ ក្នុងការការងារសំខាន់ៗដែលបាននិងកំពុងយកចិត្តទុកដាក់ រួមការរៀបចំក្របខណ្ឌគោលនយោបាយរដ្ឋាភិបាលឌីជីល គោលនយោបាយសេដ្ឋកិច្ចឌីជីថល ការការពារសន្តិសុខព័ត៌មានវិទ្យា ពាណិជ្ជកម្មអេឡិចត្រូនិក ការកសាងបទដ្ឋានគតិយុត្តគាំទ្រ ជាដើម។
ទន្ទឹមនឹងរាជរដ្ឋាភិបាលកំពុងផ្តោតការយកចិត្តទុកដាក់លើគោលនយោបាយឌីជីថលនេះ ក្រសួងក៏គ្រោងបញ្ចប់ផងដែរនូវក្របខណ្ឌគោលនយោបាយរដ្ឋាភិបាលឌីជីថលយ៉ាងយូរនៅខែមិថុនាហើយបន្តរៀបចំនូវផែនការគាំំទ្រសំខាន់ៗមួយចំនួនផ្សេងទៀតដែរ។លោករដ្ឋមន្ត្រីបានបញ្ជាក់ថា «សម្រាប់ក្រសួងប្រៃសណីយ៍និងទូរគមនាគមន៍ បាននិងកំពុងធ្វើការជាមួយអន្តរក្រសួងលើការរៀបចំក្របខណ្ឌគោលនយោបាយរដ្ឋាភិបាលឌីជីថល ដែលគ្រោងនឹងបញ្ចប់នៅខែមិថុនា ឆ្នាំ២០២០ ខាងមុខ។ ចេញពីក្របខណ្ឌគោលនយោបាយរដ្ឋាភិបាលឌីជីថលនេះ យើងនឹងរៀបចំនូវផែនការមេ និងផែនការវិនិយោគបន្តទៀត។ ទាក់ទងនឹងពាណិជ្ជកម្មអេឡិចត្រូនិកដែលកំពុងរីកចម្រើនក្នុងព្រះរាជាណាចក្រកម្ពុជា និងពិភពលោក»។
ស្ថិតក្នុងដំណាក់កាលប្រមុខរាជរដ្ឋាភិបាលនិងថ្នាក់ដឹកនាំនៅតាមក្រសួងពាក់ព័ន្ធផ្តោតការយកចិត្តទុកដាក់ រៀបចំគោលនយោបាយនិងផែនការសំខាន់ៗក្នុងទាញប្រយោជន៍ពីបដិវត្តន៍ឧស្សាហកម្មជំនាន់ទី៤នេះមហាជនក៏មើលឃើញថាការប្រើប្រាស់ទូរស័ព្ទនិងប្រព័ន្ធអ៊ិនធឺណែតចល័តនៅកម្ពុជាមានកំណើនកើនឡើងខ្ពស់នៅមួយរយៈចុងក្រោយនេះ។
លោក អ៊ឹម វុត្ថា អ្នកនាំពាក្យនៃនិយ័តករទូរគមនាគមន៍កម្ពុជាមានប្រសាសន៍ធ្លាប់បានឱ្យដឹងថានៅកម្ពុជា គិតត្រឹមចុងខែតុលា ឆ្នាំ២០១៩ ចំនួនអ្នកជួលជាវ និងប្រើប្រាស់ទូរស័ព្ទ មានចំនួនសរុប ២២,០៧ លានស៊ីមកាត ត្រូវនឹង ១៣៥,៥០% នៃចំនួនប្រជាជនកម្ពុជាសរុប កើនឡើង ១៣,៧៥% បើធៀបនឹងតួលេខចុងឆ្នាំ ២០១៨, ចំនួនអ្នកជួលជាវ និងប្រើប្រាស់ទូរស័ព្ទអចល័ត មានចំនួនសរុប ៥៩.៤១៥ ខ្សែ ត្រូវនឹង ០,៣៦% នៃចំនួនប្រជាជនកម្ពុជាសរុប ថយចុះ ៣៣,៤៥% បើធៀបនឹងតួលេខចុងឆ្នាំ២០១៨ និង ចំនួនអ្នកជួលជាវ និងតភ្ជាប់បណ្តាញអ៊ីនធឺណែតចល័ត មានចំនួនសរុប ១៦,៧៥ លានស៊ីមកាត ក្នុងចំណោមស៊ីមកាតទូរស័ព្ទចល័ត ចំនួន ២២,០៧ លានខាងលើ ត្រូវនឹង ១០២,៨៨% នៃចំនួនប្រជាជនកម្ពុជាសរុប កើនឡើង ២៤,១៤% បើធៀបនឹងតួលេខចុងឆ្នាំ២០១៨។
ការកើនឡើងនូវតួលេខខាងលើនេះបើតាមលោកអ៊ឹម វុត្ថា បញ្ជា់ថា «មូលហេតុនៃការកើនឡើងក្នុងការប្រើប្រាស់ទូរស័ព្ទ និងអ៊ីនធឺណែតចល័ត ដោយសារ៖ ១-) ប្រជាជនកម្ពុជាចូលចិត្តភាពជាឯកជន និងចល័ត។ ២-) បច្ចេកវិទ្យាចល័តនិង ឧបករណ៍ស្មាតហ្វូនផ្តល់លទ្ធភាពប្រើប្រាស់កម្មវិធីអនឡាញជាច្រើននិងសម្បូរបែប។ ៣-) តម្លៃឧបករណ៍ ការប្រើប្រាស់បណ្តាញអ៊ីនធឺណិតចល័ត មៃសមរម្យ ហើយថោកជាងគេនៅក្នុងតំបន់និង ៤-) មានការប្រើប្រាស់កម្មវិធីប្រើប្រាស់សេវាអនឡាញមួយចំនួន ដូចជា Transport Apps, Mobile Tranfer Money Apps, Online Apps និងកម្មវិធី Apps ដទៃទៀត ព្រមទាំង សេវា OTT និងបណ្តាញសង្គមដទៃទៀត»។
បើអ្នកនាំពាក្យនៃនិយ័តករទូរគមនាគមន៍កម្ពុជាខាងលើនេះ ការកើនឡើងនៅចំនួនអ្នកប្រើប្រាស់ទូរសព្ទ័និងអ៊ីធឺណែតចល័តខាងលើនេះ វាបានឆ្លើយតបទៅនឹងគោលនយោបាយដែលថ្នាក់ដឹកនាំដាក់ចេញ ហើយលោកសង្ឃឹមថានៅឆ្នាំ២០២០នេះចំនួននេះនឹងបន្តកើនឡើងបន្ថែមទៀត៕ កែសម្រួលដោយ ៖ សុឃាក់
ចែករំលែកព័តមាននេះ