ក្រុមណាហ្គាខបយកឈ្នះខេមរាក្នុងលទ្ធផល ២-០
រាជធានីភ្នំពេញ ៖ ក្រុមបាល់ទាត់ខេមរាកីឡា បានបន្ដលេងចាញ់ក្រុមណាហ្គាខប ក្នុងលទ្ធផល ២-០ នៅលើទីលានបាល់ទាត់ពហុកីឡដ្ឋានជាតិកាលពីថ្ងៃពុធ ទី២៦ ឧសភា កន្លងមក ។
រាជធានីភ្នំពេញ ៖ ក្រុមបាល់ទាត់ខេមរាកីឡា បានបន្ដលេងចាញ់ក្រុមណាហ្គាខប ក្នុងលទ្ធផល ២-០ នៅលើទីលានបាល់ទាត់ពហុកីឡដ្ឋានជាតិកាលពីថ្ងៃពុធ ទី២៦ ឧសភា កន្លងមក ។
នៅក្នុងការប្រកួតបាល់ទាត់ពានរង្វាន់ Metfone C-league 2010 ជុំទី១នេះ ក្រុមខ្លាំងខេមរា ទន់ខ្សោយយ៉ាងខ្លាំងជាពិសេស នៅប៉ុន្មានប្រកួតចុងក្រោយនេះ គេចាញ់ងើបមុខមិនរួចឡើយ ។ នៅក្នុងការប្រកួត៤ លើកចុងក្រោយនេះ ខេមរាលេងចាញ់រហូតងើបមិនផុតពីលេខរៀងទី៧ក្នុងតារាងនោះទេ ។
ក្នុងស្ថានភាពនេះ លោក គឹម នី អ្នកគ្រប់គ្រង ក្រុមខេមរាបានប្ដេជ្ញាចិត្ដថា នឹងកែសំរួលប្រព័ន្ធលេងឱ្យបានល្អដើម្បីយកឈ្នះណាហ្គាខប ប៉ុន្ដែទីបំផុតគេមិនអាចសំរេច តាមបំណងប្រាថ្នានោះឡើយ ។ នៅក្នុងតង់ ទី១ ខេមរា បានលេងសំរុកយ៉ាងខ្លាំងសង្កត់ ណាហ្គាខបជាប់ ដែលមើលទៅគេហាក់បីដូចជាមានប្រៀបជាង ប៉ុន្ដែមិនអាចមានលទ្ធភាពស៊ុត បាល់បញ្ចូលទីណាហ្គាខបបានសំរេចម្ដងណាឡើយ ។ លុះឈានចូលដល់នាទីទី ៤៣ ត្រូវកីឡាករជិន ជុំ ពាក់អាវលេខ៩ខ្សែ ប្រយុទ្ធ ណាហ្គាខប មានឱកាសតែតបាល់បញ្ចូលទីបាន១គ្រាប់នាំមុខមុន ។
ស្ថិតនៅក្នុងស្ថានភាពដ៏តឹងតែងបែបនេះ ខេមរាកីឡា ប្រឹងលេងយ៉ាងប្រុងប្រយ័ត្នបំផុត ជាពិសេសឈានចូលដល់តង់ទី២ ។ ទោះជាយ៉ាងណាក្ដី ណាហ្គាខបក៏មិនហ៊ានធ្វេសប្រហែសដែរ ដោយក្រុមនេះមិនប្រើយុទ្ធវិធី លេងដូចលើកមុនៗទៀតឡើយ។ ការប្ដូរឥរិយាបថមកលេងបែបសុភាពរបស់ ណាហ្គាខប ធ្វើឱ្យក្រុមរបស់គេទទួលបានលទ្ធផលជាទីគាប់ចិត្ដបំផុត គឺនៅចុងម៉ោងប្រកួតតង់ទី២ ក្នុងនាទីទី៨៣ កីឡាករ OYE WOLE YEMI JUSEP ពាក់អាវលេខ៨ របស់ណាហ្គាខប រកបាន១គ្រាប់បន្ថែមទៀត ។
ខេមរាកីឡា ពេលនេះឡើងមិនទាន់ផុតពី លេខរៀងទី៧ក្នុងតារាងទេ ដោយប្រកួត៨ លើក ឈ្នះ២ ស្មើ១ ចាញ់៦ មានតែ៧ពិន្ទុ ប៉ុណ្ណោះ។ ចំណែក ណាហ្គាខប វិញលេង៧ លើក ឈ្នះ៥ ស្មើ២ មាន១៧ពិន្ទុហើយ ៕
ចែករំលែកព័តមាននេះ