រាជធានីភ្នំពេញ ៖ សំរាមជាច្រើនត្រូវបានអាជីវករនៅផ្សារ៧មករា នាំគ្នាយកទៅបោះគរចោលនៅលើដងផ្លូវខាងកើតផ្សារ ក្នុងឱកាសបុណ្យចូលឆ្នាំចិន-វៀតណាមឈានចូលមកដល់នេះ បង្កអោយកកស្ទះចរាចរណ៍ តែពុំត្រូវបានគណៈកម្មការផ្សារក៏ដូចជាអាជ្ញាធរមូលដ្ឋានខណ្ឌទួលគោកយកចិត្តទុកដាក់ឡើយ ។ តាមប្រភពព័ត៌មានបានអោយដឹងថា នៅព្រឹកថ្ងៃទី២៣…
រាជធានីភ្នំពេញ ៖ សំរាមជាច្រើនត្រូវបានអាជីវករនៅផ្សារ៧មករា នាំគ្នាយកទៅបោះគរចោលនៅលើដងផ្លូវខាងកើតផ្សារ ក្នុងឱកាសបុណ្យចូលឆ្នាំចិន-វៀតណាមឈានចូលមកដល់នេះ បង្កអោយកកស្ទះចរាចរណ៍ តែពុំត្រូវបានគណៈកម្មការផ្សារក៏ដូចជាអាជ្ញាធរមូលដ្ឋានខណ្ឌទួលគោកយកចិត្តទុកដាក់ឡើយ ។
តាមប្រភពព័ត៌មានបានអោយដឹងថា នៅព្រឹកថ្ងៃទី២៣ ខែ មករា ឆ្នាំ២០២០នេះ នៅសល់តែ១ថ្ងៃទៀតថ្ងៃសែនចូលឆ្នាំចិន-វៀតណាមនឹងចូលមកដល់ គឺប្រជាពលរដ្ឋខ្មែរដែលជាកូនកាត់ចិន-វៀតណាមមួយចំនួននិងខ្លះទៀតខ្មែរសុទ្ធបាននាំគ្នាទិញអីវ៉ាន់សែនស្ទើរគ្រប់ៗគ្នា ។ ខណៈនោះ គេសង្កេតឃើញថា នៅតាមផ្សារនានា មានមនុស្សកកកុញនាំគ្នាទៅវិញអីវ៉ាន់សែន ហើយបន្សល់ទុកនូវសំរាមយ៉ាងច្រើន ។
ដោយឡែក នៅកណ្តាលផ្លូវលេខ២៨៧ខាងកើតផ្សារ៧មករា ក្នុងសង្កាត់បឹងកក់ទី២ ខណ្ឌទួកគោក គេសង្កេតឃើញសំរាមជាច្រើនត្រូវបានអាជីវករនាំគ្នាចាក់គរនៅកណ្តាលផ្លូវតែម្តង បង្កអោយកកស្ទះចរាចរណ៍ និងជះក្លិនស្អុយអាសោចិ៍ដល់អ្នកជិតខាង និងអ្នកដំណើរផងដែរ ហើយគេឃើញយានយន្តក៏បានបើកកិនពីលើគំនរសំរាមនោះ ដោយរថយន្តខ្លះក៏បានបើកកិន និងអូសសំរាមជាប់តាមរថយន្តនៅរាយប៉ាយពេញដងផ្លូវតែម្តង។
ពាក់ព័ន្ធនឹងបញ្ហាខាងលើនេះ ប្រជាពលរដ្ឋក៏បានរិះគន់ថា គណៈកម្មាការផ្សារ ក៏ដូចអាជ្ញាធរ ខណ្ឌទួលគោកមិនបានយកចិត្តទុកដាក់មកដឹកចេញនោះទេ គឺបណ្តោយឱ្យគេបោះសំរាមទុកគរនៅកណ្តាលផ្លូវបង្កអោយកកស្ទះចរាចរណ៍ និងជះក្លិនស្អុយ។ ប្រជាពលរដ្ឋបាននិយាយថា ចូលឆ្នាំចិនឆ្នាំនេះ ផ្សារ៧មករាលក់ដាច់ សំបូរសប្បាយណាស់ ហើយបន្សល់ទុកនូវសំរាមកណ្តាលផ្លូវបង្កអោយប៉ះពាល់ដល់បរិស្ថាន យ៉ាងខ្លាំង ។ ប្រជាពលរដ្ឋក៏បានសំណូមពរដល់អ្នកគ្រប់គ្រងផ្សារក៏ដូចជាអាជ្ញាធរមេត្តាជួយមើលផង ៕ (កែសម្រួលដោយ ៖ ធីតា)
ចែករំលែកព័តមាននេះ