ខេត្តប៉ៃលិន ៖ គេសង្កេតឃើញប្រជាពលរដ្ឋរស់នៅក្នុងក្រុងប៉ៃលិនជាច្រើននាក់នាំគ្នាជិះម៉ូតូ និងរថយន្ត ចូលទៅក្នុងផ្សារសាមគ្គីហៅប៉ាហ៊ី កាលពីព្រឹកថ្ងៃទី២៣ ខែមករា ឆ្នាំ២០២០ យ៉ាងច្រើនគួរឱ្យកត់សម្គាល់ ខណៈមុនថ្ងៃបុណ្យចូលឆ្នាំចិន វៀតណាម ឈានចូលមកដល់ថ្ងៃស្អែកនេះដោយអ្នកខ្លះទិញដើមផ្កាអង្គាសីល ខ្លះទិញចេក នំចិន ផ្លែឈើ ព្រមទាំងផ្កាភ្ញីយកទៅសែនថ្វាយព្រះរបស់គេផងដែរ ។
បើតាមការរៀបរាប់ពីយុវជនម្នាក់ ឈ្មោះ សុខ គឹមសាន អាយុ២០ឆ្នាំ រស់នៅក្នុងក្រុងប៉ៃលិនបានឱ្យដឹងថា គាត់បានលើកដើមផ្កាអង្គាសីលពីគេយកទៅលក់ដូរនៅក្នុងផ្សារ ដើម្បីឱ្យប្រជាពលរដ្ឋរស់នៅក្នុងក្រុងប៉ៃលិន ទិញយកទៅដាក់នៅក្នុងមុខផ្ទះរបស់គេព្រោះគេជឿថា នៅរដូវចូលឆ្នាំចិនបើផ្ទះណាទិញដើមផ្កានេះយកទៅហើយ ស្រាប់តែចេញផ្កាព្រោងព្រាតនោះនៅក្នុងគ្រួសាររបស់គេនឹងប្រកបរបររកស៊ីកាន់តែធូរធាកាក់កបផងដែរ ។ ប្រភពបន្តទៀតថា ដើមផ្កាអង្គាសីលដែលគេលក់នេះ គឺកាប់នៅក្នុងព្រៃតំបន់ភ្នំខៀវ ហើយការលក់ដូរផ្កា១ដើមមានតម្លៃចាប់ពី៣៥០០០រៀល រហូតដល់១០០០០០រៀល ព្រោះទិញពីគេមកក្នុងតម្លៃខ្ពស់ បើសិនជាលក់ទាបមិនចំណេញនោះឡើយ ។
គួរឱ្យកត់សម្គាល់ថា មុនបុណ្យចូលឆ្នាំចិនប៉ុន្មានថ្ងៃកន្លងទៅនេះការលក់ដូរផ្កាអង្គាសីល និងគ្រឿងសែនផ្សេងៗ មានការដាច់ច្រើនរួមទាំងសម្លៀកបំពាក់ថែមទៀតផង ។ លើសពីនេះប្រជាពលរដ្ឋដែលកាត់ខ្សែស្រឡាយចិន ឬអ្នកធ្លាប់សែនព្រេន គេនាំគ្នាទិញសាច់ជ្រូក និងក្បាលជ្រូកដោយអាជីវករ បន្ថែមការកាប់ជ្រូកជាច្រើនក្បាលទៀតក៏នៅតែលក់ដាច់ ព្រោះមានមនុស្សចូលទៅទិញច្រើនខុសពីថ្ងៃធម្មតា ។ ចំណែកផ្លូវចូលទៅទិញឥវ៉ាន់វិញស្ទើរតែដើរចៀសគ្នាមិនរួច ព្រោះអតិថិជនដែលចូលទៅទិញឥវ៉ាន់ មានការកើនឡើង រីឯទំនិញមិនមានការឡើងថ្លៃខុសពីថ្ងៃមុនៗប៉ុន្មានទេ ។
បើតាមបុរសម្នាក់ឈ្មោះ អូន ជាម្ចាស់ផ្សារត្រី បានរៀបរាប់ឱ្យដឹងថា នៅកៀកនឹងថ្ងៃបុណ្យចូលឆ្នាំចិន១ថ្ងៃ មានមនុស្សច្រើនណាស់ចូលទៅទិញឥវ៉ាន់ក្នុងផ្សាររបស់លោកដែលធ្វើឱ្យអាជីវករមានការសប្បាយរីករាយយ៉ាងខ្លាំង ព្រោះអ្នកខ្លះលក់ដាច់តាំងពីព្រលឹម ហើយខ្លះទៀតកំពុងតែលក់ដាច់ជាបណ្តើរៗ ជាពិសេសសាច់ជ្រូកតែម្តង ។
ចំណែកសន្តិសុខផ្សារម្នាក់បានឱ្យដឹងថា រហូតមកដល់ពេលនេះមានការមមាញឹកនឹងការយាមកាមម៉ូតូ និងរថយន្តរបស់ប្រជាពលរដ្ឋ ព្រោះខ្លាចមានជនខិលខូចបន្លំលួចយកទៅដែលនាំឱ្យមានការខាតបង់ និងលំបាកដល់ជនរងគ្រោះ ។ លើសពីនេះសន្តិសុខធ្វើយ៉ាងណាឱ្យស្របតាមភូមិឃុំសុវត្ថិភាព ហើយក៏មានភ្ញៀវមកលេងពីតាមបណ្តាខេត្តនានា និងភ្ញៀវមកពីភ្នំពេញចូលទៅលេងក្នុងផ្សារសាមគ្គីផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ