រាជធានីភ្នំពេញ ៖ មន្ត្រីជាន់ខ្ពស់ក្រសួងសារធារណការ និងដឹកជញ្ជូនបានអះអាងថា នៅឆ្នាំ២០២០នេះនឹងធ្វើការរឹតបន្តឹងពីសុវត្ថិភាពចរាចរណ៍ផ្លូវគោកខ្លាំងជាងឆ្នាំមុនទៀត ដើម្បីកាត់បន្ថយការគ្រោះថ្នាក់ចរាចរណ៍នៅកម្ពុជា។
ការបញ្ជាក់របស់មន្ត្រីក្រសួងសាធារណការនេះបន្ទាប់ពីសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានប្រកាសអាសន្ននៃកំណើនគ្រោះថ្នាក់ចរាចរណ៍នៅកម្ពុជាកាលពេលកន្លងមកថ្មីៗនេះ។
លោកស្រី មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការគណៈកម្មាធិការជាតិសុវត្ថិភាពចរាចរណ៍ផ្លូវគោកបានឲ្យដឹងក្នុងពិធីយុទ្ធនាការអប់រំផ្សព្វផ្សាយសុវត្ថិភាពចរាចរណ៍នៅថ្ងៃទី២៣ ខែ មករា ឆ្នាំ២០២០ នេះថា៖«ក្រៅពីការអប់រំ យើងមានការរឹតបន្តឹងខ្លាំងហើយឆ្នាំនេះ បើមិនអញ្ចឹងទេ គាត់មិនខ្លាចសោះ។ យើងរឹតបន្តឹងខ្លាំង មិនធ្វើទុក្ខបុកម្នេញប្រជាពលរដ្ឋទេ គឺយើងធ្វើយ៉ាងណាម៉េចសង្កត់ឲ្យគាត់យកចិត្តទុកដាក់ក្នុងការពារអាយុជីវិតក្នុងពេលបើកបរលើដងផ្លូវ»។
លោកស្រីបានបន្តថា ឆ្នាំនេះយើងត្រូវតែបង្ខំគាត់ពាក់មួយសុវត្ថិភាពពេលជិះម៉ូតូ ទាំងអ្នកបើកបររួមទាំងក្មេងផងដែរ។ ក្នុងនោះក៏រឹតបណ្តឹងលើល្បឿនយ៉ាងខ្លាំងដែរ ព្រោះចំណុចនេះជាហេតុបណ្តាលឲ្យមានគ្រោះថ្នាក់ចរាចរណ៍។
លោកស្រីក៏បានលើកឡើងថា ក្រសួងសាធារណការនឹងធ្វើការផ្សព្វផ្សាយពីសិទ្ធិអាទិភាពនៅពេលបើកបរ ដោយផ្សាយតាមវិទ្យុជាតិ និងផ្សាយបន្តទៅកាន់វិទ្យុរបស់ក្រសួងមហាផ្ទៃផងដែរ ដូច្នេះសូមអំពាវនាវដល់ប្រជាពលរដ្ឋចូលរួមស្តាប់ និងអនុវត្តតាម។
លោកស្រីបន្ថែមថា ក្រសួងក៏នឹងធ្វើការរិះរកមធ្យោបាយដើម្បីអប់រំណែនាំពីសិទ្ធិអាទិភាពឲ្យបាន ព្រោះថាគ្រោះថ្នាក់ចរាចរណ៍ដែលកើតឡើងពីការមិនគោរពសិទ្ធិអាទិភាពមានជាង២៣ភាគរយ, ល្បឿន៣៨ភាគរយ និងបត់ឆ្វេង បត់ស្តាំង វ៉ាជែងផងដែរ។
ជាមួយគ្នានេះដែរ សម្រាប់ឱកាសចូលឆ្នាំចិនខាងនេះ ក្រសួងបានអំពាវអំពាវនាវដល់ប្រជាពលរដ្ឋដែលតែងតែជួបគ្នាពិសេសនោះពិសារគ្រឿងស្រវឹង សូមកុំផឹកច្រើនពេក បើពិសារកុំបើកបរឲ្យសោះ ។ ហើយមុនពេលចេញដំណើរត្រូវមើលយាន្តឲ្យបានសព្វគ្រប់ ព្រោះថាពួកគាត់នឹងធ្វើដំណើរទៅតាមកន្លែងកម្សាន្តនានាជាមិនខាន ។
លោកស្រីរដ្ឋលេខាធិការក៏បានអំពាវនាវដល់បើកបរទាំងសូមប្រុងប្រយ័ត្នបំផុតក្នុងការបើកបរនៅពេលធ្វើដំណើរ កុំបើកបរហួសល្បឿនកំណត់ ហើយមុនវ៉ាជែងត្រូវមើលមុខមើល។
សូមបញ្ជាក់ថា ការផ្សព្វផ្សាយសុវត្ថិភាពចរាចរណ៍ផ្លូវគោកនៅថ្ងៃនេះមានការសហការពីមន្ទីសាធារណៈការខេត្តកណ្តាល និងស្នងការខេត្តកណ្តាល ព្រមទាំងក្រសួងពាក់ព័ន្ធជាច្រើនដែលក្នុងគណៈកម្មាធិការជាតិសុវត្ថិភាពចរាចរណ៍ផ្លូវគោក ។ ក្រសួងនឹងធ្វើការយុទ្ធនាការផ្សព្វផ្សាយសុុវត្ថិភាពចរាចរណ៍ផ្លូវគោកនៅបណ្តាផ្លូវជាតិនានាផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ