ខេត្តមណ្ឌលគិរី ៖ មហាជនមានការសោកស្តាយយ៉ាងក្រៃលែង ដោយសារជីវិតកូនដំរីព្រៃអនាថាមួយក្បាល បានបាត់បង់ជីវិត កាលពីវេលាទៀបភ្លឺថ្ងៃទី២០ មករា បន្ទាប់ពីទទួលបានការសង្គ្រោះពីមន្ត្រីឧទ្យានុរក្សអស់រយៈពេលប្រមាណជាង៧០ម៉ោង ។មន្ត្រីជំនាញបានរាយការណ៍ថា នៅថ្ងៃទី១៧ មករា វេលាម៉ោង១០និង៥នាទីព្រឹក មន្ត្រីឧទ្យានុរក្សដែនជម្រកសត្វព្រៃភ្នំព្រេចបានប្រទះឃើញកូនដំរីព្រៃញីមួយក្បាល ដែលមានអាយុប្រមាណជា១សប្ដាហ៍កំពុងដេកដួលនៅចំណុចព្រៃសាត្រឹត ក្នុងដែនជម្រកសត្វព្រៃភ្នំព្រិច ក្នុងស្ថានភាពអស់កម្លាំងខ្លាំង ស្គមស្គាំងដោយមានជំងឺនៅត្រង់អវយវៈពោះ និងមាត់ ស្ថិតនៅក្នុងអាកាសធាតុក្តៅ ។
ក្រុមការងារបានធ្វើអន្តរាគមន៍ជួយសង្គ្រោះភ្លាមៗដោយមានការចូលរួមពីអង្គការដៃគូ ដែលអាចធ្វើឲ្យកូនដំរីព្រៃមួយក្បាលនេះ ងើបឈរនិងដើរបាន ចាប់ពីថ្ងៃទី១៧ ទី១៨ ដល់ទី១៩ ខែមករា ។ ក្រុមការងារបានខិតខំជួយសង្គ្រោះដោយបន្តការថែទាំយ៉ាងយកចិត្តទុកដាក់បំផុតដើម្បីអាចជួយឲ្យកូនដំរីមួយក្បាលនេះឆាប់ជាសះស្បើយ ពីស្ថានភាពជំងឺ ។
ប៉ុន្តែជាអកុសលនៅវេលាយប់ថ្ងៃទី១៩ មករា កូនដំរីខាងលើចាប់ផ្ដើមដេកដួលអស់កម្លាំងលែងកំរើក លែងទទួលចំណី និងទឹក ។ លុះដល់វេលាម៉ោង៣ទៀបភ្លឺឈានចូលថ្ងៃទី២០ ខែមករា ឆ្នាំ២០២០ ស្ថានភាពនិងអាការៈរោគសញ្ញាជំងឺបានធ្វើឱ្យកូនដំរីមួយក្បាលនេះ បាត់បង់ជីវិតគួរឲ្យសោកស្តាយក្រៃលែង ។
លោក កែវ សុភគ៌ ប្រធានមន្ទីរបរិស្ថានខេត្តថ្លែងថា ក្នុងនាមមន្ទីរបរិស្ថានខេត្តមណ្ឌលគិរី និងក្រុមការងារជួយសង្គ្រោះទាំងអស់ពិតជាសោកស្ដាយនូវការបាត់បង់កូនដំរីព្រៃនេះ ។ បើតាមការសន្និដ្ឋានរបស់អ្នកជំនាញ មូលហេតុ ធ្វើឱ្យមេរបស់កូនសត្វដំរីព្រៃមួយក្បាលនេះ សម្រេចចាកចេញទៅមុនបាត់ គឺដោយសារតែស្ថានភាពនិងការវិវត្តនៃអាការៈជំងឺរបស់កូនដំរី មានសភាពទន់ខ្សោយខ្លាំង មិនអាចដើររួច មិនអាចដើរតាមមេបានទើបមេរបស់វាសម្រេចបោះបង់នឹងដើរចោលទៅមុនតែម្តង ៕
ចែករំលែកព័តមាននេះ