ក្រុងប៉ោយប៉ែត ៖ សមត្ថកិច្ចប៉ូលិសក្រុងប៉ោយប៉ែតបានចាប់ឃាត់ខ្លួនជនសង្ស័យប្រុស-ស្រី៣នាក់ពីបទជួញដូរថ្នាំញៀន កាលពីថ្ងៃទី៧ មីនា វេលាម៉ោង១០ព្រឹក នៅចំណុចចំណតរថយន្ត ស្ថិតក្នុងភូមិបាលិលេយ្យ សង្កាត់ប៉ោយប៉ែត ក្រុងប៉ោយប៉ែត ។
ទាក់ទិននឹងករណីខាងលើនេះ លោកអនុសេនីយ៍ទោព្រហ្ម ពិសិដ្ឋ នាយផ្នែកព្រហ្មទណ្ឌ ក្រុងបានឱ្យដឹងថា មុននឹងឈានទៅដល់ការចាប់ខ្លួនជនសង្ស័យទាំង៣នាក់ខាងលើនេះ គឺកាលពីវេលាម៉ោង១០ព្រឹកថ្ងៃទី៧ មីនា ប៉ូលិសចរាចរដែលឈរជើងត្រួតពិនិត្យនៅចំណុចផ្លូវដើមពុទ្រា បានចាប់ឃាត់ខ្លួនយុវជនម្នាក់ឈ្មោះយ៉ន សំនៀង អាយុ២១ឆ្នាំ ជិះម៉ូតូម៉ាកអាយខន ពណ៌ផ្កាឈូក លាយខ្មៅ អត់មានពាក់មួកសុវត្ថិភាព បន្ទាប់ពីយុវជនម្នាក់នេះបានព្យាយាមជិះម៉ូតូគេចខ្លួនដោយបើកបំបុកប៉ូលិសទើបត្រូវចាប់ឃាត់ខ្លួនធ្វើការឆែកឆេរឃើញថ្នាំញៀនប្រភេទម៉ាទឹកកក១ថង់តូចនៅជាប់នឹងខ្លួនរបស់គេ ។ នៅពេលសួរនាំទៅយុវជនរូបនេះបានឆ្លើយប្រាប់សមត្ថកិច្ចថាថ្នាំញៀននេះរូបគេបានទិញពីផ្ទះមួយនៅក្នុងភូមិខាងលើ ហើយសមត្ថកិច្ចក៏បានរាយការណ៍ជូនថ្នាក់លើដើម្បីសុំយោបល់ ។
លោកអនុសេនីយ៍ទោព្រហ្ម ពិសិដ្ឋ បានបន្តថា ក្រោយពីមានបទបញ្ជានិងមានដីកាឯកភាពពីស្ថាប័នតុលាការលោកស៊ុន សាវុធ អធិការរងនិងរូបលោកបាននាំកម្លាំងទៅឆែកឆេរលំនៅឋានរបស់ឈ្មោះឃុន ពឹង ជាម្ចាស់ផ្ទះហើយបានឃាត់ខ្លួនស្ត្រី២នាក់ទៀត ម្នាក់ឈ្មោះចុង សៀវ អាយុ២៩ឆ្នាំ និងម្នាក់ទៀតឈ្មោះស៊ីម ស៊ីណាត អាយុ៤៣ឆ្នាំ ពួកគេស្ត្រីទាំងពីរនាក់ជាប់សង្ស័យពាក់ព័ន្ធជួញដូរថ្នាំញៀន ។ ក្នុងការឆែកឆេរនោះសមត្ថកិច្ចបានរកឃើញនិងរឹបអូសបានថ្នាំញៀនប្រភេទម៉ាទឹកកកចំនួន១៤៦ថង់តូច និង៥ថង់ធំ រួមទាំងទូដែក១ និងកាមេរ៉ាសុវត្ថិភាពដែលម្ចាស់ផ្ទះដាក់សម្រាប់មើលសកម្មភាពតាមផ្លូវ ។ លោកអនុសេនីយ៍ឯក អ៊ុំ សុផល អធិការក្រុងប៉ោយប៉ែត បានឱ្យដឹងថា ចំពោះជនសង្ស័យប្រុស-ស្រីទាំង៣នាក់ រួមទាំងវត្ថុតាងសមត្ថកិច្ចនឹងកសាងសំណុំរឿងបញ្ជូនទៅតុលាការ ៕
ចែករំលែកព័តមាននេះ