ការពិតជាក់ស្តែង ទ្រព្យសម្បត្តិអាចផ្តល់នូវក្តីសុខដល់មនុស្ស ព្រោះពួកគេមិនចាំបាច់ព្រួយបារម្ភច្រើនពីការរស់នៅប្រចាំថ្ងៃឡើយ ប៉ុន្តែវាក៏អាចនាំយកមកនូវបញ្ហាដែរដែលមានដូចខាងក្រោមនេះ៖
១. អ្នកបាត់បង់ចំណាប់អារម្មណ៍លើអ្វីៗដែលសាមញ្ញ៖
ពេលដែលអ្នកមានសមត្ថភាពក្នុងការទិញរបស់ដែលល្អហើយ អ្នកតែងតែចាប់ផ្តើមបាត់បង់ចំណាប់អារម្មណ៍លើអ្វីដែលមានតម្លៃទាប ឬមានតម្លៃមិនស្មើអ្វីដែលអ្នកធ្លាប់មាន ។ ដោយហេតុដូចនេះ អ្នកមានទ្រព្យសម្បត្តិស្តុកស្តម្ភភាគច្រើនជួបការលំបាកក្នុងការទទួលបានភាពសប្បាយរីករាយព្រោះមិនមានអ្វីច្រើនដែលអាចធ្វើឲ្យពួកគេរំជើបរំជួលខ្លាំងទេ ។
២. អ្នកដទៃតែងតែលាបពណ៌មិនល្អលើអ្នក៖
មនុស្សទូទៅភាគច្រើនតែងតែមានទស្សនៈអវិជ្ជមានលើអ្នកដែលមានទ្រព្យសម្បត្តិស្តុកស្តម្ភដោយគិតថាពួកគេស្ទើរតែមិនដែលធ្វើការហត់នឿយដូចមនុស្សដទៃជាដើម ។ ជាមួយគ្នានេះដែរ ពួកគេក៏ជួបនឹងមិត្តភក្តិក្លែងក្លាយ និងមនុស្សដែលព្យាយាមចូលជិតពួកគេដើម្បីលុយជាដើម ។
៣. ត្រូវបានអ្នកដទៃរើសអើងពេលដែលមិនស្លៀកពាក់ស័ក្តិសម៖
អ្នកដែលមានទ្រព្យស្តុកស្តម្ភងាយនឹងជួបនឹងសម្ពាធក្នុងការចាយវាយ ឬទិញសម្ភារៈថ្លៃៗ ឬរស់នៅជីវភាពដែលឡូយឆាយដើម្បីចូលចំណោមអ្នកមានដទៃចុះ ។ ជាមួយគ្នានេះផងដែរ ពេលដែលពួកគេមិនស្លៀកពាក់ស័ក្តិសមនឹងទ្រព្យរបស់ខ្លួន ពួកគេក៏អាចទទួលបានការរើសអើង និងវាយតម្លៃដែរ ។
៤. មនុស្សដទៃគិតថាពួកគេជាធនាគារ៖
ប្រាកដណាស់ អ្នកមានជាមនុស្សដែលមានទ្រព្យសម្បត្តិទុកដាក់ច្រើន ប៉ុន្តែមិនមែនមានន័យថាពួកគេមានថវិកាសម្រាប់ឲ្យមនុស្សគ្រប់គ្នាខ្ចីដូចធនាគារឡើយ ។ ហើយពេលដែលពួកគេបដិសេធ ពួកគេបែរជាត្រូវបានរិះគន់ថាកំណាញ់ទៅវិញ ។
៥. ទ្រព្យសម្បត្តិអាចធ្វើឲ្យមានការលំបាកក្នុងការជ្រើសរើសគូស្រករ៖
ការរកមនុស្សដែលមិនចង់បានទ្រព្យសម្បត្តិពួកគេគឺជារឿងពិបាកមួយហើយ តែមានពេលខ្លះទៀត ភាគីម្ខាងទៀតអាចនឹងផ្លាស់ប្តូរទាំងស្រុងពេលដែលដឹងថាពួកគេមានទ្រព្យសម្បត្តិច្រើនស្តុកស្តម្ភ ។ ជាមួយគ្នានេះទៀត គ្រួសារមួយចំនួនអាចនឹងភ័យខ្លាចកូនៗជ្រើសរើសគូខុសហើយបង្ខំឲ្យកូនៗភ្ជាប់វាសនាជាមួយនឹងបុគ្គលដែលឪពុកម្តាយពេញចិត្តជាដើម ៕ កែសម្រួលដោយ ៖ សុឃាក់
ចែករំលែកព័តមាននេះ