រាជធានីភ្នំពេញ ៖ សេចក្តីរាយការណ៍បឋមបានឲ្យដឹងថា ប្ដីប្រពន្ធ១គូបានរៀបការជាមួយគ្នារយៈពេលជិត១០ឆ្នាំកន្លងមកហើយ មិនតែប៉ុណ្ណោះបង្កើតបានកូនស្រីចំនួន២នាក់ថែមទៀតផង ប៉ុន្តែមួយរយៈចុងក្រោយនេះ ការរស់នៅជាមួយគ្នាហាក់មិនមានការចុះសម្រុងសោះ ចេះតែមានភាពរកាំរកូសជាបន្តបន្ទាប់ រហូតឈានដល់ការចែកផ្លូវគ្នាដើរ ដោយអ្នកទាំង២នាក់បានលែងលះគ្នា…
រាជធានីភ្នំពេញ ៖ សេចក្តីរាយការណ៍បឋមបានឲ្យដឹងថា ប្ដីប្រពន្ធ១គូបានរៀបការជាមួយគ្នារយៈពេលជិត១០ឆ្នាំកន្លងមកហើយ មិនតែប៉ុណ្ណោះបង្កើតបានកូនស្រីចំនួន២នាក់ថែមទៀតផង ប៉ុន្តែមួយរយៈចុងក្រោយនេះ ការរស់នៅជាមួយគ្នាហាក់មិនមានការចុះសម្រុងសោះ ចេះតែមានភាពរកាំរកូសជាបន្តបន្ទាប់ រហូតឈានដល់ការចែកផ្លូវគ្នាដើរ ដោយអ្នកទាំង២នាក់បានលែងលះគ្នា ហើយបានយល់ព្រមទទួលយកកូនទៅចិញ្ចឹមម្នាក់១ថែមទៀតផង ។
ហេតុការណ៍នេះបានកើតឡើងកាលពីវេលាម៉ោង១រសៀល ថ្ងៃទី១៩ ខែមករានេះ នៅក្នុងភូមិព្រៃព្រីងខាងជើង សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។ ប៉ុន្តែរហូតដល់វេលាម៉ោង៥និង៣០នាទីល្ងាច ថ្ងៃដដែលទើបស្ត្រីរងគ្រោះចេញពីគ្លីនិកឯកជនជិះម៉ូតូកង់បីទៅកាន់ប៉ុស្តិ៍នគរបាលចោមចៅទី៣ ដើម្បីដាក់ពាក្យប្ដឹង ទើបមានការភ្ញាក់ផ្អើលដល់នគរបាលចុះទៅអន្តរាគមន៍ ។
ជនដៃដល់ជាប្តីខាងលើឈ្មោះ វង់ ចាន់សុភាព អាយុ៣០ឆ្នាំ ស្នាក់នៅកន្លែងកើតហេតុ មានស្រុកកំណើតនៅក្នុងឃុំក្រញ៉ូង ស្រុកស្វាយទាប ខេត្តស្វាយរៀង ជននេះធ្លាប់ជាប់គុកម្ដងដោយសារការប្រើប្រាស់គ្រឿងញៀន និងប្រើអំពើហិង្សានៅក្នុងគ្រួសារ ។ ដោយឡែកស្ត្រីរងគ្រោះជាប្រពន្ធឈ្មោះ បូ ស្រីណែត អាយុ២៩ឆ្នាំ មុខរបរជាកម្មការនីរោងចក្រ មានស្រុកកំណើត នៅក្នុងភូមិបឹងង៉ោង ឃុំទឹកល្អក់ ស្រុកគងពិសី ខេត្តកំពង់ស្ពឺ ។
តាមប្រភពព័ត៌មានបានឲ្យដឹងថា ប្ដីប្រពន្ធខាងលើបានរៀបការនឹងគ្នាបានរយៈពេលជាង៧ឆ្នាំមកហើយ និងបង្កើតបានកូនស្រី២នាក់នៅក្នុងបន្ទុកគ្រួសារថែមទៀតផង ហើយដោយសារតែការរស់នៅមិនចុះសម្រុងគ្នា អ្នកទាំង២បានឈានដល់ការលែងលះគ្នានៅត្រឹមសាលាឃុំ ហើយបានព្រមព្រៀងចែកកូនគ្នាម្នាក់១ ដោយប្ដីយកកូនស្រីច្បងទៅចិញ្ចឹម រីឯប្រពន្ធយកកូនស្រីប្អូនទៅចិញ្ចឹម ព្រមទាំងបានទៅរស់នៅជាមួយឪពុកម្ដាយឯស្រុកកំណើត ។
លុះមកដល់វេលាម៉ោង១រសៀល ថ្ងៃកើតហេតុស្ត្រីជាប្រពន្ធបាននាំកូនស្រីប្អូន និងប្អូនស្រីម្នាក់ទៀតទៅកាន់ផ្ទះជួលដែលធ្លាប់ស្នាក់នៅជុំគ្នាជាមួយប្តី ដើម្បីប្រមូលយកខោអាវ និងរបស់របរប្រើប្រាស់ផ្ទាល់ខ្លួន ។ ខណៈនោះស្រាប់តែប្តីទាញយកដបសាំងមកចាក់ស្រោចលើខ្លួនប្រពន្ធ កូនស្រី និងប្អូនស្រី ប៉ុន្តែកូនស្រី និងប្អូនស្រីបានរត់ចេញរួចទាន់ពេល ចំណែកប្រពន្ធត្រូវភ្លើងឆាប បណ្ដាលឲ្យរលាកពេញខ្លួន បន្ទាប់មកជនដៃដល់បានយកលុយ និងទូរស័ព្ទរបស់ប្រពន្ធរត់គេចខ្លួនបាត់ស្រមោលតែម្ដង ។
ប្រភពខាងលើបានបន្តទៀតថា ក្រោយកើតហេតុស្ត្រីរងគ្រោះបានជិះម៉ូតូទៅកាន់គ្លីនិកឯកជនមួយនៅឯមុខតំបន់សេដ្ឋកិច្ចពិសេសភ្នំពេញដោយខ្លួនឯង ចំណែកប្អូនស្រីបានជិះម៉ូតូឌុបទៅតាមឪពុក ក្រុមគ្រួសារនៅឯស្រុកមកជួយរហូតដល់ល្ងាចថ្ងៃដដែលទើបក្រុមគ្រួសារដឹកតាមម៉ូតូកង់បីចេញពីគ្លីនិកទៅកាន់ប៉ុស្តិ៍នគរបាលចោមចៅទី៣ ដើម្បីដាក់ពាក្យបណ្ដឹងឲ្យជួយស្វែងរកចាប់ខ្លួនជនដៃដល់ជាប្ដី ។ ភ្លាមៗនោះនគរបាលបានសួរនាំ និងទទួលពាក្យបណ្ដឹងទាំងស្ថានភាពភ្ញាក់ផ្អើល និងបានចាត់ទុកថានេះជាអំពើសាហាវ និងប៉ុនប៉ងមនុស្សឃាតពេញទី ហើយពេលនោះដោយសារតែស្ត្រីខាងលើរបួសធ្ងន់ធ្ងរពេកខ្លាំងនោះទើបនៅវេលាម៉ោងជាង៦ល្ងាចថ្ងៃដដែលក្រុមគ្រួសារបានបញ្ជូនបន្តតាមរថយន្តសង្គ្រោះរបស់អង្គភាព៧១១ ទៅមន្ទីរពេទ្យព្រះកុសុមៈដើម្បីសង្គ្រោះបន្តទៀត ។
ប្រភពដដែលនោះបានបញ្ជាក់ថា បន្ទាប់មកកម្លាំងនគរបាលប៉ុស្តិ៍ចោមចៅទី៣ បានចុះទៅនៅកន្លែងកើតហេតុ ដើម្បីចាប់ខ្លួនជនដៃដល់ ប៉ុន្តែពេលទៅដល់ជននេះបានជិះម៉ូតូរត់គេចខ្លួនបាត់ទៅហើយ ខណៈនោះនគរបាលបានធ្វើការសាកសួរពីរឿងហេតុដែលបានកើតឡើងទៅកាន់ស្ត្រីចំណាស់ម្នាក់ដែលត្រូវជាម្តាយរបស់ជនដៃដល់ និងជាម្ដាយក្មេករបស់នាងរងគ្រោះ ។ ព្រោះពេលកើតហេតុគាត់ក៏ស្ថិតនៅទីនោះដែរ ប៉ុន្តែគាត់បានបដិសេធន៍ថា អត់ដឹង និងប្រាប់ទាំងកុហកថា រឿងរ៉ាវបន្តិចបន្តួចទេ ឯកូនប្រសាររបួសស្រាលទេ ហើយវាកើតឡើងព្រោះនាងជាកូនប្រសាទាំងដែលបានធ្វើឲ្យកូនគាត់ឈឺចាប់រហូតកើតរឿង ។ គាត់បានចោទប្រកាន់ថា នាងរងគ្រោះបានចុះចោលកូនប្រុសគាត់ទៅមានប្រុសសហាយជាង២ខែហើយ បើចង់ដឹងសូមលោកប៉ូលិសទៅសួរអ្នកភូមិទៅគេដឹងគ្រប់គ្នាទាំងអស់ ។
ស្ត្រីរងគ្រោះបាននិយាយថា រវាងរូបគាត់ និងប្ដី គឺបានលែងលះគ្នារយៈពេល២ខែមកហើយ ដោយប្ដីជាអ្នកសុំលែងដោយផ្ទាល់តែម្ដង មូលហេតុព្រោះតែការរស់នៅមិនចុះសម្រុងនឹងគ្នា ហើយក្រោយពីការលែងលះគាត់បានចាកចេញទៅរស់នៅជាមួយឪពុកម្ដាយនៅឯស្រុកកំណើត ដើម្បីទទួលបានភាពកក់ក្ដៅភាពជាស្រីមេម៉ាយម្នាក់ពុំមែននៅសុខៗស្រាប់តែចុះចេញពីផ្ទះទៅមានប្រុសថ្មី ឬរត់តាមប្រុសដូចជាការចោទប្រកាន់ទាំងបំពានពីសំណាក់ម្ដាយក្មេកនោះឡើយ ។ ការចោទប្រកាន់ និងការចាក់សាំងដុតរូបនាងខាងលើនេះ គឺបានផ្ដល់ភាពអយុត្តិធម៌ខ្លាំងបំផុតសម្រាប់រូបគាត់ ដែលគាត់មានការឈឺចាប់មិនអាចទទួលយកបានឡើយ និងស្នើរសុំឲ្យសមត្ថកិច្ចជួយចាត់ការតាមច្បាប់ ៕
ចែករំលែកព័តមាននេះ