រាជធានីភ្នំពេញ៖ អស់រយៈពេលជិត ១ទសវត្សរ៍កន្លងផុតទៅ បើទោះបីកម្ពុជាបានបង្កើតក្រុមហ៊ុនផ្សារមូលបត្រកម្ពុជាឡើងសម្រាប់ផ្តល់ឱកាសដល់សហគ្រាស់តូច-ធំក្នុងស្រុកអាចប្រមូលដើមទុនដើម្បីពង្រីកអាជីវកម្មរបស់ខ្លួនបាកក៏ដោយ ក៏ SMEs ឬសហគ្រាសធុនតូច និងមធ្យមនៅក្នុងស្រុកនៅតែស្ទាក់ស្ទើរ ឬមិនទាន់យល់ច្បាស់ ទន្ទឹមនឹងរាជរដ្ឋាភិបាលផ្តល់ការលើកទឹកចិត្តមិនយកពន្ធដាចំពោះពួកគាត់បែបណាក្តី ។ តើអ្វីដែលជាឧបសគ្គរាំងស្ទះសម្រាប់ SMEs ក្នុងការនាំយកក្រុមហ៊ុនមកចុះបញ្ជីនៅផ្សារមូលបត្រ ?
ជិត ១ទសវត្សរ៍ចុងក្រោយនេះផ្សារមូលបត្រកម្ពុជាទទួលបានក្រុមហ៊ុន ព្រមទាំងគ្រឹះស្ថានធនាគារ និងហិរញ្ញវត្ថុចំនួន ៨ ក្នុងនោះ ៥ ក្រុមហ៊ុនបោះផ្សាយលក់ភាគហ៊ុន ឬមូលបត្រកម្មសិទ្ធិ និង ៣ ក្រុមហ៊ុនផ្សេងទៀតតបោះលក់មូលបត្រដែលបានប្រមូលទុនសរុបពីផ្សារមូលបត្រប្រមាណ ១៦១,៤៧លានដុល្លារអាមរិក តែដោយឡែកសម្រាប់ SMEs នៅមិនទាន់មានភាពប្រាកដប្រជា បានត្រឹមបង្ហាញចំណាប់អារម្មណ៍ទាំងដឹងក្រុមហ៊ុនខ្លួនឯងត្រូវដើមទុនបន្ថែមសម្រាប់ពង្រីកអាជីវកម្មឱ្យឆ្លើយតបតម្រូវការទីផ្សារបច្ចុប្បន្ននេះក្តី ។
លោក ហុង សុហួរ អគ្គនាយកក្រុមហ៊ុនផ្សារមូលបត្រកម្ពុជាមានប្រសាសន៍ប្រាប់ក្រុមអ្នកសារព័ត៌កាលពីថ្ងៃទី ១៥ខែមករាកន្លងទៅនេះថា កន្លងមកយើងបានបង្កើតទីផ្សារសម្រាប់SMEs ចុះបញ្ជីរួចហើយក៏ដូចជាបានបង្កើតនៅកម្មវិធីជួបជុំដែលអាចអនុញ្ញាឱ្យម្ចាស់អាជីវកម្មក្នុងស្រុកចូលរួមធ្វើការចែករំលែកនូវបទពិសោធន៍ និងឈ្វេងយល់បន្ថែមពីការធ្វើអាជីវកម្ម ។ លោកបន្តថា «ជាមួយនឹងកិច្ចខិតខំរបស់ផ្សារមូលបត្រកន្លងមក ឃើញថាមាន SMEs ច្រើនដែរបង្ហាញថាពួកគាត់ (SMEs) ចាប់អារម្មណ៍ ។ ប៉ុន្តែភាពជាក់ស្តែងយើងបានធ្វើការស៊ីជម្រៅជាមួយ SMEs តែពីរនោះទេកំពុងបំពេញនីតិវិធី ហើយពួកគាត់អាចប្តូរចិត្តបានគ្រប់ពេល នៅពេលណាយើងនៅមិនទាន់ទទួលបានពាក្យសុំពិនិត្យលទ្ធភាពនៃការចុះបញ្ជីនៅលើផ្សារមូលបត្រកម្ពុជា» ។ លោកអគ្គនាយកសង្កត់ធ្ងន់ថា «យើងរំពឹងថាពួកគាត់ទាំងពីរនេះអាចនឹងចាប់ផ្តើម និងបញ្ចប់នីតិវិធីនៅឆ្នាំ ២០២០នេះ ។ នៅក្នុងពេលជាមួយគ្នានេះយើងនៅធ្វើការជាមួយនិងSMEs ផ្សេងទៀត ។
កាលពីឆ្នាំ ២០១៨ មានក្រុមហ៊ុនប្រហែល ១០ ដែលទទួលបាននូវពានរង្វាន់ពីកម្មវិធីឧត្តមភាពដែលរៀបចំដោយគណៈកម្មការមូលបត្រកម្ពុជា ហើយពួកគាត់ទាំងនេះក៏មានសក្តានុពលក្នុងការចូលរួមនៅក្នុងទីផ្សារកំណើន ។ ដូចនេះយើងឃើញថាមាន SMEs មួយចំនួនដែលបង្ហាញការចាប់អារម្មណ៍ ប៉ុន្តែនៅក្នុងចំណោម SMEs ទាំងអស់នេះមួយចំនួនពួកគាត់នៅមិនទាន់ចង់មកចុះបញ្ជីឥឡូវទេ ពួកគាត់កំពុងរៀបចំខ្លួន គាត់ចង់កៀរគរទុនមួយដំណាក់កាល ឬពីរដំណាក់កាលដំបូងជាមុនសិនមុននឹងចូលផ្សារហ៊ុន» ។
បើតាមលោក ហុង សុហួរ ឱ្យដឹងទៀតថា «SMEs ដែលមិនចង់ចូលផ្សារហ៊ុនពួកគាត់នៅជួបឧបសគ្គជាច្រើន ។ SMEs ភាគច្រើននៅមិនទាន់មានស្តង់ដារគ្រប់គ្រាន់នៅឡើយ (បញ្ជីស្នាមគណនេយ្យ, អភិបាលកិច្ចសារជីវកម្ម) ។ ក្រុមហ៊ុនចូលផ្សារហ៊ុនបានទល់តែមានអភិបាលកិច្ចសារជីវកម្មស្តង់ដារ» ។
លោកស្រីឧកញ៉ា កែវ មុំ នាយិកាក្រុមហ៊ុនផលិតនំស្រួយលីលី បានឱ្យដឹងថា នៅពេលផ្សារមូលបត្រចូលមកដល់ស្រុកខ្មែរ (បង្កើតឡើង) គឺមានក្រុមហ៊ុនពាក់ព័ន្ធ និងផ្សារមូលបត្រពីរ ឬបីក្រុមហ៊ុនបានបបួលក្រុមហ៊ុនលីលី ឡើងផ្សារហ៊ុន តែត្រូវបានក្រុមហ៊ុនបដិសេធ ព្រោះតែក្រុមហ៊ុនលីលី នៅមិនទាន់យល់ច្បាស់អំពីទីផ្សារមូលបត្រនៅកម្ពុជានេះ ។
លោកស្រីឧកញ៉ា កែវ មុំ មានប្រសាសន៍ថា «មកដល់បច្ចុប្បន្ននេះនៅពេលដែលយើងបានដើរនៅខាងក្រៅប្រទេស និងធ្វើការសង្កេតមើលឃើញថាមានក្រុមហ៊ុនធំៗ គេមានការបោះផ្សាយលក់ភាគហ៊ុនបានធ្វើឱ្យក្រុមហ៊ុនគេមានការរីកចម្រើនលឿន ។ អ៊ីចឹងពេលនេះយើងកំពុងគិត និងចង់ធ្វើការបោះផ្សាយលក់ភាគហ៊ុននៅកម្ពុជាដែរ ។ សម្រាប់ក្រុមហ៊ុនខ្ញុំ ខ្ញុំគិតថា ជាក្រុមហ៊ុនមួយមានស្តង់ដារ និងមានបញ្ជីស្នាមគ្រប់យ៉ាង ។ ខ្ញុំគិតថាការដែលក្រុមហ៊ុនលីលី ចង់ចូលចុះបញ្ជីនៅក្រុមហ៊ុនផ្សារមូលបត្រកម្ពុជា វាមិនមានអ្វីជាឧបសគ្គរាំងស្ទះនោះទេ» ។
បើទោះបី SMEs ត្រឹមតែបង្ហាញចំណាប់អារម្មណ៍អស់រយៈពេលជាច្រើនឆ្នាំ តែផ្សារមូលបត្រកម្ពុជានៅមានបញ្ហាប្រឈមជាច្រើនត្រូវដោះស្រាយ។ លោកអគ្គនាយកក្រុមហ៊ុនផ្សារមូលបត្រកម្ពុជាគូសបញ្ជាក់ថា ទោះបីយើងមានសុទិដ្ឋិនិយមខ្ពស់នៅឆ្នាំ ២០២០ នេះក្តី ទីផ្សារមូលបត្រនៅកម្ពុជា នៅមានបញ្ហាប្រឈមជាច្រើនដែលត្រូវដោះស្រាយ៖ ១- ចំនួនក្រុមហ៊ុនចុះបញ្ជីក៏ដូចជាផលិតផលមូលបត្រសម្រាប់វិនិយោគនៅមានចំនួនតិចនៅឡើយ, ២- ភាពស្ទាក់ស្ទើររបស់ក្រុមហ៊ុនស្តង់ដារដំៗក្នុងការបោះផ្សាយលក់ភាគហ៊ុន, ៣- ក្រុមហ៊ុនមួយចំនួនធំមិនទាន់អាចធ្វើការបោះផ្សាយលក់មូលបត្របានដោយសារ មិនអាច ឬមិនចង់បង្ហាញតម្លាភាព បញ្ជីស្នាមគណនេយ្យ និងបង់ពន្ធត្រឹមត្រូវ, ៤- ការយល់ដឹងពីការវិនិយោគ និងជួញដូរមូលបត្រនៅមានកម្រិត, ៥- ធនធានមនុស្សមានគុណភាពបម្រើការនៅក្នុងវិស័យមូលបត្រនៅមានកម្រិត, ៦- ផ្សារមូលបត្រកម្ពុជាបានកកើតឡើងស្របពេលដែលពិភពលោកកំពុងជួបវិបត្តិសេដ្ឋកិច្ចដែលនេះជាកត្តាធ្វើឱ្យ អាជ្ញាធរ វិស័យឯកជន និងស្ថាប័នពាក់ព័ន្ធទាំងអស់មានការរារែកក្នុងការបើកទូលាយ និងចូលរួមឱ្យបានពេញលេញ ជាមួយនឹងទីផ្សារថ្មីនិងដ៏ក្មេងខ្ចីមួយនេះ ។
ទន្ទឹមនឹងបញ្ហាប្រឈមត្រូវបានបង្ហាញសម្រាប់យុទ្ធសាស្ត្របន្ទាប់ក៏ត្រូវបានដាក់ចេញដើម្បីបង្កើនប្រសិទ្ធិភាពចាប់ពីឆ្នាំ ២០២០ ជូនដល់វិនិយោគិនផងដែរ ។ លោកលើកឡើងថា នៅ២០២០ នេះក្រុមហ៊ុនផ្សារមូលបត្រកម្ពុជាបានដាក់ចេញនូវយុត្តិសាស្ត្រ៖ ១- ខិតខំនាំយកក្រុមហ៊ុនមានសក្តានុពល និងមានតម្លាភាព ជាពិសេសស្ថាប័នហិរញ្ញវត្ថុមកចុះបញ្ជីក្នុងផ្សារមូលបត្រកម្ពុជា, ២- បន្តបង្កើតថ្មី និងពង្រីកនូវបណ្តាញវិនិយោគិនទាំងក្នុងស្រុក និងក្រៅស្រុកឱ្យមានភាពកាន់តែទូលំទូលាយដើម្បីគាំំទ្រដល់សកម្មភាពជួញដូរ និងបង្កើនសន្ទនីភាពដល់ទីផ្សារ, ៣- បន្តជំរុញ និងពង្រឹងនូវកិច្ចសហប្រតិបត្តិការគ្រប់ជ្រុងជ្រោយ រវាងផ្សារមូលបត្រ និងដៃគូស្ថាប័នពាក់ព័ន្ធទាំងអស់ក្នុងវិស័យមូលបត្រ, ៤- បន្តលើកកម្ពស់ការយល់ដឹងរបស់មហាជនទូទៅអំពីការវិនិយោគក្នុងវិស័យមូលបត្រដើម្បីបង្កើតបាននូវបរិយាកាសវិនិយោគប្រកបដោយប្រសិទ្ធភាព តម្លាភាព និងកាត់បន្ថយហានិភ័យនានា,
៥- បន្តពង្រីកវិសាលភាពនៃការផ្សព្វផ្សាយព័ត៌មានអំពីទីផ្សារ និងទិន្នន័យជួញដូរទៅកាន់សាធារណជនតាមរយៈប្រព័ន្ធផ្សព្វផ្សាយ និងបណ្តញផ្តល់ព័ត៌មាននានាទាំងក្នុង និងក្រៅស្រុក, ៦- សម្រួល និងកាត់បន្ថយនូវនីតិវិធីនានាដើម្បីពន្លឿនការចុះបញ្ជីក៏ដូចជាប្រតិបត្តិការជួញដូរមូលបត្ររបស់វិនិយោគិនឱ្យកាន់តែមាភាពងាយស្រួល និងឆាប់រហ័សជាងមុនៗ, ៧- បន្តពង្រឹងនូវទំនើបកម្មប្រព័ន្ធបច្ចេកវិទ្យាទាំងផ្នែកជួញដូរមូលបត្រ ផាត់ទាត់ និងទូទាត់មូលបត្រ និងរក្សាទុកមូលបត្ររបស់ផ្សារមូលបត្រកម្ពុជាឱ្យមានភាពកាន់តែប្រសើរជាងមុន និង ៨- បន្តពង្រឹង និងបណ្តុះបណ្តាលបន្ថែមធនធានមនុស្សក្នុងវិស័យនេះឱ្យស្របទៅនឹងតម្រូវការទីផ្សារបច្ចុប្បន្ន និងនាពេលអនាគតដែលកំពុងរីកដុះដាលខ្លាំង ៕ កែសម្រួលដោយ ៖សុឃាក់
ចែករំលែកព័តមាននេះ