រាជធានីភ្នំពេញ ៖ កិច្ចប្រជុំប្រចាំឆ្នាំលើកទី២៨ របស់វេទិកាសភាអាស៊ី-ប៉ាស៊ីហ្វិក ដែលហៅកាត់ (APPF) ដែលសភាប្រទេសអូស្ត្រាលីធ្វើជាម្ចាស់ផ្ទះបានបិទបញ្ចប់នៅរសៀលថ្ងៃទី១៥ ខែមករានេះ បន្ទាប់ពីបានដំណើរការកិច្ចប្រជុំអស់រយៈពេល៣ថ្ងៃមកនោះ ។
សម្តេច ហេង សំរិន ប្រធានរដ្ឋសភា និងប្រធានប្រតិភូសមាជិក APPF បានអញ្ជើញចុះហត្ថលេខាលើលទ្ធផលកិច្ចប្រជុំរយៈពេលបីថ្ងៃមកនេះ ។ កិច្ចប្រជុំ APPF លើកទី២៨ ក្រោមមូលបទ «ភាពជាដៃគូសភាសម្រាប់ឆ្នាំ២០២០ និងឆ្នាំបន្តបន្ទាប់» បានសម្រេចសេចក្តីសម្រេចចំនួន១៧ ក្នុងការជំរុញលើកកម្ពស់កិច្ចសហប្រតិបត្តិការសភា ដើម្បីរួមចំណែកដោះស្រាយបញ្ហារួមរបស់ប្រជាពលរដ្ឋនៅក្នុងវិស័យសន្តិសុខ សេដ្ឋកិច្ច សង្គម បរិស្ថាន និងសមភាពយេនឌ័រ ក្នុងការធានាឲ្យមានការអភិវឌ្ឍន៍ប្រកបដោយចីរភាព នៅក្នុងតំបន់ និងសកលលោក ។
កិច្ចប្រជុំប្រចាំឆ្នាំលើកទី២៩ របស់ APPF នៅក្នុងឆ្នាំ២០២១ សភាសាធារណរដ្ឋកូរ៉េនឹងទទួលធ្វើជាម្ចាស់ផ្ទះ ។ មុនប្រកាសបិទកិច្ចប្រជុំ លោក តូនី ស្មីត ប្រធានរដ្ឋសភាអូស្ត្រាលីបានប្រគល់ទង់ APPF ដល់ប្រធានគណៈប្រតិភូសភាសាធារណរដ្ឋកូរ៉េ ជានិមិត្តរូបនៃការបន្តវេនជាអ្នករៀបចំកិច្ចប្រជុំបន្ត ។
សូមជម្រាបថា វេទិកាសភាអាស៊ី-ប៉ាស៊ីហ្វិក «The Asia Pacific Parliamentary Forum» ផ្តួចផ្តើមបង្កើតឡើងដោយអតីតនាយករដ្ឋមន្ត្រីជប៉ុន ក្នុងឆ្នាំ១៩៩៣ មានគោលបំណងប្រមូលផ្តុំសភាក្នុងតំបន់អាស៊ីប៉ាស៊ីហ្វិកជួបប្រជុំប្រចាំឆ្នាំ ដើម្បីដោះស្រាយបញ្ហារួមជំរុញសុខសន្តិភាព និងការអភិវឌ្ឍប្រកបដោយចីរភាព នៅក្នុងតំបន់ និងសកលលោក ។ អង្គការសភាមួយនេះមានសមាជិក២៧ប្រទេស មានប្រទេសអូស្រា្តលីព្រះរាជាណាចក្រកម្ពុជា ចិន ជប៉ុន សាធារណរដ្ឋកូរ៉េ ម៉ុហ្គោលី សហព័ន្ធរុស្ស៊ី ឥណ្ឌូនេស៊ី ឡាវ ម៉ាឡេស៊ី ហ្វីលីពីន សឹង្ហបុរី ថៃ វៀតណាម ហ្វីជី ម៉េក្រុនេស៊ី ណូវែលហ្សឡង់ ប៉ាពូញូហ្គីនៀ ប្រជុំកោះម៉ារសល កាណាដា ឈីលី កូឡំប៊ី មិគសិគកូរ ប៉េរ៉ូ សហរដ្ឋអាមេរិក អេក្វាឌ័រ និងកូស្ការីការ ៕ កែសម្រួលដោយ ៖ សុឃាក់
ចែករំលែកព័តមាននេះ