ខេត្តកណ្តាល ៖ កម្លាំងគណៈបញ្ជាការឯកភាពស្រុកអង្គស្នួលដឹកនាំដោយលោកទីម ទី រ៉ាដេត អភិបាលរងស្រុក និងលោកទិត្យ វង្ស អធិការប៉ូលិសស្រុក បានដាក់គោលដៅត្រួតពិនិត្យអាវុធជាតិផ្ទុះ ពិនិត្យជាតិអាល់កុល មធ្យោបាយដឹកជញ្ជូន និងយានយន្តគ្រប់ប្រភេទនៅមុខសាលាស្រុកលើកំណាត់ផ្លូវជាតិលេខ៤កាលពីថ្ងៃទី២៨ មីនា ចាប់ពីម៉ោង៤រសៀលរហូតដល់ម៉ោង៨យប់។ នៅក្នុងប្រតិបត្តិការនេះ គឺកន្លែងសមត្ថកិច្ចអនុវត្តតាមផ្លូវច្បាប់ដោយពុំមានការយោគយល់ទេ ទោះបីជាមានការអន្តរាគមន៍តាមរយៈទូរស័ព្ទពីខាងណាក៏ដោយ ។
លោកទីម ទីរ៉ាដេត បានថ្លែងថា ការចុះត្រួតពិនិត្យនេះធ្វើឡើងជារៀងរាល់យប់ ដោយអនុវត្តតាមអនុសាសន៍ដ៏ថ្លៃថ្លារបស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដើម្បីសម្រួលសុវត្ថិភាពចរាចរណ៍តាមដងផ្លូវជូនប្រជាពលរដ្ឋ កាត់បន្ថយគ្រោះថ្នាក់ចរាចរណ៍បទល្មើសលួច ឆក់ប្លន់ ជាងនេះទៀតត្រួតពិនិត្យរថយន្តដែលចាស់ៗផងដែរ។ មន្ត្រីសមត្ថកិច្ចបានឱ្យដឹងថា ការចុះត្រួតពិនិត្យរាល់លើកឈឺក្បាលខ្លាំងណាស់ ដោយសារតែចាប់ប៉ះចំរថយន្តដែលថៅកែជាឧកញ៉ា ឬឧត្តមសេនីយ៍ហើយទូរស័ព្ទសុំអន្តរាគមន៍ដោយមិនចេះខ្មាសអៀន ខុសពីប្រជាពលរដ្ឋធម្មតាដែលឱ្យសមត្ថកិច្ចផាកពិន័យតាមផ្លូវច្បាប់។ ជាពិសេសរថយន្តដឹកទំនិញធំៗតែម្តង មិនត្រឹមតែថៅកែដែលជាឧកញ៉ា ឬពាក់ផ្កាយប៉ុណ្ណោះទេ ដែលអន្តរាគមន៍នោះ សូម្បីតែអ្នកបើកបរ និងព្រូក៏មានចរិតក្រអឺតក្រទមដែរ។
ប្រភពដដែលបានបន្តថា ទោះបីជាបែបណាការអន្តរាគមន៍នោះមិនត្រូវបានយោគយល់អធ្យាស្រ័យទេ កងកម្លាំងទាំងអស់បានធ្វើការផាកពិន័យទៅតាមផ្លូវច្បាប់ឱ្យទាល់តែបានទើបអនុញ្ញាតឱ្យទៅ ព្រោះរថយន្តទាំងនោះផ្ទុកលើសកំណត់ខ្លះអត់ស្លាកលេខក្រោយ អ្នកបើកបរ អត់ពាក់ខ្សែក្រវាត់ជាដើម។ ក្នុងសកម្មភាពនេះ គឺកងកម្លាំងទាំងអស់អត់មានការភ័យខ្លាចអ្វីឡើយ ព្រោះនេះគឺជាការអនុវត្តតាមអនុសាសន៍របស់សម្តេចតេជោ និងដើម្បីសុវត្ថិភាពសង្គមតែប៉ុណ្ណោះ ហើយនៅក្នុងយុទ្ធនាការរយៈពេល៤ម៉ោងនេះកម្លាំងគណៈបញ្ជាការឯកភាពស្រុកធ្វើតេស្តជាតិស្រវឹងអ្នកបើកបររថយន្តបានចំនួន១២០នាក់ អ្នកជិះម៉ូតូ៨០នាក់ ប៉ុន្តែរកឃើញអ្នកមានជាតិអាល់កុលដល់កំរិតផាកពិន័យតែមួយនាក់ប៉ុណ្ណោះ។ ក្រៅពីនេះ ផាកពិន័យអ្នកជិះម៉ូតូអត់កញ្ចក់មើលក្រោយ៤នាក់អត់ពាក់មួកសុវត្ថិភាព៣នាក់ រថយន្តដឹកសំពីងសំពោង៥គ្រឿង និងអ្នកបើកបរអត់ពាក់ខ្សែក្រវាត់៩នាក់ ៕
ចែករំលែកព័តមាននេះ