រាជធានីភ្នំពេញ ៖ ស្របពេលដែលវិស័យសំណង់កំពុងមានការរីកចម្រើន ត្រូវបានថ្នាក់ដឹកនាំកំពូលនៃក្រសួងរៀបចំដែនដី នគរូបនីយកម្ម និងសំណង់ គូសបញ្ជាក់ថា ច្បាប់សំណង់ដែលទើបដាក់ឱ្យអនុវត្ត ឬកំពុងជំរុញធ្វើការផ្សព្វផ្សាយទៅដល់មហាជនទូទៅនេះ នឹងផ្តល់ជំនឿទុកចិត្តទៅដល់វិនិយោគិនក្នុងវិស័យសំណង់នេះបន្ថែមទៀតនាពេលខាងមុខនេះ ខណៈថ្នាក់ដឹកនាំកំពូលបង្ហាញចេតនាយកច្បាប់ជាធំក្នុងការដឹកនាំវិស័យសំណង់ ។
លោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ មានប្រសាសន៍កាលពីថ្ងៃទី ១៤ខែមករា ឆ្នាំ ២០២០នេះថា វិស័យសំណង់នៅឆ្នាំ២០១៩ មានចំនួនរហូតទៅដល់ ១ម៉ឺន ១ពាន់លានដុល្លារសហរដ្ឋអាមេរិកស្មើនឹង ៩៨% បើប្រៀបនឹងឆ្នាំ ២០១៨ មានតែ ៥ពាន់លានដុល្លារអាមេរិកប៉ុណ្ណោះ ។ ច្បាប់សំណង់នេះចាត់ទុកថាបានផ្តល់នូវជំនឿជឿជាក់របស់រាជរដ្ឋាភិបាលដល់អ្នកវិនិយោគ បោះទុននៅក្នុងព្រះរាជាណាចក្រកម្ពុជាមានការសម្រុកច្រើន ដែលតម្រូវឱ្យច្បាប់សំណង់នេះឆ្លើយតបទៅនិងកិច្ចការដែលយើងចង់បាន ។
លោកឧបនាយករដ្ឋមន្ត្រីបញ្ជាក់ទៀតថា «ការផ្សព្វផ្សាយច្បាប់សំណង់នេះ គឺមានគោលបំណងជំរុញការផ្សព្វផ្សាយឱ្យបានទូលំទូលាយទៅដល់មហាជន ។ យើងបានធ្វើការបណ្តុះបណ្តាលគ្រូបង្គោលនៅក្នុងវិស័យសំណង់ ដើម្បីឱ្យគ្រូទាំងនេះចាត់ទុកជាឆ្អឹងខ្នងសម្រាប់ទ្រទ្រង់ក្នុងការផ្សព្វផ្សាយ និងអនុវត្តច្បាប់សំណង់» ។
លោកបន្តថា ការបណ្តុះបណ្តាលនូវច្បាប់សំណង់នេះទៅដល់រូបវន្តបុគ្គលក៏មានន័យថា ក្រុមហ៊ុនដែលទទួលបានការធ្វើអាជីវកម្មទៅលើវិស័យមួយនេះត្រូវមានការបញ្ជាក់នៅវិញ្ញាបនបត្រទទួលស្គាល់ នៅពេលដែលអត់មានវិញ្ញាបនបត្រដែលចេញដោយក្រសួង គឺគណៈកម្មការនេះនឹងចុះត្រួតពិនិត្យឃើញ នឹងមានដីការបស់ព្រះរាជអាជ្ញា និងធ្វើការកោះអញ្ចើញ ។ លោកបន្តថា «កាលពីមុនអត់មានច្បាប់ តែមកដល់បច្ចុប្បន្នមានច្បាប់ ហើយជឿជាក់ចុះថា ខ្ញុំនឹងអនុវត្តបាន យើងធ្វើដូច្នេះទើបសម្រេចបាននូវគោលបំណងនៃច្បាប់សំណង់នេះ» ។
លោកបញ្ជាក់ទៀតថា ច្បាប់សំណង់នេះត្រូវបានលើកកម្ពស់វិស័យអចលនទ្រព្យ ដែលចាត់ទុកថាវិស័យអចលនទ្រព្យ គឺជាទុន ជាសក្តានុពលសម្រាប់ជំរុញកំណើនសេដ្ឋកិច្ច និងសង្គម ។ ច្បាប់នេះក៏មានផលប្រយោជន៍ត្រួតពិនិត្យ និងបញ្ជាក់ផ្តល់ភាពស្របច្បាប់ទៅដល់បណ្តាសំណង់ដែលបានសង់រួចកាលពីអតីតកាល ជាពិសេសចាប់ពីឆ្នាំ ១៩៩៥ រហូតដល់ឆ្នាំ ២០១៦ ដែលពីមុនអនុក្រឹត្យលេខ ៤២ និង ៨៦ ធ្លាប់បានចែង ។ អ៊ីចឹងសំណង់ដែលស្ថិតក្នុងគំលាតនេះនៅពេលច្បាប់សំណង់ថ្មីនេះចេញទៅ គឺទុករយៈពេល ២ឆ្នាំ ធ្វើការចុះត្រួតពិនិត្យ និងផ្តល់វិញ្ញាបនបត្រស្របច្បាប់ថា សំណង់នេះមានលក្ខណរឹងមាំហើយអាចចេញវិញ្ញាបនបត្រស្របច្បាប់ជូនដល់ប្រជាពលរដ្ឋ ដើម្បីឱ្យគាត់ស្នាក់នៅប្រកបទៅដោយទំនុកចិត្ត ឬអាចឱ្យគាត់ដាក់ជួល បញ្ចាំដើម្បីបានចំណូលបន្ថែមជូនប្រជាពលរដ្ឋ ។
បើតាមលោកឧបនាយករដ្ឋមន្ត្រី គោលបំណងនៃច្បាប់នេះត្រូវធ្វើឱ្យមានសុវត្ថិភាព សន្តិសុខដល់ម្ចាស់សំណង់ ដល់អ្នកប្រើប្រាស់សំណង់ និងសាធារណជន ។ ធានាឱ្យការអនុវត្តច្បាប់សំណង់នេះឱ្យស្របទៅតាមផែនការនគរូបនីយកម្ម មិនមែនសំណង់សង់ខុសពីនគរូបនីយបញ្ញត្តិ ។
យោងតាមរបាយការណ៍បូកសរុបលទ្ធផលការងារឆ្នាំ ២០១៩ និងទិសដៅការងារឆ្នាំ ២០២០ របស់ក្រសួងរៀបចំដែនដី នគរូបនីយកម្ម និងសំណង់ កាលពីថ្ងៃទី ២៥ខែធ្នូ២០១៩កន្លងមកនេះបង្ហាញថា ទិន្នន័យសំណង់ទូទាំងប្រទេសមានចំនួន ៤.៤៤៦គម្រោងមានផ្ទៃក្រឡាសំណង់សរុបជាង ១៨លានម៉ែត្រការ៉េ តម្លៃប៉ា់ន់ស្មានទុនវិនិយោគប្រមាណ៩.៣៥៣.៦៩៧.៤៧៥ដុល្លារអាមេរិក បើធៀបនឹងរយៈពេលដូចគ្នាក្នុងឆ្នាំ ២០១៨ មានចំនួន ៨៦៧គម្រោង មានផ្ទៃក្រឡាសំណង់ជាង ១១លានម៉ែត្រការ៉េត ហើយមានតម្លៃប៉ាន់ស្មានទុនវិនិយោគប្រមាណ ៥.២២៨.៩៩២.៥២២ដុល្លារអាមេរិក កើនឡើង ៧៨,៨៨% ។
របាយការណ៍នេះគូសបញ្ជាក់ថា ក្នុងចំណោមគម្រោងវិនិយោគសរុបក្នុងនោះសមត្ថកិច្ចក្រសួងមានចំនួន ៤០៨គម្រោង មានផ្ទៃក្រឡាសំណង់ចំនួន ១៥ម៉ឺនម៉ែត្រការ៉េ តម្លៃប៉ាន់ស្មានទុនវិនិយោគប្រមាណ ៨.៤៣៧.០៩៥.៧២២ដុល្លារអាមេរិក បើធៀបនឹងរយៈពេលដូចគ្នាឆ្នាំ ២០១៨ មានចំនួន ២៤៥គម្រោង មានផ្ទៃក្រឡាសំណង់ជាង ១០លានម៉ែត្រការ៉េ ដែលមានតម្លៃប៉ាន់ស្មានទុនវិនិយោគប្រមាណ ៤.៨២៩.១៧៣.៨៥៤ដុល្លារអាមេរិក ពោលគឺកើនឡើង ៧៤,៧១% ។
សមត្ថកិច្ចរដ្ឋបាលរាជធានី ខេត្ត មានចំនួន ៤.០៣៨គម្រោង មានផ្ទៃក្រឡាសំណង់ចំនួនជាង ២លានម៉ែត្រការ៉េ មានតម្លៃប៉ាន់ស្មានទុនវិនិយោគប្រមាណ ៩១៦.៦០១.៧៥៣ដុល្លារអាមរិក បើធៀបនឹងរយៈពេលដូចគ្នាឆ្នាំ ២០១៨ មានចំនួន ២.៦២២គម្រោង មានផ្ទៃក្រឡាសំណង់ជាង ១លានម៉ែត្រការ៉េ ដែលមានតម្លៃប៉ាន់ស្មានទុនវិនយោគប្រមាណ ៩៩.៨១៨.៦៦៨ដុល្លារអាមេរិក ពោលគឺមានការកើនឡើងប្រមាណ ១២៩,២៥% ៕ កែសម្រួលដោយ ៖ សុឃាក់
ចែករំលែកព័តមាននេះ