ខេត្តស្ទឹងត្រែង ៖ លំនៅឋានចំនួនពីរខ្នង ក្នុងនោះមួយខ្នងត្រូវភ្លើងឆេះអស់ទាំងស្រុង រីឯមួយខ្នងផ្សេងទៀតត្រូវភ្លើងឆេះអស់ជញ្ជាំងមួយចំហៀង បន្ទាប់ពីបុរសម្នាក់ជាម្ចាស់ផ្ទះបានធ្វើសកម្មភាពដុត ត្រូវគេសង្ស័យថាផឹកស្រាស្រវឹង ។ ហេតុការណ៍ខាងលើនេះបានកើតឡើងកាលពីវេលាម៉ោង១និង៥នាទីរសៀលថ្ងៃទី១៤ មករា…
ខេត្តស្ទឹងត្រែង ៖ លំនៅឋានចំនួនពីរខ្នង ក្នុងនោះមួយខ្នងត្រូវភ្លើងឆេះអស់ទាំងស្រុង រីឯមួយខ្នងផ្សេងទៀតត្រូវភ្លើងឆេះអស់ជញ្ជាំងមួយចំហៀង បន្ទាប់ពីបុរសម្នាក់ជាម្ចាស់ផ្ទះបានធ្វើសកម្មភាពដុត ត្រូវគេសង្ស័យថាផឹកស្រាស្រវឹង ។
ហេតុការណ៍ខាងលើនេះបានកើតឡើងកាលពីវេលាម៉ោង១និង៥នាទីរសៀលថ្ងៃទី១៤ មករា ឆ្នាំ២០២០ ស្ថិតនៅភូមិកោះព្រះ ឃុំកោះព្រះ ស្រុកសៀមបូក។
តាមការអោយដឹងពីនគរបាល ប៉ុស្តិ៍រដ្ឋបាលឃុំកោះព្រះថា ករណីអគ្គីភ័យដែលបានកើតឡើងខាងលើនោះបង្កឡើងដោយឈ្មោះ ដោ រ៉ាឌី ភេទប្រុស អាយុ៥៧ឆ្នាំ ជាម្ចាស់ផ្ទះ និងជាអ្នកធ្វើសកម្មភាពដុត ។
តាមប្រភពដដែលបញ្ជាក់ថា ជនបង្កហេតុជាម្ចាស់ផ្ទះនោះញៀនស្រារហូតកើតជាជំងឺសរសៃប្រសាទ ។ ក្រោយពីផឹកស្រវឹងបាត់បង់ស្មារតី តែងតែព្យាយាមរករឿងដុតផ្ទះជាញឹកញាប់ តែត្រូវបានក្រុមគ្រួសាររាយការណ៍ប្រាប់សមត្ថកិច្ចចាប់ឃាត់យកទៅអប់រំច្រើនលើកច្រើនសារមកហើយ ។
តាមប្រភពដដែលបានបន្តថា រហូតឈប់ផឹកស្រា ជនបង្កក៏ក្លាយជាមនុស្សស្គាល់ខុសស្គាល់ត្រូវឡើងវិញ លុះមកដល់ថ្ងៃកើតហេតុនេះ ស្រាប់តែជនបង្កផឹកស្រាស្រវឹងហើយជំងឺសរសៃប្រសាទរើឡើងវិញក៏ធ្វើសកម្មភាពដុតផ្ទះឆេះខ្ទេច និងបន្តរាលដាលឆេះដល់ផ្ទះអ្នកជិតខាងអស់ជញ្ជាំងមួយចំហៀង ហើយត្រូវបានសមត្ថកិច្ចនិងប្រជាពលរដ្ឋជួយពន្លត់ ។
តាមរបាយការណ៍ប៉ុស្តិ៍នគរ បាលរដ្ឋបាលឃុំកោះព្រះស្តីពីទំហំ នៃការខូចខាតរួមមានផ្ទះមួយខ្នងទទឹង៨ម៉ែត្រនិងបណ្តោយ១០ម៉ែត្របាំងជញ្ជាំងក្តារ ក្រាលក្ដារ ប្រក់ស័ង្កសី ជាកម្មសិទ្ធិរបស់ឈ្មោះ ដោ រ៉ាឌី ត្រូវភ្លើងឆេះអស់ទាំងស្រុង ចំណែកសភារៈក្នុងផ្ទះដែលត្រូវភ្លើងឆេះរួមមានគ្រែ២, ទូដាក់ថ្នាំពេទ្យ២, ទូរទស្សន៍ ១គ្រឿង, បន្ទះសឡា, អាគុយ ១គ្រឿង, តុ១, កៅអី៤, ធុងបាស១គូ និងស្រូវ១០បាវ ។ ចំណែកផ្ទះអ្នកជិតខាងម្នាក់ទៀតឈ្មោះ សំ សុខា ត្រូវភ្លើងឆេះរាលដាលអស់ជញ្ជាំងឈើមួយចំហៀង និងពូកមួយបន្ថែមទៀត។
ក្រោយពេលកើតហេតុ សមត្ថកិច្ចនិងប្រជាពលរដ្ឋចាប់ឃាត់ខ្លួនជនសង្ស័យផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ