ខេត្តបន្ទាយមានជ័យ ៖ ម៉ូតូចម្រុះមិនមានបង្កាន់ដៃពន្ធជាង៤០គ្រឿងត្រូវបានមន្ត្រីគយចល័តការិយាល័យចុះស្រាវជ្រាវ និងបង្ក្រាបករណីរត់ពន្ធតំបន់៥នៅខេត្តបន្ទាយមានជ័យសហការជាមួយអាជ្ញាធរនិងសមត្ថកិច្ចមូលដ្ឋានដឹកនាំដោយលោកឡឹម ប៊ុនសុភ័ក្រ ព្រះរាជអាជ្ញារងអមសាលាដំបូងខេត្ត ធ្វើការបង្ក្រាបក្នុងទីតាំងទិញលក់ម៉ូតូចំនួន៥កន្លែងនៅសង្កាត់ប៉ោយប៉ែត ក្រុងប៉ោយប៉ែតកាលពីថ្ងៃទី១៤ មករា ឆ្នាំ២០២០ ។
ម៉ូតូចម្រុះទាំងនេះត្រូវមន្ត្រីជំនាញប្រាប់ថាសុទ្ធតែគ្មានបង្កាន់ដៃពន្ធ។ តាមប្រភពព័ត៌មានថា ម៉ូតូថ្មីៗមួយចំនួនត្រូវគេលួចនាំចូលពីថៃតាមច្រករបៀង ហើយត្រូវឈ្មួញដាក់លក់បែបលួចលាក់តាមទីតាំងលក់ទិញម៉ូតូជាច្រើនកន្លែងក្នុងក្រុងប៉ោយប៉ែត។
ទោះបីជាយ៉ាងណាក៏ដោយ ពេលធ្វើការសាកសួរ អាជីវករទិញលក់ម៉ូតូទាំងនេះអះអាងថា ទិញម៉ូតូពីគេយកដាក់លក់គ្រាន់បានចំណេញតិចតួចចិញ្ចឹមគ្រួសាតែប៉ុណ្ណោះ។
លោកឈួន សុភា ប្រធានការិយាល័យគយចល័តស្រាវជ្រាវបង្ក្រាបករណីរត់ពន្ធតំបន់៥ប្រាប់កោះសន្តិភាពនៅកន្លែងកើតហេតុឱ្យដឹងថា ការបង្ក្រាបថ្ងៃនេះធ្វើឡើងនៅ៥ទីតាំងក្នុងសង្កាត់ប៉ោយប៉ែត និងរកឃើញម៉ូតូចម្រុះមានថ្មីមានចាស់មិនមានបង្កាន់ដៃពន្ធជាង៤០គ្រឿង។
លោកប្រធានការិយាល័យគយចល័តបានបន្តថា ម៉ូតូទាំងនេះនឹងត្រូវនាំយកទៅការិយាល័យរបស់លោកធ្វើកំណត់ហេតុដើម្បីឲ្យម្ចាស់ចូលទៅបង់ពន្ធឲ្យបានត្រឹមត្រូវទើបប្រគល់ឲ្យវិញ ។ លោកបញ្ជាក់ថា ការបង្ក្រាបនឹងធ្វើឡើងជារឿយៗ ហើយក្នុងមួយខែៗខាងលោកដឹកនាំក្រុមការងារចុះបង្ក្រាបករណីរត់ពន្ធនេះដើម្បីរកចំណូលចូលរដ្ឋបានយ៉ាងតិចជាង១០០០លានរៀល៕ (កែសម្រួលដោយ ៖ ធីតា)
ចែករំលែកព័តមាននេះ