សហរដ្ឋអាមេរិក-ចិន ៖ សហរដ្ឋអាមេរិកដែលត្រូវចុះហត្ថលេខានាថ្ងៃទី១៥មករា លើកិច្ចព្រមព្រៀងពាណិជ្ជកម្មដំណាក់កាលទីមួយជាមួយចិននោះ លែងចាត់ទុកចិនថាជារដ្ឋក្រឡុករូបិយវត្ថុទៀតហើយ។ នេះជាការប្រកាសកាលពីថ្ងៃទី១៣មករារបស់ក្រសួងរតនាគារអាមេរិក។
ការសម្រេចដែលលាតត្រដាងមុនគេដោយទីភ្នាក់ងារព័ត៌មានអាមេរិកBLOOMBERGនោះ កើតមានខណៈដែលគណៈប្រតិភូជាន់ខ្ពស់ចិនទៅដល់ក្រុងវ៉ាស៊ិនតោន ដើម្បីចុះហត្ថលេខាលើកិច្ចព្រមព្រៀងពាណិជ្ជកម្មដំណាក់កាលទី១ សំដៅបញ្ចប់សង្គ្រាមពាណិជ្ជកម្មរវាងមហាអំណាចទាំង២ ដែលមានរយៈពេល១៨ខែមកហើយ។
ក្នុងរបាយការណ៍ប្រចាំឆមាសមួយក្រសួងរតនាគារអាមេរិកយល់ថា ចិនបានធ្វើកិច្ចសន្យាដើម្បីបញ្ឈប់រាល់ការទម្លាក់ថ្លៃប្រាក់យន់របស់ខ្លួនក្នុងការប្រកួតប្រជែង។ ក្នុងលក្ខខណ្ឌនេះចិនលែងត្រូវចាត់ទុកជាអ្នកក្រឡុករូបិយវត្ថុទៀតហើយ។ ទោះបីយ៉ាងណាក្រុងវ៉ាស៊ិនតោនយល់ថា ចិនត្រូវចាត់បណ្ដាវិធានការចាំបាច់នានា ដើម្បីចៀសវាងថាប្រាក់យន់នៅតែជាប្រាក់ដែលថោករហូត។
ព្រឹទ្ធសមាជិកគណបក្សប្រជាធិបតេយ្យលោកCHUCK SCHUMERដែលជាអ្នកប្រឆាំងនយោបាយរូបិយវត្ថុនិងពាណិជ្ជកម្មរបស់ចិន បានបរិហារចំពោះអ្វីដែលលោកចាត់ទុកជាការព្រមចុះចាញ់ របស់រដ្ឋការលោកត្រាំ។ ក្នុងសេចក្ដីប្រកាសមួយលោកបញ្ចេញប្រតិកម្មថា ចិនជាអ្នកក្រឡុកប្រាក់របស់ខ្លួន ដែលនោះជាការពិត។
គួរឲ្យសោកស្ដាយប្រធានាធិបតីត្រាំបែរជាព្រមចុះញ៉មចំពោះប្រធានាធិបតីចិន លោកស៊ីជីនពីង ជាជាងប្រកាន់យកមាគ៌ារឹងប្រឈមមុខជាមួយចិន៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ