រាជធានីភ្នំពេញ ៖ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានជំរុញក៏ដូចជាផ្តល់អនុសាសន៍ដល់បេឡាជាតិសន្តិសុខសង្គម (ប.ស.ស) បន្តធ្វើការអភិវឌ្ឍការងារឲ្យកាន់តែប្រសិទ្ធភាពបន្តទៅមុខទៀត ។ ថ្លែងក្នុងពិធីបើកសន្និបាតបូកសរុបលទ្ធផលការងារឆ្នាំ២០១៩ និងទិសដៅការងារឆ្នាំ២០២០ របស់បេឡាជាតិសន្តិសុខសង្គម…
រាជធានីភ្នំពេញ ៖ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានជំរុញក៏ដូចជាផ្តល់អនុសាសន៍ដល់បេឡាជាតិសន្តិសុខសង្គម (ប.ស.ស) បន្តធ្វើការអភិវឌ្ឍការងារឲ្យកាន់តែប្រសិទ្ធភាពបន្តទៅមុខទៀត ។ ថ្លែងក្នុងពិធីបើកសន្និបាតបូកសរុបលទ្ធផលការងារឆ្នាំ២០១៩ និងទិសដៅការងារឆ្នាំ២០២០ របស់បេឡាជាតិសន្តិសុខសង្គម (ប.ស.ស) នាព្រឹកថ្ងៃទី១៤ ខែមករានេះ នៅសណ្ឋាគារតារាអ៊ែរផត ។
លោក អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈបានផ្ដល់អនុសាសន៍ដល់បេឡាជាតិរបបសន្តិសង្គម (ប.ស.ស) ចំនួន៥ចំណុច ដើម្បីបង្កើនវឌ្ឍនភាព និងប្រសិទ្ធភាពឱ្យកាន់ខ្លាំងក្លាបន្តទៀត ។ ដែលអនុសាសន៍ទាំងនោះរួមមាន ទី១. ពង្រឹងការអនុវត្តរបបសន្តិសុខសង្គមផ្នែកហានិភ័យការងាររៀបចំពិនិត្យកែសម្រួលបទដ្ឋានគតិយុត្តមួយចំនួនឱ្យស្របទៅនឹងវិសាលភាពច្បាប់ថ្មី ។ សម្របសម្រួលដោះស្រាយបញ្ហាប្រឈមដែលកើតមានឱ្យបានទាន់ពេលវេលា ។
សហការរៀបចំផ្សព្វផ្សាយអំពីការពង្រឹងការអនុវត្តគោលនយោបាយអភិវឌ្ឍន៍វិស័យការងារ ។ បន្តផ្សព្វផ្សាយការអនុវត្តរបបសន្តិសុខសង្គម ពិសេស គឺការអប់រំអំពីវិធានការទប់ស្កាត់ហានិភ័យការងារ រួមមាន ការការពារគ្រោះថ្នាក់ក្នុងកន្លែងការងារ ការការពារសុវត្ថិភាពក្នុងពេលធ្វើដំណើរ និងការការពារសុវត្ថិភាពដទៃផ្សេងៗទៀត ។ ទី២. ពង្រឹងការអនុវត្តរបបសន្តិសុខសង្គមផ្នែកថែទាំសុខភាពដោយ រៀបចំពិនិត្យកែសម្រួលបទដ្ឋានគតិយុត្តមួយចំនួនឱ្យស្របទៅនឹងវិសាលភាពច្បាប់ថ្មី ។ បន្តចុះកិច្ចព្រមព្រៀងជាមួយមូលដ្ឋានសុខាភិបាល ។
សម្របសម្រួលដោះស្រាយបញ្ហាប្រឈមជាប្រចាំភ្លាមៗ ជាមួយមូលដ្ឋានសុខាភិបាលនិយោជក និងកម្មករនិយោជិត ។ ផ្សព្វផ្សាយគោលការណ៍អនុវត្តថ្មីៗដល់និយោជក មូលដ្ឋានសុខាភិបាល និងកម្មករនិយោជិតឱ្យបានទូលំទូលាយ និងគ្រប់រូបភាព ។ លើកកម្ពស់សេវាបង្ការសុខភាពដល់កម្មករនិយោជិត តាមរយៈការចុះផ្សព្វផ្សាយអប់រំផ្ទាល់នៅនឹងកន្លែងការងារ និងគ្រប់រូបភាព ។ ដាក់ភ្នាក់ងារសម្របសម្រួល និងបរិក្ខាអេឡិចត្រូនិកតាមមូលដ្ឋានសុខាភិបាលដែលមានកម្មករនិយោជិតទៅប្រើប្រាស់សេវាច្រើន ។ ទី ៣. ជំរុញការដាក់ឱ្យដំណើរការផ្នែកប្រាក់សោធនដោយត្រូវដាក់ឱ្យដំណើរការរបបប្រាក់សោធនក្នុងឆ្នាំ២០២០នេះ ។ ជំរុញដល់និយោជក ម្ចាស់សហគ្រាស ធ្វើការចុះបញ្ជិកា និងបង់ភាគទាន ។ ផ្តល់នូវតាវកាលិកជូនដល់សមាជិកឱ្យទាន់ពេលវេលា និងប្រកបដោយប្រសិទ្ធភាពខ្ពស់ ។
ធ្វើការផ្សព្វផ្សាយគោលការណ៍អនុវត្តថ្មីៗដល់និយោជក និងកម្មករនិយោជិតឱ្យបានទូលំទូលាយ និងគ្រប់រូបភាព ។ ទី៤. ពង្រឹងការអនុវត្តរបបសន្តិសុខសង្គមសម្រាប់មន្ត្រីសាធារណៈ អតីតមន្ត្រីរាជការ និងអតីតយុទ្ធជនត្រូវជំរុញការរៀបចំលិខិតបទដ្ឋានគតិយុត្ត ដើម្បីដាក់ឱ្យដំណើរការផ្នែកហានីភ័យការងារសម្រាប់មន្ត្រីសាធារណៈឱ្យបានក្នុងឆ្នាំ២០២០ ។ បន្តសហការជាមួយក្រសួងស្ថាប័នដែលពាក់ព័ន្ធក្នុងការធ្វើបច្ចុប្បន្នភាពមន្ត្រីសាធារណៈ អតីតមន្ត្រីរាជការ និងអតីតយុទ្ធជនជាប់ជាប្រចាំ ។ សម្របសម្រួលដោះស្រាយបញ្ហាប្រឈមជាប្រចាំភ្លាមៗ ជាមួយមូលដ្ឋានសុខាភិបាល និងធ្វើការផ្សព្វផ្សាយឱ្យបានទូលំទូលាយដល់មន្ត្រីសាធារណៈ អតីតមន្ត្រីរាជការ និងអតីតយុទ្ធជន ។
ទី៥. ការអនុវត្តការថែទាំសុខភាពតាមប្រព័ន្ធមូលនិធិសមធម៌សុខាភិបាល សម្រាប់កម្មករនិយោជិតក្រៅប្រព័ន្ធ និងការផ្តល់ប្រាក់ឧបត្ថម្ភបន្ថែមសម្រាប់កម្មករនិយោជិតជាស្ត្រីនៅពេលសម្រាលកូនក្នុងនោះ និយោជក និងកម្មករនិយោជិតនៃសេដ្ឋកិច្ចក្រៅប្រព័ន្ធត្រូវចុះឈ្មោះនៅបេឡាជាតិសន្តិសុខសង្គម ដើម្បីទទួលបានអត្ថប្រយោជន៍របបសន្តិសុខសង្គមនេះ ។ សម្របសម្រួលផ្តល់ប្រាក់ឧបត្ថម្ភបន្ថែមដល់ស្ត្រីសម្រាលកូនឱ្យបានទាន់ពេលវេលា ៕ កែសម្រួលដោយ ៖ សុឃាក់
ចែករំលែកព័តមាននេះ