ខេត្តកែប ៖ ប្រជាពលរដ្ឋបានសម្រុកវាយយកដែកលក់ នៅកន្លែងអគារបាក់រលំដែលបណ្តាលឱ្យមាន មនុស្សបាត់បង់ជីវិតជាង៣០នាក់នៅក្រុងកែប ហើយមិនយូរទេ គំនរអគារតម្លៃរាប់សែនដុល្លារ ដែល
បាក់រលំនេះនឹងត្រូវបាត់រូបរាងផងដែរ ។ នាថ្ងៃទី១៣ ខែមករា នៅកន្លែងអគារដែលបាក់រលំនេះ នៅតែមានធុំក្លិនស្អុយនៅឡើយ ក្រោយពីត្រូវភ្លៀងមួយមេកាលពីយប់ ។
ការដែលពួកគាត់នាំគ្នាសម្រុកវាយយកដែកលក់នេះ គឺបន្ទាប់ពីការបិទយុទ្ធនាការរុករកជនរងគ្រោះពីក្រោមអគារកម្ពស់៧ជាន់ ដែលបានបាក់រលំធ្វើឱ្យមនុស្ស៣៦នាក់បាត់បង់ជីវិត និងរបួស២៣នាក់ នៅភូមិកែប សង្កាត់កែប ក្រុងកែប កាលពីរសៀលថ្ងៃទី៣ ខែមករាកន្លងមក ។
ទោះបីជាបែបណា ក្រុមអ្នកភូមិរួមទាំងអ្នកស្រុកផ្សេងៗទៀត នៅតែបន្តវាយបំបែកបេតុងដើម្បីយកដែកទៅលក់ឱ្យអេតចាយដឹកជញ្ជូនបន្តទៅប្រទេសវៀតណាម ។ ស្ត្រីម្នាក់ជាអ្នកប្រមូលដែកនៅអគារបាក់រលំខាងលើនិយាយថា គាត់មកប្រមូលដែកតាមគេទេ ដំបូងគាត់អត់ទ្រាំស្ទើរតែមិនបានដោយសារតែមានក្លិនស្អុយពេក តែក្រោយមកគាត់ដូចជាស៊ាំនឹងក្លិននេះ ។ អ្នកភូមិជាច្រើននាក់នៅតែបន្តសម្រុកដណ្ដើមគ្នាកាត់យកដែកពីបំណែកបេតុងនៃអគារដែលបាក់រលំនោះ ។
នៅតាមដងផ្លូវជាប់នឹងអគារបាក់រលំនេះសម្បូរទៅដោយសំរាម ជាពិសេសគំនរថ្ម ដុំឥដ្ឋ និងសម្លៀកបំពាក់ជនរងគ្រោះនៅរាយប៉ាយលើគំនរបាក់បែក ។ ទិដ្ឋភាពបែបនេះ គឺមិនទាន់ឃើញអាជ្ញាធរមានការសម្អតានៅកន្លែងគំនរអគារបាក់បែកនោះទេ ។
ពាក់ព័ន្ធនឹងបរិស្ថាននៅគំនរបាក់បែកនេះ អ្នកយកព័ត៌មានបានទាក់ទងសាកសួរតាមទូរស័ព្ធទៅលោក អឹុម បញ្ញារិទ្ធ ប្រធានមន្ទីរបរិស្ថានខេត្តដែរ តែទូរស័ព្ទលោកគ្មានអ្នកទទួលកាលពីរសៀលថ្ងៃទី១៣ ខែមករា ។ទោះបីជាបែបណា គេឃើញមានក្រុមសាច់ញាតិជនរងគ្រោះមកពីខេត្តឆ្ងាយៗ តែងតែមកដាក់កម្រងផ្កានិងសែនថ្វាយអន្ទង ហៅព្រលឹងអ្នកដែលស្លាប់នៅក្រោមគំនរអគារបាក់រលំឱ្យទៅស្រុកកំណើតវិញ ។ ទីតាំងគំនរបែកបាក់នៃអគារនេះ មិនទាន់ត្រូវបានសម្អាតនោះទេ ខណៈម្ចាស់អគារសំណង់នេះសាលាដំបូងបានដោះលែងឱ្យនៅក្រៅឃុំ ៕
ចែករំលែកព័តមាននេះ