ខេត្តមណ្ឌលគិរី ៖ បទល្មើសព្រៃឈើចំនួន៤ករណីត្រូវបានសមត្ថកិច្ចបង្ក្រាបបានត្រឹមរយៈពេល២ថ្ងៃ ចាប់ពីថ្ងៃទី១១និងថ្ងៃទី១២ ខែមករា ឆ្នាំ២០២០ ឃាត់ខ្លួនមនុស្ស២នាក់ រួមនឹងវត្ថុតាងមួយចំនួនធំ។ មេបញ្ជាការមូលដ្ឋានអាវុធហត្ថស្រុកកែវសីមា លោក…
ខេត្តមណ្ឌលគិរី ៖ បទល្មើសព្រៃឈើចំនួន៤ករណីត្រូវបានសមត្ថកិច្ចបង្ក្រាបបានត្រឹមរយៈពេល២ថ្ងៃ ចាប់ពីថ្ងៃទី១១និងថ្ងៃទី១២ ខែមករា ឆ្នាំ២០២០ ឃាត់ខ្លួនមនុស្ស២នាក់ រួមនឹងវត្ថុតាងមួយចំនួនធំ។
មេបញ្ជាការមូលដ្ឋានអាវុធហត្ថស្រុកកែវសីមា លោក ប៉ៃ លិន ឱ្យដឹងថា ករណីទី១-កាលពីវេលាម៉ោង៨និង១៥នាទីយប់ថ្ងៃទី១១ មករា ឆ្នាំ២០២០ នៅចំណុចភូមិពូគង់(ជិតអង់តែនប៊ិញភឿក១) ឃុំស្រែព្រះ ស្រកកែវសីមា ខេត្តមណ្ឌលគីរី កម្លាំងកងរាជអាវុធហត្ថស្រុក បានសហការជាមួយគណៈបញ្ជាការឯកភាពស្រុក បានល្បាតឃើញម៉ូតូកែច្នៃ១គ្រឿងដឹកឈើចំនួន២ដុំ(សុក្រំ) ចំណែកមនុស្សរត់គេចខ្លួនបាត់។
ករណីទី២-កាលពីវេលាម៉ោង១និ១៧នាទីរសៀលថ្ងៃទី១២ មករា ឆ្នាំ២០២០ នៅចំណុចភូមិឃុំដដែល ល្បាតឃើញម៉ូតូកែច្នៃ១គ្រឿង ឈើចំនួន២សន្លឹក(សុក្រំ) ចំណែកមនុស្សបានរត់គេចខ្លួនបាត់ ។ បច្ចុប្បន្ន វត្ថុតាងបានប្រគល់ជូនជំនាញផ្នែករដ្ឋបាលព្រៃឈើកែវសីមា។
ករណីទី៣-កាលពីវេលាម៉ោង៤នឹង១០នាទីរសៀលថ្ងៃទី១២ មករា ឆ្នាំ២០២០ នៅចំណុចភូមិអូរអាម ឃុំស្រែខ្ទុម ស្រុកកែវសីមា ខេត្តមណ្ឌលគិរី កម្លាំងអាវុធហត្ថស្រុកបានឃាត់រថយន្តកាមរីហើមកែច្នៃ១គ្រឿង ម៉ូតូ១គ្រឿង ឈើឃ្លុំចំនួន២ដុំ(សុក្រំ) និងឃាត់ខ្លួនមនុស្ស២នាក់ ។ រថយន្តកាមរីហើមបានដឹកឈើចំនួន១១ដុំចេញតាមផ្លូវស្រុកចាស់ បែកកង់ក្រោយទាំងពីររួចទាញឈើទំលាក់រួចសាងទៅរថយន្តផ្សេងអស់សល់២ដុំ ទើបកម្លាំងក៏ទៅដល់។
ចំណែកករណីទី៤-កាលពីវេលាម៉ោង៥ល្ងាចថ្ងៃទី១២ មករា ឆ្នាំ២០២០ នៅក្នុងផ្ទះសំណាក់ល្ងាចនឹក ស្ថិតនៅភូមិឡាប៉ាខេ ឃុំស្រែខ្ទុម ស្រុកកែវសីមា ខេត្តមណ្ឌលគិរី កម្លាំងអាវុធហត្ថស្រុក-ខេត្តសហការជាមួយកម្លាំងគណៈបញ្ជាការឯកភាពស្រុកកែវសីមា បានឃាត់រថយន្ត១គ្រឿង ម៉ាកហាយឡែនឌ័រ ពណ៌ខ្មៅ ពាក់ស្លាកលេខ ភ្នំពេញ ២B-៧៣៦៩ ដឹកទ្វារបង្អួច(សុក្រំ)ចំនួន១២វង់ ចំណែកម្ចាស់បានរត់គេចខ្លួនបាត់៕ (កែសម្រួលដោយ ៖ ធីតា)
ចែករំលែកព័តមាននេះ