រាជធានីភ្នំពេញ ៖ តុលាការសាលាដំបូងរាជធានីភ្នំពេញ បានសម្រេចឲ្យសាធារណជនចូលស្តាប់សវនាការលើសំណុំរឿងលោក កឹម សុខា ចំនួនប្រមាណជាង៣០នាក់ប៉ុណ្ណោះ នៅថ្ងៃទី១៥ ខែមករា ឆ្នាំ២០២០ ខាងមុខនេះ។
នេះបើយោងតាមសេចក្តីជូនដំណឹងរបស់តុលាការបានឲ្យដឹងយ៉ាងដូច្នេះថា សាលាដំបូងរាជធានីភ្នំពេញ បានសូមជម្រាបជូនសាធារណជន ជាតិ និងអន្តរជាតិឱ្យបានជ្រាបថា នៅថ្ងៃទី១៥ ខែមករា ឆ្នាំ២០១០ វេលាម៉ោង ០៨ និង៣០នាទីព្រឹក សាលាដំបូងរាជធានីភ្នំពេញ នឹងបើកសវនាការជាសាធារណៈនៅសាលសវនាការទី១ ដើម្បីជំនុំជម្រះលើសំណុំរឿងព្រហ្មទណ្ឌ លេខ៤៧៧៧ ចុះថ្ងៃទី០៣ ខែធ្នូ ឆ្នាំ២០១៩ ដែលមានជនជាប់ចោទឈ្មោះ កឹម សុខា ភេទប្រុស សញ្ជាតិខ្មែរ កើតថ្ងៃទី២៧ ខែមិថុនា ឆ្នាំ១៩៥៣ ជាប់ចោទពីបទសន្និដ្ឋិភាពជាមួយបរទេស តាមមាត្រា៤៤៣ នៃក្រម ព្រហ្មទណ្ឌ។
តុលាការបានបញ្ជាក់ថា «ដោយហេតុថា សាលសវនាការនេះ អាចទទួលសាធារណជនចូលរួមស្តាប់បានត្រឹមចំនួនប្រមាណជាង ៣០ នាក់ តែប៉ុណ្ណោះ ហើយដើម្បីឱ្យដំណើរការ សវនាការប្រព្រឹត្តិទៅបានរលូន ធានាបាននូវសន្តិសុខសណ្តាប់ធ្នាប់ និងរបៀបរៀបរយល្អ ប្រសើរនោះ សាធារណជនដែលមានបំណងចូលរួមស្តាប់សវនាការនេះ អញ្ជើញមកទំនាក់ទំនងជាមួយលេខាធិការដ្ឋានរដ្ឋបាល នៃសាលាដំបូងរាជធានីភ្នំពេញ ដើម្បីចុះឈ្មោះ និងទទួលយកប័ណ្ណចូលរួម ចាប់ពីថ្ងៃទី១០ ដល់ថ្ងៃទី១៤ ខែមករា ឆ្នាំ២០២០ ត្រឹមវេលាម៉ោង១១ និង៣០នាទីព្រឹក»។
សូមជម្រាបថា ពាក់ព័ន្ធនឹងសំណុំរឿងរបស់លោក កឹម សុខានេះ ត្រូវបានមេធាវីលោក ធ្លាប់បានឲ្យដឹងថា ក្រុមមេធាវីលោកបានត្រៀមខ្លួនរួចជាស្រេចហើយ ក្នុងតតាំងក្តីលើសំណុំរឿងនេះ។ លោកមេធាវី ក៏ដូចជាសហមេធាវីផ្សេងទៀត នៅតែទទូចឲ្យមានការទម្លាក់បទ ចោទប្រកាន់ចំពោះលោក កឹម សុខា ដដែល។ ជាមួយគ្នានោះដែរ លោកមេធាវីបានអះអាងថា ចំពោះសំណុំរឿងលោកកឹម សុខា ជារឿងរបស់អ្នកនយោបាយតែប៉ុណ្ណោះ។
សូមជម្រាបថា លោកកឹម សុខា ត្រូវបានសមត្ថកិច្ចចាប់ខ្លួនទាំងកណ្តាលអធ្រាត្រឈានចូលថ្ងៃទី៣ ខែកញ្ញា ឆ្នាំ២០១៧ ។ ក្រោយពីជាប់ពន្ធនាគាអស់រយៈពេលជាង១ឆ្នាំនៅពន្ធនាគារត្រពាំងថ្លុង ។ ប៉ុន្តែកាលពីថ្ងៃទី១០ ខែវិច្ឆិកា ឆ្នាំ២០១៩ សាលាដំបូងរាជធានីភ្នំពេញសម្រេចឲ្យលោក កឹម សុខា នៅគេហដ្ឋានរបស់លោកវិញ ប៉ុន្តែមិនឲ្យធ្វើសកម្មភាពទាក់ទងនឹងនយោបាយ។
តុលាការបានអះអាងថា ការសម្រេចឲ្យនៅគេហដ្ឋានវិញ ដោយសារតែលោក កឹម សុខា បានគោរពត្រឹមត្រូវតាមកាតព្វកិច្ចនៃការដាក់ឱ្យ ស្ថិតក្រោមការត្រួតពិនិត្យតាមផ្លូវតុលាការ និងមានកិច្ចសហការល្អក្នុងដំណើរការនីតិវិធីរបស់តុលាការ។ កាតព្វកិច្ចនៃការត្រួតពិនិត្យតាមផ្លូវតុលាការថ្មីដែលលោក កឹម សុខា ត្រូវអនុវត្តចាប់ពីពេលនេះ មានបីចំណុច គឺ ទី១.មិនត្រូវចេញក្រៅព្រំប្រទល់ដែនដីនៃព្រះរាជាណាចក្រកម្ពុជា, ទី២.មិនត្រូវធ្វើសកម្មភាពនយោបាយ និងទី៣.ត្រូវឆ្លើយតបនឹងការកោះហៅពីគ្រប់សមត្ថកិច្ច៕ (កែសម្រួលដោយ ៖ បុប្ផា)
ចែករំលែកព័តមាននេះ