កាលពីវេលាម៉ោង១០ព្រឹក ថ្ងៃទី២ សីហា ឆ្នាំ២០១០ កន្លងទៅថ្មីៗនេះ សាលាឧទ្ធរណ៍ក្នុង ស្រុកដេត ខេត្ដអ៊ូប៊ុន ប្រទេសសៀម បានបើក សវនាការកាត់ទោសជនជាតិខ្មែរចំនួន១៦នាក់ ដែលត្រូវបានទាហានឈុតខ្មៅ និងឈុតប៉ារ៉ាសៀមធ្វើការចាប់ខ្លួន កាលពីថ្ងៃទី២៣ កក្កដា ឆ្នាំ២០០៩ នៅលើកំពូលភ្នំដងរែកចំណុចកំពស់ ៧៦០ភាគខាងកើតច្រកអានសេះ ដោយបាន ចោទប្រកាន់ថា ខ្មែរទាំង១៦នាក់ខាងលើ បាន ចូលទៅកាប់ឈើប្រណីតនៅក្នុងទឹកដីរបស់ គេខុសច្បាប់ ។
ជនជាតិខ្មែរទាំង១៦នាក់ខាងលើ ចាប់តាំង ពីសៀមចាប់ខ្លួនមកដល់ថ្ងៃនេះ ត្រូវបានតុលា ការសៀមកាត់ទោសចំនួន២លើករួចមកហើយ គិតទាំងពេលនេះផង។ លើកទី១នៅថ្ងៃទី២៣ កញា ឆ្នាំ២០០៩ បានកាត់ទោសនៅសាលា ដំបូងស្រុកដេត ខេត្ដអ៊ូប៊ុន ហើយត្រូវបានតុលា ការសៀមដាក់ទោសជាទម្ងន់ទៀតផង ដែល ក្នុងចំណោមអ្នកទោសទាំង១៦នាក់ មានម្នាក់ ជាអនីតិជនត្រូវបានកាត់ទោសជាប់ពន្ធនាគារ ១៦ឆ្នាំ៩ខែ និង១៥នាក់ទៀតម្នាក់ៗ ១០ឆ្នាំ២ ខែ គិតពីថ្ងៃចាប់ខ្លួន។ នៅពេលថ្មីៗនេះសាលា ឧទ្ធរណ៍បានធ្វើការជំនុំជម្រះជាថ្មីម្ដងទៀត នៅ ក្នុងខេត្ដអ៊ូប៊ុន ដែលមានការចូលរួមពីមន្ដ្រីស្ថាន កុងស៊ុលខ្មែរប្រចាំប្រទេសសៀមចំនួនពីររូប និង មន្ដ្រីយោធាទំនាក់ទំនងព្រំដែនខ្មែរ-សៀមចំនួន ពីររូបផងដែរ ។
ការកាត់ក្ដីនៅពេលនេះ តាម ព័ត៌មានបានឱ្យដឹងថា អ្នកទោសខ្មែរទាំង១៦ នាក់ មិនបានរួចខ្លួនដដែល ប៉ុន្ដែតាមប្រភពចេញ ពីការកាត់ទោសលើកនេះ ហាក់បីដូចជាមាន ភាពធូរស្រាលជាងលើកមុនបន្ដិច ។ សំរាប់អ្នក ទោសជាអនីតិជនម្នាក់សំរេចដាក់ពន្ធនាគារ៣ ឆ្នាំ២ខែ និង១៥នាក់ទៀត ម្នាក់ៗ៤ឆ្នាំ៩ខែ គិត ចាប់ពីថ្ងៃចាប់ខ្លួន ។ លោកវរសេនីយ៍ឯក ឮ ចន្ទតារា មន្ដ្រី យោធាទំនាក់ទំនងព្រំដែនខ្មែរ-សៀមនៅច្រក អានសេះ ដែលបានទៅចូលរួមដោយផ្ទាល់ក្នុង ការកាត់ទោសនេះបានឱ្យដឹងថា ជនជាតិខ្មែរ ចំនួន១៦នាក់ ដែលជាប់គុកនៅប្រទេសសៀម អស់រយៈពេលជាង១ឆ្នាំកន្លងមកនេះ ត្រូវបាន តុលាការសៀមធ្វើការកាត់ទោសចំនួនពីរលើក មកហើយគិតទាំងលើកនេះផង ។
កាត់ទោស លើកមុន សៀមមិនបានសំរាលទោសឱ្យទេ ទើបតែលើកក្រោយនេះ តុលាការសៀមបាន សំរាលទោសដល់ជនជាតិខ្មែរទាំង១៦នាក់ ដោយក្នុងនោះមានម្នាក់ឈ្មោះសាន ក្រុះ ជា អនីតិជនមានអាយុក្រោម១៨ឆ្នាំ។ ដោយឡែកអ្នកទោស១៥នាក់ទៀត ១-ឈ្មោះសឿន សារី ២-ឈ្មោះពៅ បញា ៣- ឈ្មោះពាន់ ម៉ឺន ៤-ឈ្មោះណៃ ឃុន ៥-ឈ្មោះ មិន ផែន ៦-ឈ្មោះទេព ដារ៉ា ៧-ឈ្មោះ ហេង រ៉ា ៨-ឈ្មោះខាន់ សុខ ៩-ឈ្មោះ ឃុន ខេន ១០-ឈ្មោះណាំ ផាត ១១-ឈ្មោះកន កឺ ១២-ឈ្មោះអ៊ុង សំអុល ១៣-ឈ្មោះវង់ វណ្ណៈ ១៤- ឈ្មោះផៃ ផននិង១៥-ឈ្មោះឈឿម ស៊ីណាន។
ជុំវិញការកាត់ទោសជនជាតិខ្មែរ១៦នាក់ ខាងលើ លោកវរសេនីយ៍ឯក ឮ ចន្ទតារា មន្ដ្រី យោធាទំនាក់ទំនងព្រំដែនខ្មែរ-សៀមប្រចាំ ច្រកអានសេះ បានបញ្ជាក់ឱ្យដឹងទៀតថា តាម សំដីរបស់មន្ដ្រីតុលាការសៀមនៅពេលនោះបាននិយាយថា ទណ្ឌិតខ្មែរទាំង១៦នាក់ខាងលើ នៅ ពេលណាដែលមិនទាន់មានលិខិតស្នើសុំលើក លែងទោស ពីអភិបាលខេត្ដព្រះវិហារខ្មែរ សុំ ដោះលែងទេ ពួកគេត្រូវជាប់ឃុំបន្ដ ។ ល្គឹកណា មានការស្នើពីអាជ្ញាធរកម្ពុជា ទើបតុលាការ សៀមនឹងធ្វើការលើកលែងទោសតែម្ដង តែ ពេលនេះពួកគេនៅមិនទាន់ដោះលែងបានទេ ។ មន្ដ្រីតុលាការសៀមថា បើជាជនជាតិរបស់គេ គឺទុកឱ្យនៅក្នុងពន្ធនាគារប៉ុន្មានឆ្នាំ ក្នុងប្រទេស គេក៏បានដែរ តែដោយឡែកជនជាតិខ្មែរ ពួកគេ តម្រូវឱ្យមានលិខិតស្នើសុំ ទើបតុលាការដោះ លែងតាមសេចក្ដីស្នើសុំ ។
បច្ចុប្បន្នជនជាប់ចោទខ្មែរទាំង១៦នាក់ កំពុងជាប់ឃុំខ្លួនក្នុងពន្ធនាគារ ខេត្ដអ៊ូប៊ុន ប្រទេសសៀម ។ អ្នកទោសជនជាតិខ្មែរ ទាំង ១៦នាក់ខាងលើ បានលួចផ្ញើលិខិតជាច្រើនលើក មកហើយដែរ ដើម្បីឱ្យក្រុមគ្រួសារ និងលោក អភិបាលស្រុកជាំក្សាន្ដបានដឹងអំពីសុខទុក្ខរបស់ ពួកគេ ដែលកំពុងជួបនឹងបញ្ហាសុខភាពយ៉ាង ធ្ងន់ធ្ងរដោយសារការហូបចុកនិងការស្នាក់នៅ បច្ចុប្បន្ន ។ រាងកាយពួកគេទាំងអស់គ្នាកំពុង តែមានស្ថានភាពហើមទាមទារនូវការព្យាបាល។
លោកអភិបាលខេត្ដអ៊ុំ ម៉ារ៉ា បានមានប្រសាសន៍នារសៀលថ្ងៃទី៦ សីហា ថា បញ្ហា ដែលលេចឮថា ខាងសៀមឱ្យអាជ្ញាធរខេត្ដធ្វើ លិខិតសុំដោះលែងនោះ លោកមិនមានការយល់ ទាស់ទេ តែមកទល់ម៉ោងនេះមិនទាន់មានឯក សារណាមួយបញ្ជាក់ច្បាស់លាស់នៅឡើយ ទាំង មន្ដ្រីទំនាក់ទំនងព្រំដែន ទាំងពីខាងភាគីសៀម ផងដែរ ។ លោកអភិបាលខេត្ដមានប្រសាសន៍ ថា លោកកំពុងឱ្យមន្ដ្រីច្រកទ្វារទំនាក់ទំនងទៅ ភាគីសៀមឱ្យបានច្បាស់សិន បើពិតប្រាកដ បែបណាលោកនឹងធ្វើលិខិតសុំយោបល់ពីក្រសួង មហាផ្ទៃ ដើម្បីឈានទៅធ្វើសំណើជាផ្លូវការ៕
ចែករំលែកព័តមាននេះ