រាជធានីភ្នំពេញ ៖ មន្ត្រីនគរបាលនៃអង្គភាពពន្លត់អគ្គិភ័យរាជធានីភ្នំពេញបានឱ្យដឹងថា បច្ចុប្បន្ននេះក្បាលបូមទឹកដែលដាក់នៅតាមទីសាធារណៈ ក្នុងរាជធានីភ្នំពេញ សម្រាប់រថយន្តពន្លត់អគ្គិភ័យចូលទៅបូមម្តងៗដើម្បីយកទៅពន្លត់ ពេលមានគ្រោះអគ្គិភ័យកើតឡើង មានចំនួន៩៦ទីតាំង តែនៅឆ្ងាយពីគ្នា ដែលទាមទារឱ្យដាក់បន្ថែមឱ្យបានច្រើនជាងនេះ ដើម្បីបង្កលក្ខណៈងាយស្រួល និងជួយសង្គ្រោះឱ្យបានទាន់ពេល ។
លោក ព្រហ្ម យ៉ត ប្រធានអង្គភាពនគរបាលបង្ការ និងពន្លត់អគ្គិភ័យ រាជធានីភ្នំពេញ បានឱ្យកោះសន្តិភាពដឹងថា បច្ចុប្បន្ននេះអង្គភាពរបស់លោកមានចំនួន១៦៥នាក់ រាប់ទាំងបុគ្គលិកជាប់កិច្ចសន្យាផង ។ មានរថយន្តពន្លត់អគ្គិភ័យចំនួន២២គ្រឿង ដោយបានបែងចែក និងត្រៀមប្រចាំការ២៤ម៉ោងលើ២៤ម៉ោង ដើម្បីចាំអន្តរាគមន៍គ្រោះអគ្គិភ័យ ដែលអាចនឹងកើតមានឡើងជាយថាហេតុក្នុងរាជធានី ។
លោកបន្តថា រាល់ថ្ងៃនេះនៅពេលមានអគ្គិភ័យកើតឡើងម្តងៗ ទាំងរថយន្តពន្លត់អគ្គិភ័យ និងក្រុមការងារបានខ្នះខ្នែង និងរួសរាន់ទៅដល់កន្លែងកើតហេតុភ្លាមៗតែម្តង ប៉ុន្តែនៅមានបញ្ហាមួយចំនួនដែលត្រូវសំណូមពរ ដូចជាក្បាលបូមទឹកដែលដាក់ពង្រាយ នៅតាមទីសាធារណៈ សម្រាប់បូមទឹក ចូលក្នុងរថយន្តពន្លត់អគ្គិភ័យ ដើម្បីបន្តយកទៅបាញ់ពន្លត់គ្រោះអគ្គិភ័យនានានោះ មានតែចំនួន៩៦ទីតាំងប៉ុណ្ណោះ គឺមិនអាចគ្របដណ្តប់ទូទាំងរាជធានីភ្នំពេញបានឡើយ ដែលទាមទារឱ្យមានការសាងសង់បន្ថែមឱ្យបានកាន់តែច្រើនកាន់តែល្អ ។
លោក ព្រំ យ៉ត បានឱ្យដឹងទៀតថា អង្គភាព មានរថយន្តពន្លត់អគ្គិភ័យចំនួន២២គ្រឿង ដែលមានចំណុះដាក់ទឹកបានចាប់ពី១៥០០លីត្រដល់២ម៉ឺនលីត្រ ហើយនៅពេលក្រុមការងារចូលទៅបូមទឹកតាមរយៈក្បាលបូមទឹក ដែលដាក់ពង្រាយនៅតាមទីសាធារណៈនោះ មានការយឺតយ៉ាវខ្លះ ដោយសារទឹកខ្សោយ ម្យ៉ាងទៀតក្បាលបូមមានទីតាំងនៅឆ្ងាយពីគ្នាឬឆ្ងាយពីទន្លេ និងស្រះទឹកជាដើម ដែលត្រូវរង់ចាំរថយន្តបូមពេញមួយ ទើបមួយទៀតចូល ។ លោកថា ដូចជា ក្បាលបូមទឹកនៅក្បែររង្វង់មូលផ្សារដើមថ្កូវជាដើមត្រូវចតត្រៀបត្រាបន្តកន្ទុយគ្នាលើផ្លូវយ៉ាងចង្អៀត ។ បូមទឹកមួយពេញ ទើបបូមទឹកចូលមួយគ្រឿងទៀត ។
លោក ព្រំ យ៉ត បានបញ្ជាក់ថា បញ្ហាកង្វះក្បាលបូមទឹកនេះ រដ្ឋបាលរាជធានីភ្នំពេញបាននិងកំពុងតែសិក្សា ដើម្បីរកទីតាំងដាក់បន្ថែមឱ្យបានច្រើន ធ្វើយ៉ាងណាបង្កលក្ខណៈងាយស្រួល និងជួយសង្គ្រោះអគ្គិភ័យឱ្យបានទាន់ពេល ។
គួរកត់សម្គាល់ថា ទាក់ទិនទៅនឹងបញ្ហាខាងលើនេះ ជាចៃដន្យថ្ងៃមួយភ្នាក់ងារកោះសន្តិភាពយើងខ្ញុំបានទៅអង្គុយផឹកកាហ្វេនៅក្នុងហាងមួយនៅជាប់រង្វង់មូលផ្សារដើមថ្កូវ បន្ទាប់ពីទទួលព័ត៌មានថា មានករណីភ្លើងឆេះនៅម្តុំស្ទឹងមានជ័យរួចមក ។ ពេលអង្គុយផឹកកាហ្វេបានមួយសន្ទុះ ស្រាប់តែឮសំឡេងរថយន្តពន្លត់អគ្គិភ័យបន្តកន្ទុយគ្នា ទៅបូមទឹកនៅក្បាលបូមដែលស្ថិតនៅជិតរង្វង់មូលនោះ ដោយបានឃើញរថយន្តពន្លត់អគ្ិភ័យពណ៌ក្រហមតម្រង់ជួរគ្នា ទម្រាំតែបូមបាន និងពេញរថយន្តមួយៗនោះភ្លើងស៊ីផ្ទះអស់ខ្ទេចទៅហើយ…ខ្វល់អី ?
ខណៈពេលនោះអ្នកដែលអង្គុយហូបគុយទាវ បាយឬកាហ្វេបានរិះគន់ថា មិនគួររថយន្តពន្លត់អគ្គិភ័យទៅតម្រង់ជួររង់ចាំបូមទឹកដាក់ដូចមកសុំភ្លើងយក្សបែបនេះទេ សម័យទំនើបទៅហើយទម្រាំ តែបានពេញមួយៗ ។ គួរតែដាក់បន្ថែមក្បាលបូមនេះឱ្យបានច្រើនទីតាំង និងជួយសម្រួលប្រព័ន្ធទឹកនៅក្បាលបូមនោះឱ្យបានខ្លាំង ដើម្បីងាយស្រួល និងបានលឿនទាន់ពេលវេលា ។ មានការរិះគន់ថា ដោយសារអុីចឹងបានជាភ្លើងឆេះមួយកន្លែងៗជួយមិនដែលបានទាន់ពេល ។ ជួយដែរ ប៉ុន្តែយឺតពេលទៅហើយ ។ បើតែយ៉ាងហ្នឹងឱ្យសង្ឃឹមលោកម្ចាស់ជួយពន្លត់ ដូចសង្ឃឹមផ្កាយលើមេឃ ឬដូចទៅសុំភ្លើងយក្សមែនឬអត់ ?
ចែករំលែកព័តមាននេះ