រាជធានីភ្នំពេញ ៖ មិនខុសពីការប្រកួតអន្តរជាតិដែលបានធ្វើឡើងកាលពីថ្ងៃសៅរ៍ ដែលមានគូខ្មែរ និងបរទេសទាក់ទាញ សម្រាប់ការប្រកួតនៅល្ងាចថ្ងៃអាទិត្យទី១២ មករា ឆ្នាំ២០២០នេះ សង្វៀនអន្តរជាតិរបស់ទូរទស្សន៍អាស៊ីអាគ្នេយ៍ ក៏មានការប្រកួតជាលក្ខណៈអន្តរជាតិ ដោយមានវត្តមានកីឡាករកម្ពុជា និងកីឡាករថៃសរុបចំនួន៤រូបប៉ះគ្នាផងដែរ ។
កីឡាករម្ចាស់ផ្ទះ២រូបគឺយុគ យក្សផ្លែ និងអេលីត សាន់ កំពុងរង់ចាំស្វាគមន៍កីឡាករថៃ២រូបដែលសុទ្ធតែជាជើងខ្លាំងដូចគ្នាធ្វើឱ្យមហាជនផ្ដោតការចាប់អារម្មណ៍យ៉ាងខ្លាំង ។
ការប្រកួតដែលនឹងចាប់ផ្ដើមឡើងនៅម៉ោង៥និង៣០នាទីល្ងាចស្អែកនេះ ត្រូវគេឃើញមានការរំពឹងខ្ពស់មិនខុសពីការប្រកួតអន្តរជាតិមុនៗនោះទេ ដោយសារប៉ុស្តិ៍អាស៊ីអាគ្នេយ៍មានអ្នកទស្សនាច្រើនកកកុញស្រាប់មិនថាចំថ្ងៃសម្រាករួចទៅហើយ ព្រោះតែស្ថានភាពទីតាំង និងពេលវេលាអំណោយផល ។ អ្នករៀប ចំការប្រកួតបានអះអាងថា កីឡាករទាំង៤រូបគ្រាន់តែដឹងថានឹងត្រូវឡើងប្រកួតជាមួយគ្នា ម្នាក់ៗសុទ្ធតែបានត្រៀមខ្លួនរួចរាល់ធ្វើឱ្យគេរំពឹងថានឹងល្អមើលមិនខាន ។
លោក ញាណ សុធី អ្នករៀបចំការប្រកួតប្រចាំនៅទូរទស្សន៍អាស៊ីអាគ្នេយ៍បានថ្លែងប្រាប់ថា ក្នុងចំណោមកីឡាករកម្ពុជា ២រូបដែលមានឈ្មោះឡើងប្រកួតមិត្តភាពអន្តរជាតិក្នុងព្រឹត្តិការណ៍ប្រដាល់នោះ យុគ យក្សផ្លែ គឺជាកីឡាករជើងខ្លាំងម្នាក់ដែលលោករំពឹងខ្ពស់សម្រាប់ការប៉ះគ្នា ដោយសារតែគេទើបផ្ដួលកីឡាករជើងខ្លាំងថៃមួយចំនួនរួចមកហើយ ដ្បិតថាមិនទាន់មានឈ្មោះបោះសំឡេងខ្លាំងក្ដី ។ បើទោះជាគេត្រូវប្រឈមនឹងកីឡាករថៃល្អសម្រាប់ការប្រកួតលើកនេះ តែម្នាក់ៗនៅតែមានទំនុកចិត្តចំពោះសមត្ថភាពរបស់កីឡាករកម្ពុជារូបនេះភាគច្រើន ។
គេត្រូវប៉ះប្រកួតជាមួយកីឡាករថៃឈ្មោះ ប៉ប អាយ ក្នុងនាមជាគូរងឯកសម្រាប់ប្រដាល់អន្តរជាតិនៅល្ងាចថ្ងៃអាទិត្យនោះ ។ ភាគីម្ខាងៗ លោកយល់ថា ពិតជាចង់ឈ្នះដាច់ខាត ដោយសារអ្នកណាឈ្នះក្រៅពីបានមុខមាត់ និងទឹកប្រាក់តម្លៃខ្លួនខ្ពស់ជាងដៃគូប្រកួតក៏បានទទួលទំនុកចិត្តពីអ្នកគាំទ្រជាងមុនបន្ថែម ។ ប៉ុន្តែបើការប្រកួតនេះ បែរជាចាញ់ព្រោះតែប្រកួតមិនបានល្អវិញមិនខុសពីត្រូវបាក់មុខ និងរងការរិះគន់ពីអ្នកគាំទ្រនោះទេ ។
លោកជឿជាក់ថា កីឡាករកម្ពុជាគូនេះ នឹងបញ្ចេញសមត្ថភាពល្អដូចជាពូកែគេច និងពូកែវាយសន្ធាប់ដែលគេធ្លាប់បញ្ចេញឡើងនាពេលកន្លងមក ហើយពិតជាបើកការប្រកួតមិនលាក់ដៃ ដើម្បីជៀសផុតពីការរិះគន់ណាមួយ។
អ៊ីចឹងហើយទើបលោកយល់ថា ជំនួបរវាងជើងខ្លាំងយុគ យក្សផ្លែ ជាមួយកីឡាករថៃជាដៃគូនឹងមិនធម្មតាសម្រាប់ការប្រកួតទាំងមូល ដោយសារតែភាគីខាងណាក៏មិនចង់បាក់មុខ។
យោងតាមប្រវត្តិប្រកួតលោកថា កីឡាករកម្ពុជា ធ្លាប់ប្រកួតបាន១៦៩លើក ឈ្នះ១៣៦លើក ចាញ់២៧លើក និងស្មើ៦លើក ខណៈដែលកីឡាករថៃ ប្រកួតបានតិចជាងគឺបានត្រឹមតែ៦៨ដង ឈ្នះ៦៣ដង ចាញ់៥ដង តិចជាងតែគេខ្លាំងនាពេលចុងក្រោយក្នុងពេលកីឡាករកម្ពុជាធ្លាក់ដៃ។
សម្រាប់ជើងខ្លាំងមួយរូបទៀត គឺកីឡាករជើងថ្មី អេលីត សាន់ ដែលជាម្ចាស់ខ្សែក្រវាត់ផង ក៏ត្រូវគណៈកម្មការផ្គូផ្គងឱ្យប្រកួតជាមួយកីឡាករថៃ ឃុម ផាយ៉ាក់ ក្នុងនាមជាគូឯក។
លោកថា ការប្រកួតរបស់ពួកគេនៅមិនទាន់ដឹងថាអ្នកណាល្អជាងអ្នកណានោះទេ ក្នុងពេល
កីឡាករកម្ពុជារូបនេះនៅតែមានក្រេឌីតតែពិបាកទុកចិត្តពីភាពខ្លាំង១០០ភាគរយ ដោយ
សារកីឡាករថៃក៏មិនធម្មតា ។
លោកយល់ថាកីឡាករថៃជាដៃគូខ្លាំងម្នាក់ តែគេក៏មិនទាន់ប្រាកដដូចគ្នាថានឹងទទួលបានជ័យជម្នះសម្រាប់ការប្រកួតជាមួយជើងខ្លាំងកម្ពុជានោះដែរ ដោយ សារតែបទពិសោធន៍ប្រហាក់ប្រហែលគ្នា។ កីឡា ករកម្ពុជា ធ្លាប់ប្រកួតផ្លូវការបាន៦៩លើក ឈ្នះ៥០លើក ចាញ់១៧លើក និងស្មើ២លើក ខណៈកីឡាករថៃប្រកួតបានដល់៥៧លើក ឈ្នះ៤៩លើក ចាញ់៩លើក មិនដែលស្មើ ៕ (កែសម្រួលដោយ ៖ បុប្ផា)
ចែករំលែកព័តមាននេះ