លោកមហាសេដ្ឋី ប៊ីល ហ្គេតស៍ (Bill Gates) ជាបុរសដែលមានទ្រព្យសម្បត្តិច្រើនជាងគេលេខពីរលើពិភពលោក បានកសាងក្រុមហ៊ុនផលិតកម្មវិធីកុំព្យូទ័រធំជាងគេ និងកំពុងតែចូលរួមក្នុងការរកដំណោះស្រាយសម្រាប់បញ្ហាធំៗជុំវិញពិភពលោកដូចជាភាពក្រីក្រ និងបម្រែបម្រួលបរិយាកាសជាដើម ។…
លោកមហាសេដ្ឋី ប៊ីល ហ្គេតស៍ (Bill Gates) ជាបុរសដែលមានទ្រព្យសម្បត្តិច្រើនជាងគេលេខពីរលើពិភពលោក បានកសាងក្រុមហ៊ុនផលិតកម្មវិធីកុំព្យូទ័រធំជាងគេ និងកំពុងតែចូលរួមក្នុងការរកដំណោះស្រាយសម្រាប់បញ្ហាធំៗជុំវិញពិភពលោកដូចជាភាពក្រីក្រ និងបម្រែបម្រួលបរិយាកាសជាដើម ។
ប៉ុន្តែយោងទៅតាមសៀវភៅរបស់ភរិយារបស់លោកគឺអ្នកស្រី មេលីនដា ហ្គេតស៍ (Melinda Gates) បានឲ្យដឹងថាលោកថែមទាំជាស្វាមី និងឪពុកគំរូមួយរូបទៀត ។
ពេលដែលកូនស្រីអ្នកទាំងពីរនៅរៀនមេតេយ្យ អ្នកស្រី មេលីនដា តែងតែបើកបររថយន្តជូន និងទៅយកកូនពីសាលារៀនជារៀងរាល់ថ្ងៃទោះជាអ្នកស្រីត្រូវចំណាយពេលប្រមាណ៤០នាទីសម្រាប់គ្រប់ជើងពិតមែនក្តី ។ ថ្ងៃមួយអ្នកស្រីបានរអ៊ូពីរឿងនេះប្រាប់ដល់ស្វាមី ។ អ្នកប្រហែលជាគិតថាលោក ហ្គេតស៍ ប្រហែលជាស្នើឲ្យមានការជួលអ្នកបើកបរហើយ ។
តែលោកមិនបានធ្វើដូច្នេះទេ ផ្ទុយមកវិញលោកបានស្នើជូនកូនស្រីទៅរៀនដោយខ្លួនឯងទៅវិញ ទោះជាពេលនោះលោកនៅធ្វើការក្នុងក្រុមហ៊ុន Micosoft របស់លោកដែលមានទិសផ្ទុយពីសាលារៀន ។ លោកបានស្នើជូនកូនស្រីទៅរៀន ២ថ្ងៃជារៀងរាល់សប្តាហ៍ព្រោះលោកចង់មានឱកាសចំណាយពេលជាមួយកូនស្រី ។
បន្ទាប់ពីបីសប្តាហ៍ក្រោយមក អ្នកស្រី មេលីនដា ប្រទះឃើញថាមានឪពុកកាន់តែច្រើនដែលជូនកូនៗទៅសាលារៀន ។ អ្នកស្រីក៏សួរទៅម្តាយដទៃហើយពួកគេបានប្រាប់មកថាពេលដែលពួកគេមើលឃើញលោក ហ្គេតស៍ ពួកគេបានទៅផ្ទះវិញ និងប្រាប់ដល់ស្វាមីថា ប៊ីល ហ្គេតស៍ ក៏បើកបរជូនកូនទៅរៀនដែរ ។
អ្នកស្រីមេលីនដាក៏ចែករំលែកកិច្ចការក្នុងផ្ទះជាមួយស្វាមីដែរដូចជាការពិនិត្យកិច្ចការផ្ទះរបស់កូនៗ និងរំលឹកមនុស្សក្នុងគ្រួសារពីរឿងសំខាន់ៗផ្សេងៗជាដើម ។
អ្វីដែលគូស្វាមីភរិយាដទៃអាចរៀនពីគូស្វាមីមហាសេដ្ឋីខាងលើនេះគឺការចែករំលែកកិច្ចការក្នុងផ្ទះ និងសម្ភាធផ្លូវអារម្មណ៍ដែលស្ត្រីភាគច្រើនត្រូវរ៉ាប់រងម្នាក់ឯងខណៈដែលស្វាមីចេញទៅធ្វើការរកថវិកាចិញ្ចឹមគ្រួសារ ៕ (កែសម្រួលដោយ ៖ ធីតា)
ចែករំលែកព័តមាននេះ