រាជធានីភ្នំពេញ ៖ ធនាគារ អេស៊ីលីដា ភីអិលស៊ី បានចាប់ផ្ដើមអាជីវកម្មដំបូង គ្រាន់តែជាអង្គការមួយជួយអភិវឌ្ឍន៍ដល់កសិករតាមជនបទប៉ុណ្ណោះ តែដោយសារតែប្រតិបត្តិការរបស់ខ្លួនត្រូវបានទទួលស្គាល់ពីប្រជាពលរដ្ឋជាបន្តបន្ទាប់ និងបានក្លាយខ្លួនជាធនាគារពាណិជ្ជកម្មឈានមុខគេនៅកម្ពុជា និងជាធនាគារពាណិជ្ជកម្មទី១ បានចូលក្នុងផ្សារមូលបត្រកម្ពុជា ។
យោងតាមលោកបណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី បានមានប្រសាសន៍ក្នុងសិក្ខាសាលាស្តីពីធនាគារ អេស៊ីលីដា ភីអិលស៊ី គ្រោងនឹងបោះផ្សាយលក់មូលបត្រកម្មសិទ្ធិជាសាធារណៈកាលពីព្រឹកថ្ងៃទី១០ មករា ២០២០ នេះថា កាលចាប់ផ្ដើមដំបូង អេស៊ីលីដា គ្រាន់តែជាធនាគារក្រៅរដ្ឋាភិបាលមួយប៉ុណ្ណោះជាមួយនឹងដើមទុនប្រមាណ៦០ម៉ឺនដុល្លារកាលពី២៧ឆ្នាំមុន ។ ក្នុងអំឡុងពេលចាប់ផ្ដើមដំបូងនោះ វាមិនមែនជារឿងងាយស្រួលសម្រាប់អង្គការអេស៊ីលីដានោះទេ ។
លោកបន្តថា ដើមទុនប្រមាណជាង៦០ម៉ឺនដុល្លារនោះ ចាត់ទុកជាគ្រាប់ពូជមួយរបស់ធនាគារអេស៊ីលីដា នៅពេលបច្ចុប្បន្នដែលធ្វើអោយសាប ព្រោះបាននូវពូជជាបន្តបន្ទាប់ទៀត ដោយក្នុងរយៈពេល២៧ឆ្នាំកន្លងទៅនេះ បានពង្រីកការលូតលាស់រហូតដល់៧០០ដង ធ្វើអោយទុនម្ចាស់ទ្រព្យកើនដល់៩០០លានដុល្លារអាមេរិក ។
លោកថា៖ « បើនិយាយពីទ្រព្យសកម្មរបស់ធនាគារ អេស៊ីលីដា ចាប់តាំងពីកកើតដំបូងមកដល់ឥឡូវនេះ មានកំណើនរហូតដល់៩ពាន់ដង និងបានធ្វើអោយប្រាក់ចំណេញរបស់យើងកើនដល់ជិត២ពាន់ដង និងប្រកបដោយគុណភាព » ។
លោកបណ្ឌិតបានមានប្រាសន៍ថា ដើម្បីអោយធនាគារ អេស៊ីលីដា នៅតែក្លាយជាធនាគារពាណិជ្ជកម្មឈានមុខគេ និងចូលរួមអភិវឌ្ឍន៍វិស័យហិរញ្ញវត្ថុនៅក្នុងប្រទេសកម្ពុជានោះ អេស៊ីលីដា បានឈានជើងទៅមុខមួយកម្រិតទៀត ដោយគ្រោងនឹងបោះផ្សាយមូលបត្រនៅផ្សារមូលបត្រកម្ពុជានៅពេលឆាប់ៗខាងមុខនេះ ។
យ៉ាងណាក៏ដោយ ដើម្បីអោយដំណើរការបោះផ្សាយមូលបត្រក្នុងផ្សារហ៊ុននេះ ក៏ត្រូវការទាមទារអោយមានការជួយគាំទ្រ និងសហការពីអាជ្ញាធរកម្ពុជាដូចជា ស្ថាប័នដែលពាក់ព័ន្ធ នឹងវិស័យមូលបត្រនេះជាដើម ។ ជាជំហ៊ានដំបូង មុននឹងធ្វើការបោះផ្សាយមូលបត្រកម្មសិទ្ធិជាសាធារណៈ ធនាគារត្រូវការផ្សព្វផ្សាយអោយវិនិយោគិនក៏ដូចជា អតិថិជនរបស់ខ្លួនអោយបានដឹងពីកម្មវត្ថុបំណងរបស់ធនាគារ ។
បើតាមលោក ហុង សុហួរ អគ្គនាយកផ្សារមូលបត្រកម្ពុជា បានមានប្រសាសន៍ថា ក្នុងនាមបញ្ញត្តិករវិស័យមូលបត្រកម្ពុជា ពិតជាចង់បានស្ថាប័នក្នុងស្រុកជាច្រើនទៀតចូលរួមក្នុងផ្សារហ៊ុន ដោយបោះផ្សាយមូលបត្រកម្មសិទ្ធិជាសាធារណៈ ។ វាជាកិត្តិយសខ្លាំងណាស់ដែលផ្សារមូលបត្រកម្ពុជាទទួលបានធនាគារពាណិជ្ជកម្មទី១ និងជាធនាគារឈានមុខគេក្នុងប្រទេសកម្ពុជា ចុះបញ្ជីក្នុងផ្សារមូលបត្រ ដើម្បីបោះផ្សាយមូលបត្រកម្មសិទ្ធិជាសាធារណៈ ។
កន្លងមកផ្សារមូលបត្រកម្ពុជា ក៏ទទួលបានធនាគារពាណិជ្ជជាបន្តបន្ទាប់ដែរ ក៏ប៉ុន្តែពួកគេចុះបញ្ជីជាសញ្ញាបត្របំណុល ដែលមិនសូវមានការចាប់អារម្មណ៍ខ្លាំងប៉ុន្មានទេ ពីសាធារណជន ។ តែនៅពេលដែលធនាគារអេស៊ីលីដា ចូលក្នុងផ្សារហ៊ុននឹងធ្វើអោយសកម្មភាពផ្សារហ៊ុនក្នុងប្រទេសកម្ពុជាកាន់តែកក្រើក និងជំរុញអោយមានការវិនិយោគក្នុងវិស័យមូលបត្រនេះកាន់តែច្រើនឡើងថែមទៀត ។
លោករំពឹងថា នឹងមានវិនិយោគិនជាច្រើន ចាប់អារម្មណ៍វិនិយោគជាមួយនឹងភាគហ៊ុនរបស់ធនាគារអេស៊ីលីដាហើយខ្លួនលោកផ្ទាល់ ក៏មានការសាកសួរច្រើនពីសំណាក់វិនិយោគិន ដែលចង់វិនិយោគជាមួយធនាគារអេស៊ីលីដា ដូច្នេះពួកគេគួរត្រៀមទុនសម្រាប់វិនិយោគជាមួយអេស៊ីលីដា នៅពេលដែលធនាគារនេះ ប្រកាសលក់មូលបត្រជាផ្លូវការក្នុងផ្សារហ៊ុនកម្ពុជា ។
គួរបញ្ជាក់ថា គិតត្រឹមដំណាច់ឆ្នាំ ២០១៩ កន្លងទៅថ្មីៗនេះ ទ្រព្យសកម្មរបស់ធនាគារ អេស៊ីលីដា មានប្រមាណ ៦ពាន់លានដុល្លារអាមេរិក ហើយទុនរបស់ម្ចាស់ទ្រព្យក្នុងធនាគារអេស៊ីលីដាមានប្រមាណជាង៦០០លានដុល្លារអាមេរិក ៕ (កែសម្រួលដោយ ៖ បុប្ផា)
ចែករំលែកព័តមាននេះ