ខេត្តកំពង់ឆ្នាំង ៖ នៅព្រឹកថ្ងៃទី10 ខែមករា ឆ្នាំ 2020 អាជ្ញាធរស្រុកកំពង់លែង មន្ត្រីសូរិយោដី មន្ត្រីនគរបាលការពារបេតិកភណ្ឌ ព្រមទាំងអាជ្ញាធរមូលដ្ឋាន…
ខេត្តកំពង់ឆ្នាំង ៖ នៅព្រឹកថ្ងៃទី10 ខែមករា ឆ្នាំ 2020 អាជ្ញាធរស្រុកកំពង់លែង មន្ត្រីសូរិយោដី មន្ត្រីនគរបាលការពារបេតិកភណ្ឌ ព្រមទាំងអាជ្ញាធរមូលដ្ឋាន និងប្រជាពលរដ្ឋផង បានចុះវាស់វែង និងឈូសកំណត់ព្រំដីជើងពីទួលប្រាសាទបុរាណឈ្មោះប្រាសាទសក្ល ហៅប្រាសាទប្រុស ស្ថិតនៅក្នុងភូមិកង្កែបឃុំច្រណូក ស្រុកកំពង់លែង ។
លោក សំ ចាន់ថន អភិបាលស្រុកកំពង់លែងមានប្រសាសន៍ថា ដោយសារជើងទីទួលប្រាសាទដែលមានផ្ទៃរាបស្មើ ប្រជាពលរដ្ឋតែងតែធ្វើស្រែជាប់នឹងជើងទីទួលប្រាសាទជារៀងរាល់ឆ្នាំ ។ប៉ុន្តែកន្លងមកពួកគាត់ធ្លាប់បានធ្វើកិច្ចសន្យាមិនរំលោភបំពានយកដីជុំវិញទីទួលជើងប្រាសាទនោះឡើយ។
ជាមួយគ្នានេះលោក សុខ ធួក ប្រធានមន្ទីរវប្បធម៌ និងវិចិត្រសិល្បៈខេត្តកំពង់ឆ្នាំងក៏បានបញ្ជាក់ដែរថា ជុំវិញទីទួលប្រាសាទសក្ល គឺមិនអនុញ្ញាតឲ្យមានការបំពារបំពានឡើយ ។ កន្លងមកប្រជាពលរដ្ឋធ្លាប់បានធ្វើកិច្ចសន្យារួចហើយខាងមន្ទីរក៏ធ្លាប់បោះព្រំដីដែរ ប៉ុន្តែពួកគាត់មិនយល់នៅតែមានការចូលធ្វើស្រែជាប់នឹងជើងទួលប្រសាទដដែល ។ ចំពោះការលើកឡើងថាចម្ងាយពីជើងទួលប្រាសាទត្រឹម៥ម៉ែត មានការរួចធ្វើស្រែ នោះ គឺមិនពិតនោះទេ ដូចឃើញស្រាប់នៅថ្ងៃនេះ ។
ជាមួយគ្នានេះដែរ ដើម្បីឲ្យប្រជាពលរដ្ឋដែលមានដីស្រែនៅជាប់ជើងទួលប្រាសាទ កាន់តែច្បាស់ អាជ្ញាធរស្រុកបានយកត្រាក់ទ័រមកឈូសលើកភ្លឺព័ទ្ធជុំវិញជើងទួល ប្រាសាទដើម្បីជាកំណត់សម្គាល់ដល់ប្រជាពលរដ្ឋ បញ្ឈប់ការធ្វើស្រែជាប់នឹងជើងទីទួលប្រាសាទនោះតទៅទៀត ។
ដោយឡែកលោក សេង សាលី ប្រធានមន្ទីរទេសចរណ៍ខេត្តកំពង់ឆ្នាំងក៏បានបញ្ជាក់ដែរថា ប្រាសាទ សក្ល គឺជាប្រាសាទមួយក្នុងចំណោមប្រាសាទជាច្រើន ដែលរាប់បញ្ចូលថាជាទីតាំងសម្រាប់ភ្ញៀវទេសចរទៅលេងកម្សាន្ត ប៉ុន្តែជារើយៗ មិនសូវ មានភ្ញៀវទេសចរណ៍ ចូលទៅកម្សាន្ត ឡើយ ។ ចំពោះការលើកឡើងថាមានតំណាងឲ្យភ្ញៀវទេសចរដែលមកកម្សាន្ត នៅប្រាសាទ សក្ល នោះ វាជាសិទ្ធិរបស់ពលរដ្ឋ អ្នកទេសចរតែប៉ុណ្ណោះ។ យ៉ាងនេះក្តី លោកគាំទ្រការលើកភ្លឺព័ទ្ធជុំវិញ ទីទួលប្រាសាទដើម្បីកំណត់ព្រំឲ្យកាន់តែច្បាស់ ដើម្បីកុំឲ្យប្រជាពលរដ្ឋរំលោភបំពាន ។
នៅព្រឹកនោះផងដែរប្រជាពលរដ្ឋ ដែលជាម្ចាស់ស្រែជុំវិញទីទួលប្រាសាទ ត្រូវបានអាជ្ញាធរឃុំស្រុកអញ្ជើញពួកគាត់ដើម្បីមកមើលការ លើកភ្លឺសម្គាល់ ព្រុំដីរវាងដីទីទួលប្រាសាទនិងដីស្រែរបស់ពួកគាត់ និងបានណែនាំអោយពួកគាត់បញ្ឈប់ ការធ្វើស្រែចូលមកក្នុងជើងទីទួលប្រាសាទជាបន្តទៅទៀត ។
ជាទីបញ្ចប់លោក សំ ចាន់ថនអភិបាលស្រុកកំពង់លែង បានបញ្ជាក់ថានៅដើមឆ្នាំ 2020 នេះរដ្ឋបាលសាលាស្រុកកំពង់លែង បានដាក់ថវិកាមួយចំនួនដើម្បីធ្វើផ្លូវថ្មី ចូលមកកាន់ទីទួលប្រាសាទនេះហើយ ប៉ុន្តែជំហានដំបូងធ្វើបានតែជាង 100 ម៉ែត្រ ប៉ុណ្ណោះហើយនឹងបន្តធ្វើជាបន្តបន្ទាប់ទៀតរហូតដល់មានផ្លូវធំអាចមានរថយន្តបើកចេញចូល ទៅប្រាសាទបុរាណសក្ល ដែលកសាងឡើងក្នុងចន្លោះសតវត្សទី 7 និងទី 8 តាមរចនាបថកំពង់ព្រះនេះបាន ៕
កែសម្រួលដោយ ៖ សំណាង
ចែករំលែកព័តមាននេះ