ខេត្តបន្ទាយមានជ័យ ៖ នៅថ្ងៃទី៩ មករារដ្ឋមន្ត្រីក្រសួងធនធានទឹក និងឧតុនិយម លោក លឹម គានហោ បានអញ្ជើញចុះពិនិត្យ និងចាត់ចែងការងារអន្តរាគមន៍បូមទឹកពីស្ទឹងសិរីសោភ័ណ…
ខេត្តបន្ទាយមានជ័យ ៖ នៅថ្ងៃទី៩ មករារដ្ឋមន្ត្រីក្រសួងធនធានទឹក និងឧតុនិយម លោក លឹម គានហោ បានអញ្ជើញចុះពិនិត្យ និងចាត់ចែងការងារអន្តរាគមន៍បូមទឹកពីស្ទឹងសិរីសោភ័ណ ស្ថិតក្នុងក្រុងសិរីសោភ័ណ បញ្ជូនទៅកាន់ស្ទឹងមង្គលបូរី ស្ថិតក្នុងស្រុកមង្គលបូរី ដែលកំពុងរីងខះ ធ្វើឲ្យបងប្អូនប្រជាពលរដ្ឋនៅក្នុងស្រុកមង្គលបូរីប្រមាណជាង៨ពាន់គ្រួសារ ប្រឈមនឹងការខ្វះខាតទឹកប្រើប្រាស់សម្រាប់ជីវភាពប្រចាំថ្ងៃ ។
ក្នុងឱកាសនេះផងដែរ ដើម្បីដោះស្រាយបញ្ហានេះនាពេលខាងមុខផងនោះ លោករដ្ឋមន្ត្រីបានសម្រេចផ្ដល់ជូននូវស្ថានីយបូមទឹក ហ៊ុន សែន (បណ្តែត) ដែលមានទុយោទំហំ៥តឹក ចំនួន១ស្ថានីយ ព្រមទាំងបានណែនាំឲ្យក្រុមអ្នកបច្ចេកទេសធ្វើការសិក្សា ដើម្បីឈានទៅសាងសង់ប្រឡាយបេតុង១ខ្សែ ប្រវែងប្រមាណ៨គីឡូម៉ែត្រ ចេញពីស្ថានីយទៅភ្ជាប់នឹងស្ទឹងមង្គលបូរី ដែលប្រឡាយនេះមានតួនាទីជាប្រឡាយស្រោចស្រពផង និងជាប្រឡាយនាំទឹកសម្រាប់ការប្រើប្រាស់នៅក្នុងស្រុកមង្គលបុរីផងដែរ ។ ទោះបីជាបែបណាមកដល់ពេលបច្ចុប្បន្ននេះ សម្រាប់ស្រុកមង្គលបូរីមិនទាន់មានអ្វីត្រូវព្រួយបារម្ភនោះទេ ដោយលោករដ្ឋមន្ត្រីបាន សម្រេចតម្លេីងម៉ាស៊ីនបូមទឹកចំនួន៣គ្រឿង បូមទឹកបង្ហូរទៅស្ទឹងមង្គលបូរី ។
គួរបញ្ជាក់ជូនថា ក្នុងឆ្នាំ២០១៩- ២០២០ នេះ ស្រុកមង្គលបូរី មានការបង្កបង្កើនផលស្រូវប្រាំងរហូតដល់ទៅ៨មុឺនហិកតា (ផែនការខេត្តបានដាក់ចុះតែ៧ពាន់ហិកតាតែប៉ុណ្ណោះ) ។ ចំពោះបញ្ហាបង្កបង្កើនផលស្រូវប្រាំងនេះ ត្រូវបានក្រសួង និងមន្ទីរធនធានទឹក និងឧតុនិយមខេត្ត បានជួយអន្តរាគមន៍បូមទឹកសង្គ្រោះរួចរាល់អស់ហើយ មិនមានអ្វីចោទជាបញ្ហាទៀតទេ ។
កាលពីរសៀលថ្ងៃទី៨ មករា លោក អ៊ុំ រាត្រី អភិបាលខេត្តបន្ទាយមានជ័យ អមដំណើរដោយលោក យឹម ប៊ុនរ៉ុម ប្រធានមន្ទីរធនធានទឹក និងឧតុនិយមខេត្ត លោក ហ៊ឹល រ៉ាយ៉ា អភិបាលក្រុងសិរីសោភ័ណ លោក រត្ន័ ដាស៊ីណង់ អភិបាលស្រុកមង្គលបូរីរួមនឹងមន្ត្រីពាក់ព័ន្ធជាច្រើនទៀត បានចុះពិនិត្យមើលពីស្ថានភាពទឹកនៅតាមដងស្ទឹងសិរីសោភ័ណ ដោយផ្ទាល់ក្នុងសង្កាត់មួយចំនួននៃក្រុងសិរីសោភ័ណ ដើម្បីរក្សាទឹកទុកប្រើប្រាស់ និងធ្វើការបូមបង្ហូរទឹកពីស្ទឹងសិរីសោភ័ណតាមប្រឡាយមេទៅស្ទឹងមង្គលបូរី ដែលស្ថានភាពទឹកមានការខ្វះខាតខ្លាំង ប្រឈមនឹងតម្រូវការប្រើប្រាស់របស់ប្រជាពលរដ្ឋ ។
អភិបាលស្រុកមង្គលបូរី លោក រ័ត្ន ដាស៊ីណង់ បាននិយាយថា ក្នុងរយៈពេល៣ថ្ងៃទៀតទឹកស្ទឹងមង្គលបូរីដែលទទួលទឹកពីខេត្តប៉ៃលិន ឆ្លងកាត់ស្រុកបវេលខេត្តបាត់ដំបង នឹងរីងខះអស់ដែលធ្វើឲ្យប្រជាពលរដ្ឋនៅក្នុងស្រុកមង្គលបូរីជាង៨.០០០គ្រួសារ នឹងរងនូវផលប៉ះពាល់ដោយកត្តាខ្វះខាតទឹកប្រើប្រាស់ប្រចាំថ្ងៃ។
លោកបានអះអាងទៀតថា វិធានការចំពោះមុខនៅពេលនេះ អាជ្ញាធរពាក់ព័ន្ធ និងក្រសួងធនធានទឹកកំពុងជួយអន្ដរាគមន៍ ខណៈដែលបញ្ហាខ្វះខាតទឹកនេះ បណ្ដាលមកពីប្រជាពលរដ្ឋសម្រុកប្រើប្រាស់ទឹកខ្លាំងពេក ដើម្បីផ្គត់ផ្គង់ស្រូវនៅក្នុងរដូវប្រាំងរបស់ពួកគាត់ ដែលបូមហួសពីផែនការដែលអាជ្ញាធរខេត្តបានដាក់ជូន ទើបធ្វើឲ្យមានការប្រឈមខ្វះខាតយ៉ាងដូច្នេះ ។ ចំពោះមុខការប្រឈមនេះ លោក យឹម ប៊ុនរ៉ុម ប្រធានមន្ទីរធនធានទឹក និងឧតុនិយមខេត្ត ដែលកំពុងដឹកនាំក្រុមការងារដោះស្រាយបញ្ហានេះបានបញ្ជាក់ថា ជាការពិតជាក់ស្ដែង ប្រភពទឹកស្ទឹងមង្គលបូរីមកដល់ពេលនេះស្ទើររីងខះអស់ទៅហើយ អាចប្រើប្រាស់បានក្នុងរយៈពេលយ៉ាងយូរ បីថ្ងៃទៀតប៉ុណ្ណោះ ។
ប៉ុន្តែទន្ទឹមនឹងនេះ ក្រសួងក៏បានរកប្រភពទឹកពីស្រុកផ្សេងទៅជួយផ្គត់ផ្គង់ ដោយក្រសួង និងអាជ្ញាធរខេត្ត ស្រុក បាននឹងកំពុងដំឡើងម៉ាស៊ីនបូមទឹក គឺបូមទឹកពីស្ទឹងសិរីសោភ័ណទម្លាក់ចូលក្នុងប្រឡាយមេមួយខ្សែ ហើយហូរធ្លាក់ទៅស្ទឹងមង្គលបូរី ។ ជារួមបញ្ហាប្រឈមនេះ យើងអាចដោះស្រាយបាន នឹងមិនមានការប្រឈមខ្លាំងដូចកាលពីឆ្នាំ២០១៦នោះទេ ។
ជាមួយគ្នានោះដែរ លោក អ៊ុំ រាត្រី អភិបាលខេត្តបន្ទាយមានជ័យ ក៏បានណែនាំដល់អាជ្ញាធរស្រុក ក្រុង និងអាជ្ញាធរឃុំ ជួយការពារប្រភពទឹកនេះ ចៀសវាងកុំឲ្យមានការបង្កបង្កើនផលស្រូវប្រាំងបន្ថែមទៀត ព្រោះប្រភពទឹកនេះទុកសម្រាប់តែការប្រើប្រាស់ក្នុងជីវភាពប្រចាំថ្ងៃប៉ុណ្ណោះ ព្រោះថារដូវប្រាំងក៏នៅមានពេលវេលាយូរទៅមុខទៀត ទម្រាំដល់រដូវវស្សាមកដល់នឹងមានភ្លៀងធ្លាក់ ៕
ចែករំលែកព័តមាននេះ