ខេត្តព្រះសីហនុ ៖ តាមសេចក្ដីរាយការណ៍បានឱ្យដឹងថា កាលពីថ្ងៃទី៤ ខែមករាកន្លងទៅ វេលាម៉ោងប្រមាណ១១និង៣០នាទីយប់ នៅភូមិ៤ សង្កាត់លេខ៤ ក្រុងព្រះសីហនុ មានករណីចោរលួចរថយន្ត១គ្រឿងម៉ាកហាយឡែនឌ័រពណ៌ត្រាវ ពាក់ផ្លាកលេខ ព្រះសីហនុ ២A-៧៨១០ របស់ជនជាតិចិនម្នាក់ ខណៈចុះពីរថយន្តចូលទៅទិញផ្លែឈើដោយមិនបានពន្លត់ម៉ាសុីន ហើយជនសង្ស័យក៏ចូលបើករថយន្តគេចខ្លួនបាត់ទៅ ។
បន្ទាប់ពីបានទទួលដំណឹងនេះភ្លាម កម្លាំងនគរបាលខេត្ត បានសហការគ្នាធ្វើការរុករក និងដាក់កម្លាំងស្ទាក់ចាប់នៅតាមគោលដៅសំខាន់ៗនិងតាមផ្លូវជាតិ៤ ។ រហូតដល់វេលាម៉ោងប្រហែល១២និង៣០រំលងអធ្រាត្រឈានចូលថ្ងៃទី៥ ខែមករា ជនសង្ស័យបានបើករថយន្តដែលលួចបាននោះសំដៅទៅរាជធានីភ្នំពេញ ។
ពេលទៅដល់ស្រុកព្រៃនប់ ឆ្លងកាត់កន្លែងត្រួតពិនិត្យរបស់កម្លាំងសមត្ថកិច្ច ក៏បានស្ទាក់ ហៅអ្នកបើករថយន្តឱ្យឈប់ តែជនសង្ស័យដឹងខ្លួនមិនព្រមឈប់ និងបានបន្ថែមល្បឿនបុកទម្លុះកន្លែងត្រួតពិនិត្យរបស់កម្លាំងសមត្ថកិច្ច ។ ទោះជាយ៉ាងណា មិនបណ្តាលឱ្យមានគ្រោះថ្នាក់ដល់កម្លាំងសមត្ថកិច្ចឡើយ ដោយសារបានត្រៀមលក្ខណ:ជាមុន ហើយបើករថយន្តដេញតាមរហូតស្ទាក់ចាប់ឃាត់ខ្លួនជនសង្ស័យបាន។
ម្ចាស់រថយន្តឈ្មោះ Wang Qi Fu ភេទប្រុស អាយុ៤២ឆ្នាំ ជនជាតិចិន មុខរបរលក់ដូរ ស្នាក់នៅភូមិ៤ សង្កាត់លេខ៤ ក្រុងព្រះសីហនុ ។ ឯជនសង្ស័យឈ្មោះ សុវណ្ណ សេងលៀង ភេទប្រុស អាយុ២៧ឆ្នាំ ជាជាងដែក មានទីលំនៅក្នុងភូមិអូរឧកញ៉ាហេង ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ ។
ចំពោះករណីនេះ ជនសង្ស័យត្រូវបានកសាងសំណុំរឿងបញ្ជូនទៅសាលាដំបូងខេត្ត ៕
ចែករំលែកព័តមាននេះ