សហរដ្ឋអាមេរិក-ចិន ៖ ក្រសួងពាណិជ្ជកម្មចិនប្រកាសនាថ្ងៃទី៩មករាថា កិច្ចព្រមព្រៀងពាណិជ្ជកម្មដំណាក់កាលទី១ រវាងសហរដ្ឋអាមេរិកនិងចិន នឹងចុះហត្ថលេខាដោយឧបនាយករដ្ឋមន្ត្រីចិន លោកLIU HEប្រមុខក្រុមអ្នកចរចាចិនក្នុងសំណុំរឿងនេះ។
លោកLIU HEនឹងមកកាន់ក្រុងវ៉ាស៊ិនតោនរវាងថ្ងៃទី១៣មក១៥មករា។ គណៈប្រតិភូរបស់ប្រទេសទាំង២នៅតែប្រាស្រ័យទាក់ទងគ្នាដោយជិតស្និទ ដើម្បីកំណត់បណ្ដាបែបបទនៃការចុះហត្ថលេខានេះ។
ប្រធានាធិបតីអាមេរិកលោកដូណាល់ត្រាំ ប្រកាសកាលពីថ្ងៃទី៣១ធ្នូថា កិច្ចព្រមព្រៀងជាមួយចិន នឹងចុះហត្ថលេខានាថ្ងៃទី១៥មករានៅសេតវិមាន ជាមួយបណ្ដាតំណាងជាន់ខ្ពស់់ចិននិងថា បន្ទាប់មកលោកនឹងមកកាន់ក្រុងប៉េកាំង ដើម្បីចាប់ផ្ដើមការចរចាលើកិច្ចព្រមព្រៀងពាណិជ្ជកម្មដំណាក់កាលទី២ទៀត។
កិច្ចព្រមព្រៀងដំណាក់កាលទី១ ដែលចុះហត្ថលេខាកាលពីខែមុន តម្រូវឲ្យមានការបញ្ចុះពន្ធគយ និងបង្កើនការទិញបណ្ដាផលិតផលកសិកម្ម ថាមពល និងកម្មន្តសាលអាមេរិកពីសំណាក់ប្រទេសចិន ទោះជានៅមានទំនាស់គ្នាមួយចំនួនជុំវិញកម្មសិទ្ធិបញ្ញាក្ដី៕ ប្រភពពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ