ខេត្តមណ្ឌលគិរី ៖ បុរសជាជនជាតិវៀតណាមចំនួន៣នាក់ត្រូវបានសមត្ថកិច្ចកម្ពុជាឃាត់ខ្លួន ក្រោយពួកគេបានចូលមកទឹកដីកម្ពុជាលើសថ្ងៃកំណត់ ដែលករណីនេះបានកើតឡើងនៅព្រឹកថ្ងៃទី៨ មករា ឆ្នាំ២០២០ នៅភូមិសាស្ត្រស្រុកអូររាំង។ សេចក្តីរាយការណ៍បានឲ្យដឹងថា ជនជាតិវៀតណាម៣នាក់រួមនឹងត្រាក់ទ័រ៣គ្រឿងត្រូវបានឃាត់ខ្លួន…
ខេត្តមណ្ឌលគិរី ៖ បុរសជាជនជាតិវៀតណាមចំនួន៣នាក់ត្រូវបានសមត្ថកិច្ចកម្ពុជាឃាត់ខ្លួន ក្រោយពួកគេបានចូលមកទឹកដីកម្ពុជាលើសថ្ងៃកំណត់ ដែលករណីនេះបានកើតឡើងនៅព្រឹកថ្ងៃទី៨ មករា ឆ្នាំ២០២០ នៅភូមិសាស្ត្រស្រុកអូររាំង។
សេចក្តីរាយការណ៍បានឲ្យដឹងថា ជនជាតិវៀតណាម៣នាក់រួមនឹងត្រាក់ទ័រ៣គ្រឿងត្រូវបានឃាត់ខ្លួន បន្ទាប់ពីឆ្លងដែនខុសច្បាប់មកដឹកដំឡូងមី នៅចំណុចជិតប៉ុស្តិ៍ការពារព្រំដែនទួលស្វាយ ស្ថិតក្នុងភូមិពូលេះ ឃុំដាក់ដាំ ស្រុកអូររាំង។
លោក សៀក មុន្នី អភិបាលស្រុកអូររាំងឱ្យដឹងថា ឈ្មួញវៀតណាមទាំងនេះ ចូលមកដើម្បីទិញដំឡូងមីរបស់ប្រជាពលរដ្ឋ ក្រោមការស្នើសុំរបស់មេឃុំ ។ ជនជាតិវៀតណាមទាំងនេះបានឆ្លងដែនចូលប្រទេសកម្ពុជាតាមច្រកព្រំដែនណាំលៀ ដែលគ្រប់គ្រងដោយលោក សំរឹទ្ធ ណយ មេប៉ុស្តិ៍ទ្វេរភាគីណាំលៀ ដោយពួកគេធ្វើលិខិតចូលក្នុងប្រទេសកម្ពុជាត្រឹមតែ១២ម៉ោងក្នុងទឹកដីស្រុកពេជ្រាដាប៉ុណ្ណោះ ប៉ុន្តែជនជាតិវៀតណាមមួយក្រុមនេះបានចូលមកតាំងពីថ្ងៃទី៦ ខែមករា ឆ្នាំ២០២០ រហូតដល់ថ្ងៃទី៨ ខែមករា ឆ្នាំ២០២០ មិនឆ្លងដែនត្រឡប់ទៅប្រទេសខ្លួនវិញ ទើបសមត្ថកិច្ចកម្ពុជាឃាត់ខ្លួនតែម្តងទៅ។
បច្ចុប្បន្នជនជាតិវៀតណាមទាំង៣នាក់ត្រូវបានសមត្ថកិច្ចបញ្ជូនខ្លួនទៅការិយាល័យអន្តោប្រវេសន៍នៃស្នងការដ្ឋាននគបាលខេត្តមណ្ឌលគិរីដើម្បីចាត់ការបន្ត៕ (កែសម្រួលដោយ ៖ ធីតា)
ចែករំលែកព័តមាននេះ