រាជធានីភ្នំពេញ ៖ ជនសង្ស័យជាជនជាតិចិនតៃវ៉ាន់ស្រីប្រុស២នាក់ដែលពាក់ព័ន្ធក្នុងទំនាស់បាញ់ប្រហារគ្នាជាង៣0 គ្រាប់និងជួញដូរប្រើប្រាស់គ្រឿងញៀនកាលពី៤ថ្ងៃមុន ពេលនេះត្រូវបានកម្លាំងនគរបាលខណ្ឌសែនសុខបញ្ជូនទៅកាន់សាលាដំបូងរាជធានីភ្នំពេញចាត់ការតាមច្បាប់កាលពីព្រឹកថ្ងៃទី៩ ខែមករា ឆ្នាំ២០២០នេះ។
ជនសង្ស័យទាំង២នាក់ខាងលើ ក្នុងនោះម្នាក់ឈ្មោះCHIANG CHUNYI ភេទប្រុស អាយុ៤០ឆ្នាំ ជាជនជាតិចិនតៃវ៉ាន់ និងម្នាក់ទៀតឈ្មោះ ស៊ី អាយអី ភេទស្រី អាយុ២១ឆ្នាំ ជនជាតិចិនតៃវ៉ាន់ មុខរបរទេសចរណ៍ ស្នាក់នៅផ្ទះជួលលេខ៥៨ ផ្លូវP៩ ស្ថិតក្នុងភូមិបាយ៉ាប សង្កាត់ភ្នំពេញថ្មី ខណ្ឌសែនសុខ កាន់លិខិតឆ្លងដែនលេខ316254263។
តាមនគរបាលខណ្ឌសែនសុខបានឱ្យដឹងថាជនជាតិចិនតៃវ៉ាន់ស្រីប្រុសទាំងពីរនាក់នេះត្រូវបានកម្លាំងនគរបាលខណ្ឌសែនសុខសហការជាមួយនគរបាលព្រហ្មទណ្ឌកម្រិតស្រាលនិងនគរបាលការិយាល័យប្រឆាំងគ្រឿងញៀនធ្វើការស្រាវជ្រាវឃាត់ខ្លួនជាបន្តបន្ទាប់កាពីយប់ថ្ងៃទី៥ ខែមករា និងថ្ងៃទី៦ ខែមករា បន្ទាប់ពីជនជាតិតៃវ៉ាន់ពីរក្រុមមានទំនាស់បាញ់ប្រហារគ្នាប្រមាណជាង៣០គ្រាប់ នៅក្នុងបុរីទំនើបមួយកន្លែង ស្ថិតនៅក្នុងភូមិបាយ៉ាបសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
តាមនគរបាលខណ្ឌសែនសុខបានឲ្យដឹងទៀតថា ជនសង្ស័យស្រីប្រុសទាំងពីរនាក់ពាក់ពន្ធ័ករណីរក្សាទុកសារធាតុផ្សំគីមីកែច្នៃនិងប្រើប្រាស់សារធាតុញៀន នៅចំណុចខាងលើ ។ ដោយឡែកជនបង្កផ្ទុះអាវុធបាញ់ប្រហារគ្នាបានគេចខ្លួនដោយសុវត្ថិភាព។
នៅក្នុងការឃាត់ខ្លួននេះដែរ សមត្ថកិច្ចដកហូតបានរួមមាន កាំភ្លើងខ្លី១ដើម ម៉ាកZORAKIM906 ពណ៌ខ្មៅ លាយទឹកប្រាក់, កាំភ្លើងខ្លី១ដើមម៉ាកឡុកអីទ្រីស លេខPAD529 ពណ៌ខ្មៅ, បង់២គ្រាប់(១៨គ្រាប់), សំបកគ្រាប់៣៥គ្រាប់ , លិខិតឆ្លងដែនចំនួន៤, ម្សៅសថ្លា ៤៨កញ្ចប់, ថ្នាំគ្រាប់ពណ៌ក្រហម៥គ្រាប់, ក្រាមសថ្លា១កូនថង់តូច, ម្សៅម៉ដ្ឋពណ៌ស១កញ្ចប់តូច, ម្ស៉ៅពណ៌ក្រាមសថ្លា ៣០៧ដបតូច, ថ្នាំគ្រាប់ពណ៌ទឹកក្រូច១៥ក្រាប់, ម្សៅពណ៌ទឹកដោះគោកន្លះដបជ័យ , ម្សៅម៉ដ្ឋពណ៌ទឹកក្រូចកន្លះថង់ធំ, ម្សៅម៉ដ្ឋពណ៌ទឹកដោះគោ១ថង់ធំ និងសម្ភារៈមួយចំនួនទៀត ។ ក្រៅពីនោះសមត្ថកិច្ចដកហូតប៉ាស្ព័រជនជាតិចិនតៃវ៉ាន់ចំនួន ៩ក្បាលដែលសមត្ថកិច្ចអះអាងថាជាក្រុមជនបង្កការផ្ទុះអាវុធដែលបានបន្សល់ទុក។
ជនសង្ស័យដែលមានទំនាស់បាញ់ប្រហារគ្នាសមត្ថកិច្ចមានការសង្ស័យថាផ្ដើមចេញពីទំនាស់គ្រឿងញៀនហើយជននោះត្រូវបានសមត្ថកិច្ចកំណត់មុខសញ្ញារួចហើយ។
គួរបញ្ជាក់ថា កាលពីវេលាម៉ោង២និង៣០នាទីរសៀលថ្ងៃទី៥ ខែមករា មានករណីផ្ទុះអាវុធបាញ់តដៃគ្នារវាងជនជាតិតៃវ៉ាន់និងជនជាតិតៃវ៉ាន់ក្នុងទំនាស់គ្នាចំណុចផ្ទះជួលលេខ៥៨ ផ្លូវP៩ ភូមិបាយ៉ាប សង្កាត់ភ្នំពេញថ្មី ខណ្ឌសែនសុខ ។ នៅក្នុងការផ្ទុះអាវុធនោះសមត្ថកិច្ចមានការសង្ស័យថាផ្ដើមចេញពីរឿងគ្រឿងញៀន ។ បន្ទាប់ពីផ្ទះអាវុធដូចក្នុងសមរភូមិរួចមកក្រុមជនបង្កដែលខ្លះមានរបួសបានជិះរថយន្តគេចខ្លួនអស់។
លុះក្រោយមក នៅវេលាម៉ោងប្រមាណជា៤រសៀលសន្តិសុខបុរីបានរាយការណ៍មកសមត្ថកិច្ចមូលដ្ឋានចុះទៅកន្លែងកើតហេតុរកឃើញកាំភ្លើងខ្លី២ដើម និងរើសបានសំបកគ្រាប់ចំនួន៣៥គ្រាប់ដែលបានបន្សល់ទុក បន្ទាប់ពីជនជាតិចិនតៃវ៉ាន់ពីក្រុមបាញ់ប្រហារគ្នាព្រមទាំងឆែកឆេររកឃើញគ្រឿងញៀនជាច្រើនផងដែរ។
ដោយមានការសហការជាមួយនគរបាលការិយាល័យព្រហ្មទណ្ឌកម្រិតស្រាលនិងនគរបាលប្រឆាំងគ្រឿងញៀនសមត្ថកិច្ចឃាត់ខ្លួនជនសង្ស័យជនជាតិតៃវ៉ាន់ស្រីប្រុសទាំងពីរនាក់ជាបន្ទាន់ ហើយកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញនៅពេលនេះ ។ ចំណែកជនដៃដល់ក្នុងការផ្ទុះអាវុធត្រូវបានកម្លាំងនគរបាលកំណត់មុខសញ្ញាតាមរយៈប៉ាស្ព័រដើម្បីសុំដីកាចាប់ខ្លួនចាត់ការតាមច្បាប់៕ (កែសម្រួលដោយ ៖ ធីតា)
ចែករំលែកព័តមាននេះ