ខេត្តបន្ទាយមានជ័យ ៖ នារសៀលថ្ងៃទី០៨ ខែមករានេះលោក អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យអមដំណើរដោយលោក យឹម ប៊ុនរ៉ុម ប្រធានមន្ទីរធនធានទឹក និងឧត្តុនិយមខេត្ត អភិបាលស្រុកមង្គលបូរី រួមនឹងមន្ត្រីពាក់ព័ន្ធបានអញ្ជើញចុះពិនិត្យមើលពីស្ថានភាពទឹកនៅតាមដងស្ទឹងសិរីសោភ័ណ ដោយផ្ទាល់ក្នុងសង្កាត់មួយចំនួននៃក្រុងសិរីសោភ័ណ ដើម្បីរក្សាទឹកទុកប្រើប្រាស់ និងធ្វើការបូមបង្ហូរទឹកពីស្ទឹងសិរីសោភ័ណតាមប្រឡាយមេទៅស្ទឹងមង្គលបូរី ដែលស្ថានភាពទឹកមានការខ្វះខាតខ្លាំងប្រឈមនឹងតម្រូវការប្រើប្រាស់របស់ប្រជាពលរដ្ឋ ។
អភិបាលស្រុកមង្គលបូរី លោក រ័ត្ន ដាស៊ីណង់បាននិយាយថា ក្នុងរយៈពេល៣ថ្ងៃទៀតទឹកស្ទឹងមង្គលបូរី ដែលទទួលទឹកពីខេត្តប៉ៃលិនឆ្លងកាត់ស្រុកបវេលមកស្រុកមង្គលបូរី និងរីងអស់ដែលធ្វើឲ្យប្រជាពលរដ្ឋនៅក្នុងស្រុករបស់មង្គលបូរី ជាង៨,០០០គ្រួសារ នឹងរងនូវផលប៉ះពាល់ដោយកត្តាកង្វះខាតទឹកប្រើប្រាស់ប្រចាំថ្ងៃ ។
លោកបានអះអាងទៀតថា វិធានការចំពោះមុខនៅពេលនេះអាជ្ញាធរពាក់ព័ន្ធ និងក្រសួងធនធានទឹកកំពុងជួយអន្ដរាគមន៍ខណៈដែលបញ្ហាខ្វះខាតទឹកនេះ បណ្ដាលមកពីប្រជាពលរដ្ឋសម្រុកប្រើប្រាស់ទឹកខ្លាំងពេក ដើម្បីផ្គត់ផ្គង់ស្រូវនៅក្នុងរដូវប្រាំងរបស់ពួកគាត់ ដែលបូមហួសពីផែនការដែលអាជ្ញាធរខេត្តបានដាក់ជូនទើបធ្វើឲ្យមានការប្រឈមខ្វះខាតយ៉ាងដូច្នេះ ។
ចំពោះមុខការប្រឈមនេះ លោក យឹម ប៊ុនរ៉ុម ប្រធានមន្ទីរធនធានទឹក និងឧតុនិយមខេត្តបន្ទាយមានជ័យ ដែលកំពុងដឹកនាំក្រុមការងារដោះស្រាយបញ្ហានេះបានបញ្ជាក់ថា ៖ ជាការពិតជាក់ស្ដែងប្រភពទឹកស្ទឹងមង្គលបូរីមកដល់ពេលនេះស្ទើររីងខះអស់ទៅហើយអាចប្រើប្រាស់បានក្នុងរយៈពេលយ៉ាងយូរបីថ្ងៃទៀតប៉ុណ្ណោះ ។ ប៉ុន្តែទន្ទឹមនឹងនេះ ក្រសួងក៏បានរកប្រភពទឹកពីស្រុកផ្សេងទៅជួយផ្គត់ផ្គង់ដោយក្រសួង និងអាជ្ញាធរខេត្ត ស្រុកបាន និងកំពុងតំឡើងម៉ាស៊ីនបូមទឹក គឺបូមទឹកពីស្ទឹងសិរីសោភណ្ឌ ទម្លាក់ចូលក្នុងប្រឡាយមេមួយខ្សែ ហើយហូរធ្លាក់ទៅស្ទឹងមង្គលបូរី ។ ជារួមបញ្ហាប្រឈមនេះយើងអាចដោះស្រាយបាននឹងមិនមានការប្រឈមខ្លាំងដូចកាលពីឆ្នាំ២០១៦នោះទេ ។
មួយគ្នានោះដែរ លោក អ៊ុំ រាត្រី អភិបាលខេត្តបន្ទាយមានជ័យក៏បានណែនាំដល់អាជ្ញាធរស្រុក ក្រុង និងអាជ្ញាធរឃុំ ជួយការពារប្រភពទឹកនេះជៀសវាងកុំឲ្យមានការបង្កបង្កើនផលស្រូវប្រាំងបន្ថែមទៀតព្រោះប្រភពទឹកនេះទុកសម្រាប់តែការប្រើប្រាស់ក្នុងជីវភាពប្រចាំថ្ងៃប៉ុណ្ណោះព្រោះថា រដូវប្រាំងក៏នៅមានពេលវេលាយូរទៀតទម្រាប់រដូវវស្សាមកដល់ និងមានភ្លៀងធ្លាក់ ៕ កែសម្រួលដោយ ៖សុឃាក់
ចែករំលែកព័តមាននេះ