ADផ្ទាំងផ្សព្វផ្សាយពាណិជ្ជកម្ម

ខ្លាំងបាត់ ខឹងគេស្តីឱ្យ ជិះដេញតាមគប់កញ្ចក់ឡាន (មានវីដេអូ)

4 ឆ្នាំ មុន

ភ្នំពេញ
០៨ ខែ មករា ឆ្នាំ ២០២០ ម៉ោង ១៧:២៩

រាជធានីភ្នំពេញ ៖ ស្ត្រីម្នាក់ដែលជាភ្ញៀវធ្វើដំណើរតាមរថយន្តតាក់ស៊ីមួយគ្រឿងបានរងរបួសបែកក្បាលយ៉ាងដំណំ ដោយសារតែបុរសចំណាស់ម្នាក់គប់ដុំថ្មចូលទៅក្នុងរថយន្ត បន្ទាប់ពីមានទំនាស់ពាក្យសម្ដីគ្នាជាមួយបុរសជាអ្នកបើកបររថយន្តតាក់ស៊ីនោះមួយប្រាវ ព្រោះតែបុរសចំណាស់អ្នកជិះម៉ូតូខ្វះការប្រុងប្រយ័ត្នស្ទើរតែត្រូវរថយន្តបុកទៅហើយ ទើបអ្នកបើករថយន្តតាក់ស៊ីអត់ទ្រាំងលែងបានក៏ស្ដីឲ្យ រួចកើតជារឿងហិង្សាបែបនេះតែម្ដង។ ហេតុការណ៍ខាងលើនេះបានកើតឡើងកាលពីវេលាម៉ោង២រសៀលថ្ងៃទី៨ ខែមករា…

ហេតុការណ៍ខាងលើនេះបានកើតឡើងកាលពីវេលាម៉ោង២រសៀលថ្ងៃទី៨ ខែមករា ឆ្នាំ២០២០ នៅត្រង់ចំណុចភ្លើងស្តុបតាមមហាវិថីសហព័ន្ធរុស្ស៊ីកែងផ្លូវលេខ២០០៤ ស្ថិតនៅក្នុងភូមិតាងួន សង្កាត់កាកាបទី១ ខណ្ឌពោធិ៍សែនជ័យ រាជធានាភ្នំពេញ។

ស្ត្រីរងគ្រោះមិនត្រូវបានស្គាល់អត្តសញ្ញាណ ហើយក៏មិនស្គាល់អាសយដ្ឋានថាស្នាក់នៅទីណានោះទេ ដោយស្ត្រីរងគ្រោះបានរងរបួសបែកក្បាលហូរឈាមយ៉ាងដំណំ និងត្រូវបានសាច់ញាតិជួលម៉ូតូកង់បីដឹកយកទៅសង្គ្រោះបន្ទាន់នៅមន្ទីរពេទ្យភ្លាមៗផងដែរ ។

ស្ត្រីរងគ្រោះម្នាក់ខាងលើបានជិះរថយន្តតាក់ស៊ី១គ្រឿងម៉ាកហាយឡែនឌ័រ ពណ៌ទឹកប៊ិច ពាក់ស្លាកលេខ ភ្នំពេញ ២I-១០៤៤ បើកបរដោយបុរសមិនស្គាល់ឈ្មោះម្នាក់ជាអ្នករត់តាក់ស៊ី ហើយរថយន្តនេះបានរងការខូចខាតបែកកញ្ចក់ចំហៀងខាងឆ្វេង ចំណែកឯជនដល់គឺជាបុរសចំណាស់ម្នាក់មិនស្គាល់អត្តសញ្ញាណដូចគ្នា បានជិះម៉ូតូមួយគ្រឿងម៉ាកស៊ីទី ធុនសេ១០០កូរ៉េ មិនចាំស្លាកលេខ ដែលគេសង្ស័យថាជាអ្នករត់ម៉ូតូឌុប ហើយបន្ទាប់ពីធ្វើសកម្មភាពគប់ដុំថ្មបណ្ដាលឲ្យមានអ្នករងរបួសរួចហើយ ជននេះបានជិះម៉ូតូគេចខ្លួនបាត់ស្រមោល។

តាមប្រភពព័ត៌មានពីក្រុមអ្នកជិះរថយន្តតាក់ស៊ីនោះបាននិយាយថា មុនពេលកើតហេតុ ពួកគាត់រួមនឹងស្ត្រីរងគ្រោះបានជិះរថយន្តមួយគ្រឿងខាងលើចេញពីខេត្តព្រះសីហនុឆ្ពោះមកភ្នំពេញ លុះពេលជិតដល់ចំណុចកើតហេតុ ស្រាប់តែឃើញបុរសចំណាស់ជាជនសង្ស័យម្នាក់ខាងលើជិះម៉ូតូមួយគ្រឿងក្នុងល្បឿនលឿនជ្រែពីមុខរថយន្តដោយពុំមានការភ័យខ្លាចរថយន្តបុកឡើយ ។ ខណៈនោះដោយសារអត់ទ្រាំទៅនឹងការព្រហើនរបស់បុរសចំណាស់នោះមិនបាន ទើបបុរសជាអ្នកបើកបររថយន្តតាក់ស៊ីបានចុចទម្លាក់កញ្ចក់ រួចស្រែកស្ដីបន្ទោសថា «ម៉េចជិះម៉ូតូអត់មើលឡានអញ្ចឹង?» ។ ភ្លាមៗនោះក៏មានការទាស់ពាក្យសម្ដីគ្នាកើតឡើងមួយប្រាវ។

តាមប្រភពដដែលបានបន្តថា បន្ទាប់មករថយន្តតាក់ស៊ីក៏បានបើកបន្តដំណើរទៅមុខទៀត លុះមួយសន្ទុះក្រោយមកស្រាប់តែលេចមុខបុរសចំណាស់ជាជនសង្ស័យខាងលើជិះម៉ូតូដេញតាមពីក្រោយរថយន្ត លុះដល់ទន្ទឹមក៏បានយកដុំថ្មគប់ទៅលើរថយន្ត បណ្ដាលឲ្យបែកកញ្ចក់ខាងឆ្វេងបាំងខាងក្រោយ ចូលក្នុងរថយន្តត្រូវចំក្បាលស្ត្រីរងគ្រោះ បណ្តាលឱ្យរងរបួស ។ បន្ទាប់មកជនដៃដល់ខាងលើបានបើកម៉ូតូរត់គេចខ្លួនទៅបាត់ស្រមោល ចំណែកកម្លាំងនគរបាលប៉ុស្តិ៍កាកាបទី១ និងនគរបាលចរាចរណ៍ខណ្ឌពោធិ៍សែនជ័យបានចេញអន្តរាគមន៍ដែរតែរកជនដៃដល់មិនឃើញឡើយ ។

ក្រោយពេលកើតហេតុ សមត្ថកិច្ចបានជួយទាក់ទងហៅរថយន្តមន្ទីរពេទ្យឲ្យទៅដឹកជនរងគ្រោះយកទៅសង្គ្រោះដែរ តែដោយសារចាំយូរពេក ទើបសាច់ញាតិជួលម៉ូតូកង់បីដឹកយកជនរងគ្រោះទៅកាន់មន្ទីរពេទ្យតែម្ដង៕ (កែសម្រួលដោយ ៖ ធីតា)