រាជធានីភ្នំពេញ៖ កម្ពុជាបានទទួលស្គាល់ថាឆ្នាំ ២០២០នេះសេដ្ឋកិច្ចរបស់ខ្លួនអាចនឹងមានហានិភ័យមួយចំនួន ដែលអាចជាបញ្ហាប្រឈមចំពោះកំណើនសេដ្ឋកិច្ច ក្នុងនោះមានទាំងហានិភ័យពីខាងក្រៅ និងខាងក្នុងផងដែរ ដូច្នេះត្រូវទាមទារឱ្យមានការធ្វើពិពិធកម្មមួយចំនួន ដើម្បីរក្សាបាននូវកំណើនល្អប្រសើរក្នុងឆ្នាំ ២០២០នេះ ។
យោងតាមរបាយការរបស់ធនាគារជាតិ នៃ កម្ពុជា ស្ដីពី វឌ្ឍនភាពម៉ាក្រូសេដ្ឋកិច្ច និងវិស័យធនាគារ ឆ្នាំ ២០១៩ និងទស្សនវិស័យឆ្នាំ ២០២០ បានបង្ហាញថាសេដ្ឋកិច្ចកម្ពុជា ឆ្នាំ ២០២០ អាចប្រឈមននឹងហានិភ័យមួយចំនួន ដោយទាក់ទងនឹងទៅនឹងហានិភ័យខាងក្រៅ និងហានិភ័យខាងក្នុង ។
ចំពោះហានិភ័យខាងក្រៅវាមានទាក់ទងទៅនឹងការថយចុះល្បឿនជាងការរំពឹងទុកនៃសេដ្ឋកិច្ចចិន ដែលអាចមានផលប៉ះពាល់ដល់សេដ្ឋកិច្ចកម្ពុជា ដែលមានទំនាក់ទំនងជិតស្និទ្ធជាមួយសេដ្ឋកិច្ច ។ និន្នាការនៃការអនុវត្តគោលនយោបាយគាំពារនិយម ក៏អាចប៉ះពាល់ដល់ការនាំចេញរបស់កម្ពុជា ដែលនឹងធ្វើឱ្យសេដ្ឋកិច្ចមានបញ្ហាផងដែរ ។ ចំពោះហានិភ័យខាងក្នុងដែលជាបញ្ហាប្រឈមសម្រាប់សេដ្ឋកិច្ចកម្ពុជានោះរួមមាន ការអាចបាត់បង់ការអនុគ្រោះពន្ធ អ្វីៗគ្រប់យ៉ាងលើកលែងសព្វាវុធ ( EBA ) ដែលអាចប៉ះពាល់ផ្ទាល់ដល់វិស័យកាត់ដេរសម្លៀកបំពាក់ និងវិស័យនានាក្នុងសេដ្ឋកិច្ចដែលទទួលផលដោយប្រយោលពីវិស័យកាត់ដេរ ។ កម្រិតខ្ពស់កំណើនឥណទានទៅកាន់វិស័យសំណង់ អាចបង្កឱ្យហានិភ័យកើនឡើង នៅពេលដែលការផ្គត់ផ្គង់ក្នុងវិស័យអចលនទ្រព្យកើនឡើងខ្ពស់ហួសតម្រូវការ ។
ក្នុងរបាយការណ៍នេះក៏បានបង្ហាញពីហានិភ័យប្រឈមចំពោះសេដ្ឋកិច្ចកម្ពុជាក្នុងឆ្នាំ ២០២០នេះផងដែរថា ការទិញផ្ទះដោយបង់រំលស់ពីក្រុមហ៊ុនអភិវឌ្ឍន៍សំណង់ និងលំនៅឋាន មានភាពសម្ម និងមិនទាន់មានការត្រួតពិនិត្យច្បាស់លាស់ ក៏ជាហានិភ័យចំបងមួយធ្វើឱ្យប៉ះពាល់ដល់វិស័យហិរញ្ញវត្ថុ និងនាំឱ្យប៉ះពាល់ដល់កំណើនសេដ្ឋកិច្ចរបស់ប្រទេសកម្ពុជាទាំងមូលផងដែរ ។ តែទោះជាយ៉ាងណា ក្នុងរបាយការណ៍ដដែលនេះ ក៏បានបង្ហាញពីលក្ខណៈវិជ្ជមានថា ទោះបីជាកម្ពុជាមានហានិភ័យមួយចំនួនក្ដី តែកម្ពុជានៅតែរំពឹងថា កំណើនសេដ្ឋកិច្ចរបស់ខ្លួនអាចនឹងមានកំណើនប្រមាណ ៧ភាគរយក្នុងឆ្នាំ ២០២០នេះ ជាមួយនឹងកម្រិតអតិផរណាប្រមាណ ២,៣ភាគរយ ។ ការរំពឹងទុកនេះ ដោយផ្អែកលើកត្តាមួយចំនួន ដូចជាការងើបឡើងវិញនៃសេដ្ឋកិច្ចពិភពលោក ដែលនឹងរួមចំណែកផ្ដល់ភាពអំណោយផលដល់ការនាំចេញ កំណើនវិនិយោគ បរទេស និងវិស័យទេសចរណ៍កម្ពុជា ស្របពេលដែលសេដ្ឋកិច្ចទទួលបានលទ្ធផលជាលំដាប់ពីការធ្វើពិពិធកម្មមូលដ្ឋាន និងការកែទម្រង់សម្រាប់គាំទ្រដល់ការរីកចម្រើននៃសេដ្ឋកិច្ចប្រកបដោយចីរភាព ។
កម្ពុជារំពឹងថា ការនាំចេញនៅឆ្នាំ ២០២០ នឹងមានកំណើនខ្ពស់ជាពិសេសការនាំចេញទំនិញសម្រាប់ធ្វើដំណើរ ទំនិញកម្មន្តសាលផ្សេងៗ ទោះបីជាកំណើនការនាំចេញសម្លៀកបំពាក់អាចថមថយល្បឿនក៏ដោយ ។ ទោះបីជាសហភាពអឺរ៉ូបនឹងអាចសម្រេចដក EBA ពីកម្ពុជា នៅខែកុម្ភៈឆ្នាំ ២០២០ក្ដី ការនាំចេញសម្លៀកបំពាក់របស់កម្ពុជាតែរំពឹងថាបន្តមានកំណើន ដោយសារតែការអនុវត្តជាផ្លូវការនឹងធ្វើឡើងនៅ រយៈពេល ៦ខែបន្ទាប់ពីចេញសេចក្ដីប្រកាសរបស់ EU ។ ម្យ៉ាងវិញទៀត បើទោះបីជាអឺរ៉ុបដក EBA ចេញពីកម្ពុជា ក៏កម្ពុជាអាចនាំចេញទៅកាន់សហភាពអឺរ៉ុបបានដែរ គ្រាន់តែបង្កើនថ្លៃទំនិញនាំចេញរបស់កម្ពុជានៅក្នុងទីផ្សារអឺរ៉ុប ។ ហេតុផលផ្សេងទៀត ដូចជាការចាកចេញរបស់អង់គ្លេសពីសហភាពអឺរ៉ុប ក៏ជាអំណោយ ផលដល់កម្ពុជាព្រោះទំនិញប្រមាណ ២០ភាគរបស់កម្ពុជាទៅកាន់អឺរ៉ុបគឺត្រូវនាំចេញទៅអង់គ្លេស ។
សេដ្ឋវិទូក្នុងស្រុកមួយចំនួនបានផ្ដល់ជាទស្សនទានដល់កម្ពុជា ដើម្បីរក្សាកំណើនសេដ្ឋកិច្ចក្នុងឆ្នាំនេះ និងឆ្នាំបន្តបន្ទាប់ ដោយកម្ពុជាមិនត្រូវពឹងតែលើទីផ្សារមួយនោះទេ ។ កម្ពុជាត្រូវការរកទីផ្សារថ្មីៗបន្ថែមទៀត ខណៈអ្នកក្នុងស្រុកត្រូវការបង្កើនការផលិត និងច្នៃនូវទំនិញថ្មីៗបំពេញទៅតាមតម្រូវការទីផ្សារអន្តរជាតិ ។
លោកបណ្ឌិត ម៉ី កល្យាណ ទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិ បានលើកឡើងថា ការធ្វើពិពិធកម្ម ទីផ្សារ និងផលិតផលនឹងធ្វើឱ្យកម្ពុជាអាចរក្សាបាននូវកំណើនសេដ្ឋកិច្ចកាន់តែយូរ ហើយមិនចាំបាច់ពឹងបរទេសទៀតនោះទេ ។ កម្ពុជាត្រូវកែប្រែជាបន្តបន្ទាប់ ខណៈតម្លៃពលកម្មក្នុងស្រុកបានបន្តកើនឡើងជារៀងរាល់ឆ្នាំ ដូច្នេះកម្ពុជាត្រូវច្នៃប្រឌិត រកផលិតផលណាដែលលក់លើទីផ្សារបានតម្លៃបន្ថែមខ្ពស់ ដើម្បីទប់ទល់ជាមួយនឹងការកើនឡើងនៃប្រាក់ឈ្នួលកម្មករ ៕ កែសម្រួលដោយ ៖សុឃាក់
ចែករំលែកព័តមាននេះ