ខេត្តកណ្តាល ៖ គ្រឿងចក្រអត់ច្បាប់ជាច្រើនគ្រឿង កំពុងតែធ្វើសកម្មភាពឈូសឆាយព្រៃលិចទឹកជម្រកត្រីពងកូន(តំបន់អតីតឡូត៍នេសាទលេខ៦)និងជីកលើកក្រវ៉ាត់ព័ទ្ធយកដីសាធារណៈរបស់រដ្ឋ ក្នុងដែនរដ្ឋបាលឃុំកំពង់ភ្នំ ស្រុកលើកដែក ខេត្តកណ្តាលយ៉ាងគគ្លើន ។ សកម្មភាពគ្រឿងចក្រអត់ច្បាប់ឈូសឆាយលើក
ក្រវ៉ាត់ព័ទ្ធយកដីសាធារណៈរបស់រដ្ឋតំបន់ព្រៃលិចទឹកជម្រកត្រីពងកូននេះ បន្ទាប់ពីបណ្តាញសារព័ត៌មានបានផ្សព្វផ្សាយ នៅថ្ងៃទី៣ មករា ឆ្នាំ២០២០ គេឃើញកម្លាំងចម្រុះ មានមន្ត្រីជលផល ក្រុមប្រឹក្សាឃុំ ប៉ូលិសប៉ុស្តិ៍រដ្ឋបាល បានចុះទៅពិនិត្យឃើញគ្រឿងចក្រ(អេសស្កាវ៉ាទ័រ០៩)មួយគ្រឿងថ្មីសន្លាង កំពុងជីកលើកក្រវ៉ាត់ព្រំដី ។
ខណៈនោះ មន្ត្រីជលផលក៏សួរនាំរកលិខិតស្នាមច្បាប់ទម្លាប់ និងណែនាំពន្យល់ពីផ្លូវច្បាប់ថា ការរុករានឈូសឆាយដីតំបន់ដែននេសាទព្រៃលិចទឹកជម្រកត្រីពងកូន ទាល់តែមានអនុក្រិត្យពីប្រមុខរាជរដ្ឋាភិបាល តាមរយៈក្រសួងកសិកម្ម រុក្ខាប្រមាញ់ និងនេសាទ និងរដ្ឋបាលជលផល ទើបដំណើរការទៅបាន។ ប៉ុន្តែក្រុមមើលការគ្រឿងចក្របានប្រាប់មន្ត្រីជំនាញថា ពួកគេគ្រាន់តែជាអ្នកសុីឈ្នួលគេក្នុង១ថ្ងៃ ៤០.០០០រៀល (បួនមុឺនរៀល)ទេ បើចង់ដឹងច្បាស់សួរទៅម្ចាស់ដីឈ្មោះ លោកស្រី ម៉ម សុខន មានទីលំនៅសង្កាត់ក្បាលកោះ ខណ្ឌច្បារអំពៅ រាជធានីភ្នំពេញ។
រីឯគ្រឿងចក្រដាក់មកនេះ យោងទៅតាមលិខិតសំណើសុំពីលោកចាប ច័ន្ទវិទ្យា អភិបាលស្រុកលើកដែក តាមរយៈលោក នៅ ទូច មេឃុំកំពង់ភ្នំ ជីកប្រឡាយរក្សាទឹកភ្លឺ សម្រាប់ធ្វើស្រែលើផ្ទៃដីចំនួន៤២ហិកតា នៅភូមិក្បាលជ្រោយ ឃុំកំពង់ភ្នំ។
បន្ទាប់ពីសួរនាំរួចកម្លាំងចម្រុះ ក៏បានប្រាប់ទៅមេការអោយផ្អាកការឈូសឆាយសិន រង់ចាំពិនិត្យមើលឯកសារបន្តទៀត។ លុះព្រឹកឡើងថ្ងៃទី៤ មករា ឆ្នាំ២០២០ កម្លាំងចម្រុះដដែល រួមមានលោក ហេង ធារិទ្ធ នាយរងខណ្ឌរដ្ឋបាលជលផលខេត្តកណ្តាល លោក ឃឹម ពេញ នាយផ្នែករដ្ឋបាលជលផលរកាកោង លោក ទេព ទូច អនុប្រធានផ្នែករដ្ធបាលជលផលរកាកោង អាជ្ញាធរស្រុក សមាជិកក្រុមប្រឹក្សាឃុំ បានចុះទៅពិនិត្យមើលម្តងទៀត ស្រាប់តែប្រទះឃើញឈ្មួញបានបន្ថែមដាក់គ្រឿងចក្រទៅ២គ្រឿងទៀត (អេស្កាវ៉ាទ័រ) ១គ្រឿង និងអាប៊ុលរុញព្រៃ១គ្រឿង) សរុបឡើង៣គ្រឿង កំពុងធ្វើសកម្មភាពឈួសឆាយរុញពង្រៀបព្រៃ និងជីកលើកក្រវ៉ាតយ៉ាងមមាញញឹកផងដែរ ។
ព័ត៌មានពិស្តារនឹងមានផ្សាយជូនលើកាសែតកោះសន្តិភាព។
ចែករំលែកព័តមាននេះ