ខេត្តសៀមរាប ៖ ភ្នាក់ងារកាសែតក្រុងកម្ពុជាម្នាក់ប្រចាំនៅស្រុកសូទ្រនិគម ត្រូវបានយុវជន២នាក់ ស្ថិតក្នុងសភាពស្រវឹងជោកជាំ កាប់ក្បាលនឹងពូថៅបណ្តាលឱ្យរយះដេរ៥ថ្នេរ កាលពីវេលាម៉ោង១១និង១៥នាទីយប់ ថ្ងៃទី២៧ កុម្ភៈ នៅក្នុងភូមិត្រពាំងថុង ឃុំពពេល ស្រុកសូទ្រនិគម ខណៈពេលកំពុងដេកលង់លក់នៅក្នុងអង្រឹងចាំឃ្លាំមើលបទល្មើសដឹកជញ្ជូនឈើខុសច្បាប់។ កាលពីព្រឹកថ្ងៃទី២ មីនា ជនសង្ស័យ២នាក់ក្នុងនោះម្នាក់ជាក្មេងទំនើងប្រចាំភូមិ និងម្នាក់ទៀតជាមន្ត្រីបំរើការក្នុងឧទ្យានជាតិភ្នំគូលែន ត្រូវបានសមត្ថកិច្ចប៉ូលិសចាប់ខ្លួនបញ្ជូនទៅកាន់អធិការដ្ឋាននគរបាលស្រុកសូទ្រនិគម ប៉ុន្តែជនដៃដល់ទាំង២នាក់នោះមិនត្រូវបានគេបញ្ជូនទៅតុលាការដើម្បីធ្វើការចោទប្រកាន់ទេ គឺត្រូវដោះលែងវិញ ក្រោយពីសំរួលដោះស្រាយគ្នាក្រៅប្រព័ន្ធច្បាប់រួចហើយ។
លោកអនុសេនីយ៍ឯក ហេង សំណាង អធិការរងនគរបាលស្រុកសូទ្រនិគម ទទួលបន្ទុកព្រហ្មទណ្ឌបានថ្លែងឱ្យដឹងថា ជនរងគ្រោះនៅក្នុងហេតុការណ៍នោះឈ្មោះទុំ មោង ភេទប្រុស អាយុ៣៧ឆ្នាំ រស់នៅក្នុងភូមិបុស្ស ឃុំដំដែក ស្រុកសូទ្រនិគម ជាអ្នកយកព័ត៌មានឱ្យកាសែតក្រុងកម្ពុជា បានរងរបួសបែកថ្ងាសរយះដេរ៥ថ្នេរ។ ចំណែកជនសង្ស័យបង្កអំពើហិង្សាទាំង២នាក់ដែលត្រូវបានចាប់ខ្លួននោះម្នាក់ឈ្មោះសាំ ហាក់ ភេទប្រុស អាយុ២៥ឆ្នាំ រស់នៅភូមិកើតហេតុ និងម្នាក់ទៀតឈ្មោះហៀន ហង់ រស់នៅភូមិតាពេញ ឃុំខ្នងភ្នំ ស្រុកស្វាយលើ ជាមន្ត្រីឧទ្យានុរក្សនៃឧទ្យានជាតិភ្នំគូលែន ប៉ុន្តែត្រូវបានលោកហង្ស សាវុធ នាយកឧទ្យានជាតិភ្នំគូលែន បញ្ជូនមកយាមដីរបស់គាត់នៅភូមិកើតហេតុ។
លោកអនុសេនីយ៍ឯក ហេង សំណាង បានបញ្ជាក់ថា នៅយប់កើតហេតុជនរងគ្រោះដែលជាអ្នកកាសែតរបស់អង្គភាពក្រុងកម្ពុជា រួមជាមួយអ្នកកាសែតម្នាក់ទៀតបានទៅចងអង្រឹងដេកនៅតាមផ្លូវក្នុងភូមិកើតហេតុ ដើម្បីចាំឃ្លាំមើលបទល្មើសព្រៃឈើ ហើយបក្សពួកជនដៃដល់បានផឹកស្រាសនៅក្បែរនោះដែរ លុះដល់ពេលស្រវឹងជោកជាំមិនដឹងជាមានគំនុំតាំងពីពេលណាមក ក៏យកពូថៅកាប់ទៅលើជនរងគ្រោះត្រូវចំថ្ងាសបណ្តាលឱ្យបែកហូរឈាមដេរ៥ថ្នេរ។ ចាងហ្វាងកាសែតក្រុងកម្ពុជា លោកសំ វិចិត្រ កាលពីព្រឹកថ្ងៃទី២ មីនា បានថ្លែងថា លោកកំពុងតែជំរុញឱ្យសមត្ថកិច្ចជួយអន្តរាគមន៍ចាត់ការទៅតាមច្បាប់ ដើម្បីទាមទាររកយុត្តិធម៌ឱ្យកូនចៅរបស់លោកចំពោះករណីកាប់ឱ្យរងរបួសយ៉ាងដំណំបែបនេះ។
លោកទុំ មោង ដែលត្រូវគេកាប់បានរៀបរាប់ឱ្យដឹងថា កាលពីវេលាយប់កើតហេតុខ្លួនបានទៅសុំរោងរបស់ឈ្មោះសាំ ដែលត្រូវជាឪពុកឈ្មោះសាំ ហាក់ ដើម្បីចងអង្រឹងដេកចាំឃ្លាំមើលសកម្មភាពដឹកជញ្ជូនឈើខុសច្បាប់ឆ្លងកាត់ផ្លូវនេះ ។ លោកទុំមោង បានបន្តថា នៅវេលាម៉ោងជាង១០យប់ ខណៈខ្លួនកំពុងដេកក្នុងអង្រឹង ស្រាប់តែមានមនុស្សពីរនាក់ម្នាក់កាន់ពូថៅ និងម្នាក់ទៀតកាន់ដំបងដើរសំដៅចូលមក ដោយអ្នកកាន់ដំបងបានវាយបំបែកអំពូលភ្លើងដើម្បីឱ្យងងឹត ចំណែកអ្នកកាន់ពូថៅស្ទុះចូលមកកាប់ក្បាលរបស់ខ្លួនដែលកំពុងតែដេកក្នុងអង្រឹងបណ្តាលឱ្យរងរបួសជាទម្ងន់ ហើយបន្ទាប់ពីធ្វើសកម្មភាពរួចពួកគេបានរត់គេចខ្លួនបាត់ ។ លោកអនុសេនីយ៍ឯក ហេង សំណាង នៅរសៀលថ្ងៃដដែលប្រាប់ថា ជនសង្ស័យទាំងពីរនេះអាចត្រូវបានបញ្ជូនទៅកាន់តុលាការច្រើនជាង បន្ទាប់ពីពួកគេបានយល់ព្រមធ្វើការសម្របសម្រួលដោយព្រមបង់លុយចំនួន៥ពាន់ដុល្លារទៅឱ្យជនរងគ្រោះតែគ្មានលុយបង់ទាន់ពេល ។
ទាក់ទិនទៅនឹងករណីដែលសមត្ថកិច្ចគ្រោងធ្វើការបញ្ចប់រឿងនោះ លោកទី សុវិនថាល់ ព្រះរាជអាជ្ញាសាលាដំបូងខេត្តសៀមរាបបានមានប្រសាសន៍ថា រាល់បទល្មើសព្រហ្មទណ្ឌសមត្ថកិច្ចមន្ត្រីនគរបាលយុត្តិធម៌មិនមានសិទ្ធិដោះលែងបានទេ ត្រូវតែបញ្ជូនសំណុំរឿងទៅតុលាការ ហើយការឃុំខ្លួន ឬមិនឃុំវាជាឆន្ទានុសិទ្ធិរបស់តុលាការ៕
ចែករំលែកព័តមាននេះ