ខេត្តព្រះវិហារ ៖ កាលពីថ្ងៃទី២ មីនា គណៈប្រតិភូក្រសួងផែនការដឹកនាំដោយលោកឆាយ ថន ទេសរដ្ឋមន្ត្រី រដ្ឋមន្ត្រីក្រសួងផែនការអមដំណើរដោយលោករដ្ឋលេខាធិការ អនុរដ្ឋលេខាធិការ អគ្គនាយក អគ្គាធិការ អគ្គនាយករង ប្រធាននាយកដ្ឋាន និងមន្ត្រីជាន់ខ្ពស់ក្រសួងផែនការជាច្រើនរូបទៀត បានអញ្ជើញចុះសួរសុខទុក្ខចែកអំណោយជូនដល់កងទ័ពកម្ពុជា ដែលកំពុងឈរជើងការពារព្រំដែនកម្ពុជា-សៀមនៅតំបន់ប្រាសាទព្រះវិហារ ។
ការសំណេះសំណាលប្រកបដោយភាពកក់ក្តៅ បានប្រព្រឹត្តទៅនៅទីតាំងឈរជើងកងពលតូចអន្តរាគមន៍លេខ៤ ចំណុះកងពលធំអន្តរាគមន៍លេខ២ នាភូមិអូរទឹកខៀវ ឃុំកន្ទួត ស្រុកជាំក្សាន្ត ខេត្តព្រះវិហារ ដោយមានកិច្ចស្វាគមន៍ពីសំណាក់លោកនាយឧត្តមសេនីយ៍ គន់ គីម អគ្គមេបញ្ជាការរងកងយោធពលខេមរភូមិន្ទ លោកនាយឧត្តមសេនីយ៍ជា តារា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការយោធភូមិភាគ៤ នាយទាហាន និងពលទាហាននៃកងពលតូចអន្តរាគមន៍លេខ៤ ជាច្រើនរូបទៀត ។
ក្នុងឱកាសនោះ លោកនាយឧត្តមសេនីយ៍ជា តារា បានជម្រាបជូនគណៈប្រតិភូថា ថៃនៅតែចិញ្ចឹមចិត្តជាប្រចាំក្នុងការឈ្លានពានទឹកដីកម្ពុជា ជាពិសេសតំបន់ដែលថៃហៅថា តំបន់ទំនាស់៤,៦គីឡូម៉ែត្រការ៉េ ។ តាមផ្នត់គំនិតបែបចោរឈ្លានពាននេះហើយ ទើបបណ្តាលឱ្យមានការផ្ទុះអាវុធយ៉ាងខ្លាំងក្លាកាលពីថ្ងៃទី៤-៥-៦ និង៧ កុម្ភៈ ឆ្នាំ២០១១ កន្លងមកនោះ ។ ប៉ុន្តែក្នុងស្មារតីការពារជាតិ មាតុភូមិ កងកម្លាំងប្រដាប់អាវុធកម្ពុជាបានវាយបកទាន់ពេល និងបានធ្វើឱ្យកងទ័ពថៃបរាជ័យយ៉ាងអាម៉ាស់ ។ ទន្ទឹមនេះ ដោយមានការយកចិត្តទុកដាក់ជាប់ជាប្រចាំ និងក្រោមការដឹកនាំដ៏ឈ្លាសវៃរបស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវ បណ្តាលឱ្យកងកម្លាំងប្រដាប់អាវុធកម្ពុជាគ្រប់ៗរូប ទាំងកងយោធពលខេមរភូមិន្ទ និងកងនគរបាលជាតិ មានទឹកចិត្តអង់អាចក្លាហានស៊ូលះបង់ជីវិតដើម្បីការពារទឹកដីមិនឱ្យបាត់ សូម្បីមួយមិល្លីម៉ែត្រឡើយ ។
ជាការឆ្លើយតប លោកឆាយ ថន បានមានប្រសាសន៍វាយតម្លៃខ្ពស់ និងកោតសរសើរដល់វរកងទ័ពកម្ពុជា ទាំងអគ្គមេបញ្ជាការ មេបញ្ជាការ និងពលទាហាន ដែលកន្លងមក មានភាពឈ្លាសវៃ និងអង់អាចក្លាហានក្នុងការការពារបូរណភាពដែនដី ។ លោកបានបញ្ជាក់ថា នាយករដ្ឋមន្ត្រីថៃ និងក្រុមជ្រុលនិយមអាវលឿង នៅតែមានមហិច្ឆតាឈ្លានពានកម្ពុជា ដែលនេះជាគោលដៅនិងជាបំណងអាក្រក់យូរអង្វែងរបស់ថៃ ។ ផ្ទុយទៅវិញ ជំហររបស់រាជរដ្ឋាភិបាលកម្ពុជាគឺមិនមានបំណងរំលោភយកទឹកដីប្រទេសណាមួយ សូម្បីមួយមិល្លីម៉ែត្រទេ តែក៏មិនឱ្យបរទេសរំលោភយកទឹកដីកម្ពុជាមួយមិល្លីម៉ែត្រណា
ដែរ ។ ថ្វីដ្បិតតែប្រទេសយើងតូចមែន តែយើងប្រាកដជានឹងបានទទួលជោគជ័យ ព្រោះយើងមានការគាំទ្រពីគ្រប់មជ្ឈដ្ឋានទាំងពីសមរភូមិក្រោយ និងលើឆាកអន្តរជាតិ ពិសេសផ្នែកច្បាប់ និងការទូត ។ លើសពីនេះទៅទៀត យុទ្ធជនរបស់យើងមានទឹកចិត្តអង់អាចក្លាហាន ព្រោះយើងធ្វើសង្គ្រាមការពារទឹកដីការពារផ្ទះរបស់យើង ដែលនេះជាកម្លាំងដ៏ខ្លាំង និងមានប្រសិទ្ធភាព ។ ក្រៅពីនេះ យើងមានវត្ថុស័ក្តិសិទ្ធិអ្នកតាព្រៃភ្នំ ដែលថែរក្សាតំបន់ប្រាសាទព្រះវិហារ តាមថែរក្សាការពារកងទ័ពរបស់យើងឱ្យបានសេចក្តីសុខ និងបានទទួលជោគជ័យ ។
បន្ទាប់មកលោកឆាយ ថន និងថ្នាក់ដឹកនាំក្រសួងផែនការបានអញ្ជើញជូនអំណោយជាស្បៀង មានត្រីងៀត សាច់ក្រក ទឹកត្រី និងថវិកាសរុបប្រមាណ៥១លានរៀល ដល់កងពលតូចអន្តរាគមន៍លេខ៤ និងកងពលមួយចំនួនផ្សេងទៀត ។ ទន្ទឹមនឹងនោះ ដោយយោងតាមសំណើរបស់កងទ័ព លោកទេសរដ្ឋមន្ត្រីបានសន្យានឹងផ្តល់បន្ថែមនូវស៊ីម៉ង់ត៍៣០តោន ដែកសរសៃ១០តោន ជូនដល់កងទ័ពនាតំបន់ប្រាសាទព្រះវិហារ ដើម្បីប្រើប្រាស់តាមតម្រូវការ៕
ចែករំលែកព័តមាននេះ