រាជធានីភ្នំពេញ ៖ តបតាមការចង់បានរបស់ម្ចាស់រថយន្តក្រសួងសាធារណការ និងដឹកជញ្ជូនបានដាក់ដំណើរការដាក់លក់លេខពិសេសផ្ទាល់ខ្លួនជាផ្លូវការហើយ កាលពីថ្ងៃទី៧ មករា ឆ្នាំ២០២០ ធ្វើឡើងនៅអ៊ីអន២ រាជធានីភ្នំពេញ ។
លោក ស៊ុន ចាន់ថុល ទេសរដ្ឋមន្ត្រី និងជារដ្ឋមន្ត្រីក្រសួងសាធារណការ និងដឹកជញ្ជូនបានលើកឡើងថា ការដាក់លក់លេខពិសេសនោះដោយសារមានម្ចាស់រថយន្តមួយចំនួនស្នើសុំថា មិនចង់លក់លេខផ្ទាល់នោះទេ នៅពេលលក់រថយន្តបន្តឲ្យអ្នកផ្សេង ។
លោករដ្ឋមន្ត្រីបានបញ្ជាក់ថា ៖«ស្លាកលេខរថយន្តពិសេសនេះ ម្ចាស់រថយន្តអាចលក់តែរថយន្តហើយដោះទុកស្លាកដែលខ្លួនស្រឡាញ់ដាក់រថយន្តផ្សេងដែលខ្លួនទើបទិញបាន» ។ លោកថា ស្លាកលេខនេះត្រូវបានក្រុមគណៈកម្មការជំនាញធ្វើការសិក្សាកែសម្រួលដាក់ទៅកាន់ក្រសួងមហាផ្ទៃ និក្រសួងពាក់ព័ន្ធរួចហើយដាក់ទៅជូនសម្តេចតេជោ ហ៊ុន សែន ដើម្បីសម្រេចផងដែរ ។ លោកថា លេខពិសេសផ្ទាល់នេះក៏មានការចូលរួមសិក្សាពីអង្គភាពប្រឆាំងអំពើរពុករលួយ ដើម្បីធ្វើការសិក្សាផងដែរ ។
លោកទេសរដ្ឋមន្ត្រីបានលើកឡើងថា ទៀតថាការដំណើរការលក់លេខពិសេសនោះ គឺជាការផ្តល់សេរីភាពមួយបន្ថែមដល់ប្រជាពលដែលចង់បានលេខដែលខ្លួនស្រឡាញ់តាមរយៈការដេញថ្លៃ ។ ក្រសួងសាធារណការបានបញ្ជាក់ថា លេខចុះបញ្ជីពិសេសផ្ទាល់ខ្លួននេះគេអាចដាក់ជាឈ្មោះ ជាឡាតាំង ឬជាលេខដោយមិនលើសពី៨ខ្ទង់ ហើយផ្នែកខាងលើមានពាក្យកម្ពុជា និងផ្នែកខាងក្រោមមានពាក្យ Cambodia ។ យ៉ាងណាក្តីលោករដ្ឋមន្ត្រីក៏បានសុំការអធ្យាស្រ័យដល់ម្ចាស់លេខផង ព្រោះថា ប្រព័ន្ធនេះបានទើបតែដំណើរការដូច្នេះអាចនឹងមានភាពរអាក់រអួល ៕
ចែករំលែកព័តមាននេះ